បារាំងរងការវាយប្រហារភេរវកម្មជាថ្មី ក្នុងថ្ងៃបុណ្យជាតិ១៤កក្កដា
ចុះផ្សាយនៅថ្ងៃ៖
ស្តាប់ - ០៥:៤០
ថ្ងៃព្រហស្បតិ៍១៤កក្កដា នៅទីក្រុងនីសNice ភាគខាងត្បូងប្រទេសបារាំង មនុស្សយ៉ាងហោច៨៤នាក់ ក្នុងនោះមានកុមារច្រើននាក់ បានស្លាប់ក្នុងការវាយប្រហារភេរវកម្មដោយរថយន្តកាំម្ញ៉ុង។ ពលរដ្ឋអាមេរិក២នាក់និងរុស្ស៊ីម្នាក់ បានស្លាប់ក្នុងហេតុការណ៍នេះដែរ។ ក្មេងតូចៗជាង៥០នាក់ កំពុងស្ថិតក្នុងមន្ទីរពេទ្យ មនុស្ស១៨នាក់ កំពុងស្ថិតក្នុងស្ថានភាពរបួសធ្ងន់ធ្ងរ។
ហេតុការណ៍កើតឡើង ចំថ្ងៃបុណ្យជាតិបារាំង១៤កក្កដា។ នៅមិនទាន់មានក្រុមភេរវជនណាប្រកាសថា ជាស្នាដៃខ្លួននៅឡើយ។ អាជ្ញាធរបារាំងកំពុងស៊ើបអង្កេត។ ប្រធានាធិបតីបារាំងបានប្រកាសពន្យារស្ថានភាពអាសន្នក្នុងប្រទេស ៣ខែបន្ថែមទៀត បន្តពីស្ថានភាពអាសន្នដែលដាក់ចេញតាំងពីមានភេរវកម្មក្រុងប៉ារីស ១៣វិច្ឆិកា ២០១៥។
ហេតុការណ៍ភេរវកម្ម
ភេរវកម្ម កើតឡើង យប់ម្សិលមិញ ម៉ោងប្រហែលជិត១១យប់ ចំថ្ងៃបុណ្យជាតិបារាំងតែម្តង។ ហេតុការណ៍កើតឡើង នៅកន្លែងទេសចរដើរកំសាន្តតាមមាត់សមុទ្រ ដែលគេហៅថា La Promenade des Anglais ប្រែថា ការដើរកំសាន្តរបស់ជនជាតិអង់គ្លេស ។ ហេតុការណ៍កើតឡើងតែបន្តិចប៉ុណ្ណោះក្រោយពេលការបាញ់កាំជ្រួចចប់សព្វគ្រប់។
នៅកន្លែងដើរកំសាន្តមួយនេះ មានរថយន្តកាំម្ញ៉ុងមួយគ្រឿង ពណ៌ស បានបើកយ៉ាងលឿនស្លេវ សំដៅទៅបុកហ្វូងមនុស្សដែលកំពុងដើរ។ ក្នុងថ្ងៃបុណ្យជាតិ មានមនុស្សច្រើន នាំគ្រួសារ និងកូនចៅ ទៅដើរកំសាន្ត ស្តាប់តន្ត្រី រឺមើលកាំជ្រួច ម្ល៉ោះហើយ ទើបមានអ្នកស្លាប់ច្រើនយ៉ាងនេះ។
បន្ទាប់មក ភេរវជនបានប្រើកាំភ្លើងខ្លីមួយដើម បាញ់ច្រើនដង មុននឹងត្រូវប៉ូលិសបាញ់សម្លាប់។ សាក្សីម្នាក់ប្រាប់ថា ភេរវជននោះបានបាញ់ទៅលើក្រុមប៉ូលិស។ អាជ្ញាធរក្រុងនីស បានលើកឡើងថា ជាភេរវកម្ម ហើយបានអំពាវនាវអោយប្រជាជនសំងំក្នុងផ្ទះ។
ស្តាប់និស្សិតខ្មែរឈ្មោះ ឆាក លឹមឈាង ដែលបាននៅក្នុងហេតុការណ៍ផ្ទាល់
សាក្សីមួយរូប ជាអ្នកសារព័ត៌មានអាល្លឺម៉ង់ ប្រាប់ថា បានឃើញម៉ូតូមួយគ្រឿង បើកក្រោយឡានកាំម្ញ៉ុងមួយនេះ។ អ្នកបើកម៉ូតូនោះបានព្យាយាមវ៉ាឡានកាំម្ញ៉ុង និងចង់បើកទ្វារចំហៀងឡានកាំម្ញ៉ូងនោះ។ ប៉ុន្តែម៉ូតូនោះបានដួលទៅ។ សាក្សីមួយចំនួនដែលបានឃើញហេតុការណ៍ ពីដំបូង គិតថា អ្នកបើកបរឡានកាំម្ញ៉ុងអាចបាត់ភាពម្ចាស់ការក្នុងការបើកបរ ទាល់តែឡាននោះឈប់ទើបពួកគេយល់ថា ជាហេតុការណ៍ខុសប្រក្រតី។
ភេរវជនជាអ្នករស់នៅក្រុងនីស ដើមកំណើតទុយនីស៊ី
យោងតាមប៉ូលិស ភេរវជនអាយុ៣១ឆ្នាំ ដើមកំណើតទុយនីស៊ី ហើយជាអ្នករស់នៅក្រុងនីស តែម្តង។ ប៉ូលិសរកឃើញអត្តសញ្ញាណបណ្ណ ជនរល្មើសក្នុងរថយន្តកាំម្ញ៉ុង ដែលជនល្មើសបានបើកបុកមនុស្ស។ ក្នុងរថយន្តនោះ ក៏មានគ្រាប់បែកដៃមួយគ្រាប់ និងអាវុធមួយចំនួនដែរ។ បុរសរូបនេះធ្លាប់បង្កហិង្សា ពីមុនមកដែរ តែមិនដែលធ្វើអ្វីធំដុំ រហូតជាប់ឈ្មោះក្នុងបញ្ជីរបស់ប៉ូលិសភេរវកម្មបារាំងទេ។
ដោយឡែក ក្នុងហេតុការណ៍នេះ ភេរវជនមិនបានចាប់មនុស្សធ្វើជាចំណាប់ខ្មាំងទេ។ គេត្រូវបានប៉ូលិសបាញ់សម្លាប់តែម្តង។
មិនទាន់មានការប្រកាសភ្លាមៗថា ជាស្នាដៃរបស់ក្រុមភេរវជនណាមួយនៅឡើយ
ក្រុមស៊ើបអង្កេត កំពុងចង់ដឹងថា តើអាចមានជនដៃដល់ផ្សេងទៀត ដែលបានផ្សំគំនិត ចូលរួមការវាយប្រហារនេះទេ។ ជនល្មើសមានកាំភ្លើង និងអាវុធមួយចំនួនដែរ អាចថា គេបានទទួលការជួយជ្រោមជ្រែងពីក្រុមណាមួយ។
ត្បិតថា មិនទាន់មានក្រុមភេរវជនណា ប្រកាសភ្លាមៗថា ជាស្នាដៃខ្លួនក៏ដោយ បើមើលទ្រង់ទ្រាយនៃការវាយប្រហារ គឺអាចថា ជាសកម្មភាពវាយប្រហារមួយ ស្របតាមការអំពាវនាវដែលក្រុមជីហាតរដ្ឋអ៊ីស្លាមបានធ្វើកន្លងមក។ កាលពីខែកញ្ញា ឆ្នាំ២០១៤ មោហាមេត អាល់ អាត់ណានី ជាអ្នកនាំពាក្យក្រុមជីហាតរដ្ឋអ៊ីស្លាម បានអំពាវនាវអោយប្រើអាវុធ និងមធ្យោបាយគ្រប់ប្រភេទ តាមដែលអាចទៅបាន មិនថាដុំថ្ម រឺអ្វីក៏ដោយចុះ អោយតែអាច គឺត្រូវតែប្រើ ដើម្បីយកទៅកំទេចជនជាតិបារាំង និងអាមេរិកាំង។
ថ្ងៃ១៥កក្កដានេះទៀត គឹភ្លាមៗក្រោយភេរវកម្ម នៅក្រុងនីសតែម្តង ក៏មានវីដេអូអំពាវនាវមួយទៀត របស់ក្រុមជីហាតរដ្ឋអ៊ីស្លាម។ ជាវីដេអូថតរូបភាពសកម្មជនម្នាក់របស់ក្រុម។ ជនរូបនោះបានអំពាវនាវដល់អ្នកដែលចង់ធ្វើជាសកម្មជនជីហាត ថាពួកគេមិនចាំបាច់ធ្វើដំណើររហូតដល់ទឹកដីស៊ីរី ដើម្បីទៅជួបក្រុមជីហាតទេ។ ពួកគេអាចធ្វើការវាយប្រហារក្នុងទឹកដីបារាំង ផ្ទាល់តែម្តងក៏បានដែរ។
យើងឃើញជាក់ស្តែងថា ភេរវកម្មនៅទីក្រុងនីសភាគខាងត្បូងនេះ គឺភេរវជនបានប្រើរថយន្តកាំម្ញ៉ុងជាអាវុធ ដើម្បីបុកសម្លាប់មនុស្ស។ វាមានលក្ខណៈស្របតាមការអំពាវនាវរបស់ក្រុមរដ្ឋអ៊ីស្លាម ថាប្រើអីជាអាវុធក៏ដោយចុះអោយតែអាច អោយតែសម្លាប់ជនជាតិបារាំង និងអាមេរិកបាន។
គួរបញ្ជាក់ថា ទីក្រុងនីស នៅភាគខាងត្បូង ស្ថិតក្នុងតំបន់ឆ្នេរទេសចរ Côte d’Azur របស់បារាំង គឺកន្លែងដែលមានជនបរទេសមកកំសាន្តច្រើន។ ក្នុងចំណោមមនុស្សស្លាប់ ក្នុងភេរវកម្មនៅទីក្រុងនិស យប់មិញនេះ មានពលរដ្ឋអាមេរិក និងរុស្ស៊ីដែរ។
ជនអ៊ីស្លាមជ្រុលនិយមធ្លាប់ប្រើរថយន្តជាអាវុធក្នុងការវាយប្រហារថ្មីៗ នៅលោកខាងលិច
នេះមិនមែនជាលើកទី១គេដែលគេប្រើរថយន្តធ្វើជាអាវុធសម្លាប់មនុស្ស នៅប្រទេសលោកខាងលិច។ ការប្រើរថយន្តជាអាវុធ ក្នុងការវាយប្រហារ របស់ក្រុមជ្រុលនិយមអ៊ីស្លាម គឺធ្លាប់មានធ្វើនៅអង់គ្លេស និងនៅកាណាដាពីមុនមកដែរ។ នៅអង់គ្លេសទើបតែកើតឡើង នៅឆ្នាំ២០១៣ ជនជ្រុលនិយមអ៊ីស្លាមដើមកំណើតអាហ្វ្រិក២នាក់ បានបើករថយន្តបុកទាហានអង់គ្លេសម្នាក់ នៅក្រុងឡុដ៍ ដើម្បីសងសឹកទាហានអង់គ្លេសដែលបានសម្លាប់អ្នកកាន់សាសនាអ៊ីស្លាម។
នៅកាណាដាវិញ គឺកើតឡើង នៅខែតុលាឆ្នាំ២០១៤។ កាលនោះ គឺនៅជាយក្រុងម៉ុងរេអាល់ ជនជាតិកាណាដាម្នាក់ បានបើកឡានទៅបុកទាហាន៣នាក់ ធ្វើអោយទាហានម្នាក់ស្លាប់ និងម្នាក់ទៀតរបួស។
ភេរវកម្មនៅទីក្រុងនិស ប្រទេសបារាំង ជាភេរវកម្ម១ធ្ងន់ក្នុងទឹកដីអឺរ៉ុប គិតតាំងពីមានភេរវកម្មក្រុងប៉ារីស ថ្ងៃ១៣វិច្ឆិកាឆ្នាំមុន និងភេរវកម្មនៅក្រុងព្រុចសែល ថ្ងៃ២២មិនាឆ្នាំ២០១៦នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ