ប៉ាពូអាស៊ីនូវែលហ្គីណេប្រកាសបិទជំរំជនភៀសខ្លួននៅកោះម៉ានូគ្រប់គ្រងដោយអូស្ត្រាលី
ប៉ាពូអាស៊ីនូវែលហ្គីណេ បានជូនដំណឹងនៅថ្ងៃពុធ២៧មេសាអំពីការបិទជំរំសំរាប់ដាក់ជនអន្តោប្រវេស្តន៍ដែលស្វែងរកសិទ្ធិជ្រកកោនមួយនៅលើកោះ Manus របស់ប៉ាពូអាស៊ីនូវែលហ្គីណេដែលគ្រប់គ្រងដោយអូស្រ្តាលី។ ការប្រកាសនេះ គឺដោយសារតែរដ្ឋាភិបាលប៉ាពូអាស៊ីនូវែលហ្គីណេ មិនពេញចិត្តចំពោះគោលមាគ៌ានយោបាយរឹតបន្តឹងរបស់រដ្ឋាភិបាលអូស្ត្រាលីទៅលើជនភៀសខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
សេចក្តីសម្រេចចិត្តរបស់ប៉ាពូអាស៊ីនូវែលហ្គីណេនេះ ត្រូវបានប្រព្រឹត្តទៅមួយថ្ងៃបន្ទាប់ពីតុលាការកំពូលប៉ាពូអាស៊ីនូវែលហ្គីណេ ប្រកាសថា” ការដែលដាក់ជនភៀសខ្លួននៅលើកោះម៉ានូ គឺជាការខុសច្បាប់ និងផ្ទុយពីរដ្ឋធម្មនុញ្ញ។
ស្របគ្នានេះ អូស្ត្រាលី ក៏កំពុងតែទទួលរងនូវការតិៈទៀនយ៉ាងខ្លាំងក្លាពីសំណាក់អង្គការ ការពារសិទ្ធមនុស្សក៏ដូចជាអង្គការសហប្រជាជាតិ ដោយសារតែអូស្ត្រាលីអនុវត្តនយោបាយអន្តោប្រវេស្តន៍មួយដ៏តឹងរឹងបំផុត ទៅលើជនអន្តោប្រវេស្តន៍។
កងទ័ពជើងទឹកអូស្ត្រាលី នៅពេលឃើញកាណូតជនភៀសខ្លួនចូលមកដល់ទឹកដីខ្លួន ក៏ប្រញាប់ប្រញាល់ធ្វើការរុញច្រានបណ្តេញពួកគេយ៉ាងទាន់ចិត្តដែរ។ រីឯជនអន្តោប្រវេសន៍វិញ បើទោះបីជាមានសំណាង ធ្វើដំណើរឆ្លងចូលដល់ឆ្នេរអូស្ត្រាលីក្តី ក៏ពួកគេនៅតែត្រូវបានគេចាប់យកទៅដាក់ក្នុងជំរំឃុំឃាំង នៅឯក្រៅទឹកដីអូស្រ្តាលីដែរ ដូចជានៅកោះManus ឬកោះNauru ដែលជាកូនកោះនៅក្នុងមហាសមុទុ្រប៉ាស៊ីហ្វីក ទុកមួយរយៈសិនទម្រាំអាជ្ញាធរអូស្រ្តាលីធ្វើការពិនិត្យសំណើសុំសិទ្ធិជ្រកកោនរបស់ពួកគេ។ ក៏ប៉ុន្តែបើទោះបីជាសំណើរសុំសិទ្ធិជ្រកកោនរបស់ជនអន្តោប្រវេសន៍ ត្រូវបានចាត់ទុកថាស្របច្បាប់ក្តី ក៏ទីក្រុងCanberra នៅតែមិនព្រមអនុញ្ញាតឱ្យពួកគេចូលទៅជ្រកកោននៅក្នុងទឹកដីអូស្រ្តាលីដដែល។
«យោងទៅលើសេចក្តីសំរេចចិត្តខាងលើនេះ, ប៉ាពូអាស៊ីនូវែលហ្គីណេនឹង ធ្វើការសាកសួរទៅរដ្ឋាភិបាលអូស្រ្តាលីជាបន្ទាន់ដើម្បីស្វែងរកជម្រើស មួយបែបផ្សេងទៀត សម្រាប់ជួយដល់ជនអន្តោប្រវេសន៍ ដែលបច្ចុប្បន្ន កំពុងជាប់ឃុំនៅឯ ”មជ្ឈមណ្ឌលព្យាបាលក្នុងតំបន់" ដែលជាឈ្មោះផ្លូវការនៃការបោះជំរំរបស់អូស្ត្រាលីនៅកោះម៉ានូ-នេះជា សេចក្តីថ្លែងរបស់ លោក Peter O'Neill នាយករដ្ឋមន្ត្រីប៉ាពូអាស៊ីនូវែលហ្គីណេ នៅក្នុងសេចក្តីជូនដំណឹងមួយ។ យោងតាមលោក O'Neil ដដែល ពួកអ្នកស្វែងរកសិទ្ធិជ្រកកោនមិនគួរស្នាក់នៅលើកោះManus ក្នុងរយៈដ៏យូរពេលនោះទេ។
សូមបញ្ជាក់ថានៅមុនពេលសេចក្តីសម្រេចចិត្តរបស់ប៉ាពូអាស៊ីនូវែលហ្គីណេ ត្រូវបានផ្សព្វផ្សាយជាសាធារណៈ រដ្ឋមន្រ្តីក្រសួងអន្តោប្រវេសន៍អូស្រ្តាលីលោកPeter Dutton វិញបានថ្លែងបញ្ជាក់ថា” គោលនយោបាយរបស់អូស្រ្តាលី គឺដើម្បីការពារព្រំដែនរបស់ខ្លួនដែលកំពុងនៅតែមានសុពលភាពជានិច្ច បើទោះបីជាមានសេចក្តីសម្រេចរបស់តុលាការកំពូលប៉ាពូអាស៊ីនូវែលហ្គីណេយ៉ាងណាក្តី។
មិនតែប៉ុណ្ណោះលោក Peter Dutton បាន និយាយប្រាប់ទៀតថា” គ្មានជនអន្តោប្រវេស្តន៍ណាម្នាក់ក្នុងចំណោមជនអន្តោប្រវេស្តន៍ទាំងអស់ ចំនួន៨៥០នាក់ដែលបច្ចុប្បន្នកំពុងត្រូវឃុំខ្លួននៅលើកោះ Manus អាចទៅរស់នៅប្រទេសអូស្ត្រាលីបានឡើយហើយពួកគេក៏នឹងត្រូវវិលទៅប្រទេសដើមខ្លួនវិញឬមួយក៏ត្រូវចូលទៅកាន់ប្រទេសទីបី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ