អូស្ត្រាលីចោទជនភៀសខ្លួនថាភូតកុហកទាក់ទងការបំពានផ្លូវភេទ
ចុះផ្សាយនៅថ្ងៃ៖
ស្តាប់ - ០៥:១៨
នៅថ្ងៃព្រហស្បតិ៍១១សីហានេះ រដ្ឋាភិបាលអូស្ត្រាលីបានប្រតិកម្មចោទប្រកាន់ជនភៀសខ្លួន នៅកោះណូរុ ថាភូតកុហក ទាក់ទងនឹងករណីបំពានផ្លូវភេទ ដើម្បីអាចបានចូលមកក្នុងទឹកដីអូស្ត្រាលី។ ប្រតិកម្មអូស្ត្រាលី ធ្វើឡើងក្រោយសារព័ត៌មាន The Guardian Australia បានចុះផ្សាយឯកសារជាង២០០០ច្បាប់ លើកឡើងពីហេតុការណ៍បំពានភេទ ជនភៀសខ្លួនអារសាច់ខ្លួនឯង និងករណីផ្សេងទៀត ដែលបានកើតឡើងនៅមន្ទីរឃុំឃាំងណូរុ។ ករណីជាងពាក់កណ្តាលប៉ះពាល់កុមារនៅទីនោះ។ ណូរុមានជនភៀសខ្លួន៤៤២នាក់។
ឯកសារចុះផ្សាយដោយសារព័ត៌មាន ដឺ ហ្កាឌៀន រៀបរៀងឡើងដោយបុគ្គលិកជាច្រើន បម្រើការនៅមន្ទីរឃុំឃាំងកោះណូរុ នៅសមុទ្រប៉ាស៊ីហ្វិក។
ហេតុការណ៍កើតឡើង ពីខែសីហាឆ្នាំ២០១៣ ដល់ខែតុលាឆ្នាំ២០១៥
ហេតុការណ៍ក្នុងឯកសារលើកឡើងពីករណីបំពានផ្លូវភេទទៅលើជនភៀសខ្លួន ពីបញ្ហាផ្លូវចិត្តរបស់ជនភៀសខ្លួន ពីការប៉ុនប៉ងអារសាច់ខ្លួនឯង ដោយសារតែជនភៀសខ្លួនទាំងនោះ បាក់ទឹកចិត្តអស់សង្ឃឹម ពួកគេរងការឈឺចាប់ផ្លូវចិត្តខ្លាំង។ ក្នុងចំណោមហេតុការណ៍១០៨៦ករណី ក្នុងឯកសារ មានជាង៥១ភាគរយ ដែលប៉ះពាល់កុមារនៅមន្ទីរឃុំឃាំង។
យោងតាមឯកសារទាំងនេះ ជនភៀសខ្លួនពិសេសនារីៗ បានរងការបំពានភេទពីក្រុមអ្នកយាម។ មានករណីមួយ ទាក៉ទងនារីម្នាក់។ គាត់ចង់សុំងូតទឹកសំអាតខ្លួន បាន៤នាទី ព្រោះតាមធម្មតា គាត់អាចងូតទឹកបានត្រឹម២នាទីប៉ុណ្ណោះ។ អ្នកយាមឆ្លើយថា អូខេយល់ព្រម តែនារីនោះត្រូវតែព្រមបម្រើកាមតណ្ហារបស់អ្នកយាម។ មានករណីមួយទៀត ក្មេងស្រីតូចម្នាក់បានសរសេរក្នុងសៀវភៅសិក្សារបស់គាត់ ថាគាត់ ហត់ ខ្លាំងណាស់ ហើយថា គាត់ចង់ស្លាប់។
នៅមន្ទីរណូរុ មានកុមារ៣០នាក់បានអារសាច់ខ្លួន។ ហើយច្រើននាក់ទៀតបានគំរាមថា នឹងធ្វើដូចគ្នា។ នេះសបង្ហាញពីបញ្ហាផ្លូវចិត្តធ្ងន់ធ្ងរ ដែលមិនត្រឹមតែប៉ះពាល់មនុស្សធំទេ តែប៉ះពាល់រហូតដល់ក្មេងតូចៗដែលត្រូវមកស៊ូទ្រាំ ក្នុងមន្ទីរឃុំឃាំង ជាមួយមនុស្សចាស់ដែរ។ ភាពអមនុស្សធម៌ និងអសីលធម៌លើសពីនេះ គឺថាអ្នកយាមនៅទីនោះ ពេលឃើញកុមារតូចរបួសនៅមាត់ ហើយមកសុំដេរមាត់ ពួកគេមិនសំដែងការអាណិតអាសូរទេ បែរជានាំគ្នាសើចទៅវិញ។
រដ្ឋមន្ត្រីអន្តោប្រវេសន៍ចោទរហូតថា ជនភៀសខ្លួនបានភរភូត តែក៏មិនបដិសេធពីបញ្ហាមួយចំនួនក្នុងមន្ទីរណូរុ
ការចុះផ្សាយរបស់សារព័ត៌មាន ដឺ ហ្កាឌៀន ម្សិលមិញ បំបាក់មុខអូស្ត្រាលីខ្លាំងណាស់។ សម្រាប់ ដឺ ហ្កាដៀន នេះជាការបែកធ្លាយដ៏ធំ នូវឯកសារផ្ទៃក្នុងរបស់សេវាអន្តោប្រវេសន៍។ សួរថា ជនភៀសខ្លួនអាចកុហកបានម្តេចទៅកើត បើឯកសារដែលសារព័ត៌មាន ដឺ ហ្កាដៀន ចុះផ្សាយ គឺក្រុមបុគ្គលិកមន្ទីរឃុំឃាំងខ្លួនឯង ជាអ្នករៀបរៀងឡើង សរសេរហេតុការណ៍ដែលពួកគេបានឃើញ បានលឺ ក្នុងរយៈពេល២ឆ្នាំ។ តើក្រុមបុគ្គលិលទាំងនោះអាចកុហកក្នុងការសរសេរឯកសារនេះម្តេចបានទៅ។
ជាញឹកញយ អង្គការសិទ្ធិមនុស្ស ក្រុមគ្រូពេទ្យ មេធាវី មានទាំងអង្គការសហប្រជាជាតិដែរ បានបរិហារពីលក្ខខណ្ឌរស់នៅដ៏លំបាករបស់ជនភៀសខ្លួន ពីភាពមិនទទួលខុសត្រូវរបស់អូស្ត្រា តែម្តងហើយ ម្តងទៀត អូស្ត្រាលីមើលទៅ មិនខ្វល់ខ្វាយទេ។
កាលពីដើមខែសីហានេះ អង្គការ Human Right Watch និងអង្គការផ្សេងៗច្រើនទៀត បានលើកឡើងដូចៗគ្នាថា ជនភៀសខ្លួន ជនសុំសិទ្ធិជ្រកកោននៅណូរុ ភាគច្រើនជាប់ឃុំនៅទីនោះ៣ឆ្នាំហើយ។ ពួកគេមិនបានទទួលការថែទាំព្យាបាលត្រឹមត្រូវ ទាន់ពេលវេលា ពីមន្ត្រីសុខភាព រឺអ្នកដែលអូស្ត្រាលីបង់លុយអោយចុះទៅមើលថែទាំពួកគេទេ។ លើសពីនេះទៀត ប្រជាជនម្ចាស់ស្រុកនៅកោះណូរុ ក៏បានបំពានធ្វើបាបពួកគេទៀត។ ជនភៀសខ្លួនបាក់ទឹកចិត្ត អស់សង្ឃឹម ចង់សម្លាប់ខ្លួន។
រដ្ឋមន្ត្រីអន្តោប្រវេសន៍ លោកភីតថឺ ឌុតតុន ថាពួកគេភូតភរ តែលោកក៏បានទទួលស្គាល់ដែរថា មានអ្នកដែលហ៊ានរហូតអារសាច់ខ្លួនឯង ចង់សម្លាប់ខ្លួនឯង។ តែម៉េចក៏អូស្ត្រាលីមិនព្រមដោះស្រាយ បញ្ហាដាច់ស្រេចទៅ កោតតែអូស្ត្រាលីអាចទ្រាំមើលពួកគេបាក់ទឹកចិត្តធ្ងន់ធ្ងរទៅរួចដែរ។
នយោបាយអន្តោប្រវេសន៍ដ៏តឹងតែងរបស់អូស្ត្រាលី
នយោបាយអន្តោប្រវេសន៍អូស្ត្រាលី បំបាក់ទឹកចិត្តជនភៀសខ្លួន មិនអោយសម្លឹងមើលអូស្ត្រាលីតែម្តង។ ជនដែលមានឯកសារសុំជ្រកកោនត្រឹមត្រូវ ក៏អូស្ត្រាលីមិនយកអោយមកនៅស្រុកខ្លួនដែរ។ តាំងពិឆ្នាំ២០១២មក ជនភៀសខ្លួនដែលអាជ្ញាធរអូស្ត្រាលីចាប់បាននៅសមុទ្រ តែងត្រូវបញ្ជូនទៅតាមមន្ទីរឃុំឃាំងកោះណូរុ រឺនៅប៉ាពូអាស៊ី នូវេល ហ្គីណេ។ ពួកគេគ្មានសិទ្ធិសុំជ្រកកោនទៀតទេ។
រដ្ឋាភិបាលរបស់អតីតនាយករដ្ឋមន្ត្រីថូនី អាបត ធ្លាប់ចំណាយប្រាក់ដល់២០លានអឺរ៉ូ ធ្វើវីដេអូផ្សព្វផ្សាយបកប្រែជាច្រើនភាសា ជាសារបំបាក់ទឹកចិត្តជនដែលចង់សុំសិទ្ធិជ្រកកោន។ អូស្ត្រាលីធ្លាប់រងការចោទប្រកាន់ កាលពិឆ្នាំ២០១៥ ថាបានបង់លុយអោយមេកប៉ាល់មេទូកដែលដឹកជនភៀសខ្លួនសំដៅមកអូស្ត្រាលី ម្នាក់ៗ៤០០០អឺរ៉ូ ដើម្បីអោយពួកគេបកចង្កូតទៅឥណ្ឌូណេស៊ី។ អូស្ត្រាលីមិនខ្លាចចំណាយលុយទេ អោយតែអាចទប់ស្កាត់ជនអន្តោប្រវេសន៍បាន។ កន្លងមកដែរ អូស្ត្រាលីបានចុះកិច្ចព្រមព្រៀងជាមួយកម្ពុជាយើង ដើម្បីអោយកម្ពុជាទទួលយកជនភៀសខ្លួន។
អោយតែទប់ស្កាត់ជនភៀសខ្លួនមិនអោយជាន់ទឹកដីខ្លួនបាន ទោះជាគេចង់ចោទអូស្ត្រាលីថា ឃុំខ្លួនជនភៀសខ្លួន បំពានសិទ្ធិមនុស្សដល់ណា ក៏ចោទទៅចុះ មើលទៅ រដ្ឋាភិបាលអូស្ត្រាលីនៅតែមុខក្រាស ប្រឈមការចោទប្រកាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ