ម៉ាឡេស៊ីនិងហូឡង់ ចង់នាំអ្នកបង្កសោកនាដកម្មធ្លាក់យន្តហោះMH17ទៅតុលាការ
នាយករដ្ឋមន្ត្រីម៉ាឡេស៊ី និងហូឡង់ បានព្រមព្រៀងគ្នានៅថ្ងៃពុធនេះ បន្តរក្សាគំនាបលើអ៊ុយក្រែន ដើម្បីធ្វើយ៉ាងណាអាចចូលទៅដល់កន្លែងដែលយន្តហោះរបស់ក្រុមហ៊ុនម៉ាឡេស៊ីអ៊ែរឡាញ MH17 ធ្លាក់ និងជាពិសេសនាំអ្នកទទួលខុសត្រូវបង្កឱ្យមានសោកនាកម្មនេះ ទៅកាត់ទោសនៅតុលាការ។
ចុះផ្សាយនៅថ្ងៃ៖ កែប្រែថ្ងៃទី៖
បន្ទាប់ពីបានជួបពិភាក្សាគ្នាជាមួយសមភាគីហូឡង់ លោកនាយករដ្ឋមន្ត្រីម៉ាឡេស៊ី Najib Razak បានថ្លែងប្រាប់អ្នកកាសែតថា “ម៉ាឡេស៊ី សន្យានាំជនឬក្រុមដែលបានបង្កគ្រោះមហន្តរាយធ្លាក់យន្តហោះMH17 ទៅតុលាការ។ ម៉ាឡេស៊ី និងហូឡង់ ដែលជាប្រទេសពាក់ព័ន្ធខ្លាំងនឹងគ្រោះធ្លាក់យន្តហោះនេះ បានព្រមព្រៀង បន្តសហការ និងពួតដៃគ្នាធ្វើការជាធ្លុងមួយ ដោយផ្តោតអាទិភាពទៅលើការប្រមូលខ្មោចយន្តហោះ ដែលស្ថិតនៅភាគខាងកើតប្រទេសអ៊ុយក្រែននៅឡើយ។
យន្តហោះប៊ូអ៊ីង ៧៧៧ របស់ក្រុមហ៊ុនអាកាសចរណ៍ម៉ាឡេស៊ី ហោះចេញពីទីក្រុងអាំស្ទែដាំ កាលពីថ្ងៃទី ១៧ កក្កដា២០១៤ ទំនងជាបានត្រូវគ្រាប់មីស៊ីល រួចធ្លាក់ នៅភាគខាងកើតអ៊ុយក្រែន ត្រង់តំបន់ដែលមានការប្រយុទ្ធគ្នាខ្លាំងរវាងទាហានស្របច្បាប់អ៊ុយក្រែន និងពួកឧទ្ទាមចង់ផ្តាច់ទឹកដីស្និទ្ធនឹងរុស្ស៊ី។ យន្តហោះនោះមានផ្ទុកអ្នកដំណើរ សរុប២៩៨នាក់ ក្នុងនោះ១៩៣នាក់ជាជនជាតិហូឡង់ និង៤៤នាក់ជាជនជាតិម៉ាឡេស៊ី។
ភាគីហូឡង់ទទួលបន្ទុកវែករកអត្តសញ្ញាជនរងគ្រោះ និង ស្វែងរកមូលហេតុដែលនាំឱ្យធ្លាក់យន្តហោះ ប៉ុន្តែការស៊ើបអង្កេត ហាក់ជួបការលំបាកខ្លាំង ព្រោះមិនអាចបំពេញបេសកកម្មធំៗនិងសំខាន់ៗបាន ដោយកាលៈទេសៈនិងស្ថានភាពមិនអំណោយ។ ភ្នាក់ងារហូឡង់ បានត្រលប់ជាថ្មីនៅកាន់តំបន់រងគ្រោះ កាលពីសប្តាហ៍មុន ដើម្បីប្រមូលសំណល់សាកសព។
សេចក្តីសន្និដ្ឋានដែលគេតែងលើកយកមកនិយាយជាញយៗ គឺយន្តហោះបានធ្លាក់ បន្ទាប់មីស៊ីលបាញ់ចំ។ បើតាមសហរដ្ឋអាមេរិកនិងអ៊ុយក្រែន មីស៊ីលនោះ ជាប្រភេទគ្រាប់មីស៊ីលBoukរបស់រុស្ស៊ី ដែលផ្តល់ឱ្យពួកឧទ្ទាមប្រើ សម្រាប់ប្រឆាំងនឹងរដ្ឋាភិបាលក្រុងគៀវ។ ប៉ុន្តែបើតាមរុស្ស៊ីវិញ មីស៊ីលនោះជារបស់យោធាអ៊ុយក្រែន។ ចំណែកលោកនាយករដ្ឋមន្ត្រីម៉ាឡេស៊ីវិញ ដោយមិនធ្វើអត្ថាធិប្បាយលម្អិត បានប្រកាសថាទទួលបានព័ត៌មានបឋម ទាក់ទងនឹងការកើតហេតុ ប៉ុន្តែត្រូវរង់ចាំរកភស្តុតាងមកបញ្ជាក់សិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ