ស្ថានការណ៍នយោបាយអូស្ត្រាលីស្ថិតក្នុងភាពស្រពិចស្រពីលក្រោយការបោះឆ្នោតមុនអាណត្តិ
ចុះផ្សាយនៅថ្ងៃ៖
ស្តាប់ - ០៤:៥១
ស្ថានការណ៍នយោបាយអូស្ត្រាលី នៅថ្ងៃអាទិត្យ៣កក្កដានេះ កំពុងជួបភាពមិនច្បាស់លាស់ ព្រោះថា ការបោះឆ្នោតមុនអាណត្តិនៅថ្ងៃសៅរ៍ម្សិលមិញ មិនបានជួយពង្រឹងជំហរនាយករដ្ឋមន្ត្រីផុតអាណត្តិ លោកម៉ាល់ខុម ថឺនប៊ុល Malcom Turnbull ដូចការប៉ងប្រាថ្នារបស់លោកទេ។ សន្លឹកឆ្នោតនៅមិនទាន់រាប់ចប់សព្វគ្រប់នៅឡើយទេ។
យោងតាមលទ្ធផលបណ្តោះអាសន្ន បក្សកាន់អំណាចសេរីនិយមរបស់លោកថឺនប៊ុលអាចទទួលបានកៅអីសភា៦៧កៅអី បក្សពលករជាបក្សប្រឆាំងវិញ អាចបានលើសបក្សកាន់អំណាច គឺអាចបានដល់៧១កៅអី។ បក្សតូចៗទទួលបាន៥កៅអី។ ពេលនេះ នៅសល់កៅអី៧ទៀត ដែលមិនទាន់ដឹងថា ត្រូវបានទៅលើបក្សណាមួយនៅឡើយ។ កៅអីសភាតំណាងរាស្ត្រសរុបមាន១៥០កៅអី ហើយកៅអីសមាជិកព្រឹទ្ធសភាមាន៧៦កៅអី។
ដើម្បីទទួលបានសម្លេងភាគច្រើននៅសភា លុះត្រាតែទទួលបាន៧៦កៅអីនៅសភា។ ដើម្បីបង្កើតរដ្ឋាភិបាលបាន ពេលនេះ ទាំងបក្សកាន់អំណាច ទាំងបក្សប្រឆាំងកំពុងប្រជែងគ្នា ចែចង់បក្សតូចៗ។ ព្រឹកមិញនេះ លោកថឺនប៊ុល ប្រាប់ថា លោកបានចរចាជាមួយបក្សតូចៗហើយ។ ហើយប្រហែលជាលោកអាចបន្តជានាយករដ្ឋមន្ត្រីសម្រាប់អាណត្តិថ្មី រយៈពេល៣ឆ្នាំថែមទៀត។ តែក្នុង៣ឆ្នាំប៉ុណ្ណោះ អូស្ត្រាលីមាននាយករដ្ឋមន្ត្រីដល់ទៅ៤រូប។
បក្សសេរីនិយមកាន់អំណាចប្រឈមនឹងការបាត់កៅអីសភា នាយករដ្ឋមន្ត្រីត្រូវចរចាអង្វរបក្សតូចៗដែលលោកធ្លាប់រិះគន់
លទ្ធផលបណ្តោះអាសន្នបន្តបន្ទាប់ ក្នុងការបោះឆ្នោតមុនអាណត្តិ បង្ហាញថា នាយករដ្ឋមន្ត្រី Malcom Turnbull ខ្លួនឯងជាអ្នកធ្វើអោយបក្សសេរីនិយមរបស់លោកបាក់មុខ ពិសេសគឺលោកខ្លួនឯងតែម្តង។ លោកថឺនប៊ុលនេះហើយ ដែលជាអ្នកបានរំលាយសភាចោល កាលពីខែឧសភា ដើម្បីជំរុញអោយមានការបោះឆ្នោតមុនអាណត្តិនេះឡើង។
លោកចង់ពង្រឹងជំហរបក្សកាន់អំណាចអោយកាន់តែខ្លាំងនៅសភា។ តាមធម្មតា ការបោះឆ្នោតសភា គឺធ្វើយ៉ាងយូរ គឺអាចនៅកំឡុងដំណាច់ឆ្នាំ មុនខែមករាដើមឆ្នាំ២០១៧។
ក្នុងការរាប់សន្លឹកឆ្នោត តាំងពីថ្ងៃសៅរ៍មក លទ្ធផលបន្តបន្ទាប់ បង្ហាញថាបក្សពលករជាបក្សប្រឆាំង ទទួលបានសម្លេងឆ្នោត និងកៅអីសភាកាន់តែច្រើន។ ដើម្បីទទួលបានជោគជ័យ ទាល់តែបក្សកាន់អំណាចទទួលបាន៧៦កៅអី នៅសភា។ ដើម្បីទទួលបានជោគជ័យ នឹងពង្រឹងអំណាច បក្សសេរីនិយមត្រូវចរចាស្វិតស្វាញជាមួយបក្សតូចៗ ដើម្បីបង្កើតរដ្ឋាភិបាលចម្រុះ ព្រោះបក្សពលករមានប្រៀបជាងណាស់ ហើយអាចចរចាជាមួយបក្សតូចៗបានជោគជ័យផងក៏ថាបាន។
ត្បិតថា លោកថឺនប៊ុលសង្ឃឹមថា បក្សតូចៗអាចនឹងព្រមបង្កើតរដ្ឋាភិបាលចម្រុះ ធ្វើការងារ ជាមួយបក្សកាន់អំណាចរបស់លោក។ តែមិនដឹងថា នៅទីបញ្ចប់ បក្សតូចៗទាំងនោះអាចសម្រេចចិត្តយ៉ាងនាទេ ព្រោះក្នុងការឃោសនាបោះឆ្នោតកន្លងមក លោកថឺនប៊ុល បានរិះគន់សមត្ថភាពបក្សតូចៗ មិនតិចដែរទេ។
គួររំលឹកដែរថា លោកថឺនប៊ុលនេះធ្លាប់បានធ្វើរដ្ឋប្រហារផ្ទៃក្នុងបក្សសេរីនិយមខ្លួនឯង ដើម្បីទំលាក់អតីតនាយករដ្ឋមន្ត្រីថូនី អាបត កាលពីឆ្នាំមុន។ មិនដឹងថា បក្សតូចៗអាចទុកចិត្ត ព្រមធ្វើការជាមួយបក្សសេរីនិយមដែររឺក៏អត់។
ក្នុងយុទ្ធនាការឃោសនាកន្លងមក លោកថឺនប៊ុលចំអកលើសមត្ថភាពបក្សនយោបាយតូចៗ។ លោកថា គណបក្សតូចៗ ដែលអាចចូលរួមបង្កើតរដ្ឋាភិបាលចម្រុះជាមួយបក្សពលករនោះ មិនអាចនឹងគ្រប់គ្រងបញ្ហាសេដ្ឋកិច្ចទេ។ បញ្ហាសេដ្ឋកិច្ចអូស្ត្រាលីកំពុងជួបវិបត្តិ ផ្នែកធនធានរ៉ែដែក និងធ្យូងថ្ម មិនបានស្ទុះទៅមុខដូចពេលមុនៗទេ។ ផ្នែកហិរញ្ញវត្ថុវិញក៏ជួបឱនភាពដែរ។
នាយករដ្ឋមន្ត្រីថឺនប៊ុល ចង់ចំអកបក្សតូចៗ នឹងរំលឹកប្រជាជនវិញថា វិស័យសេដ្ឋកិច្ចនេះគឺសំខាន់សម្រាប់ជាតិ។
ភាពសាមញ្ញនៃយុទ្ធនការឃោសនាបោះឆ្នោតមុនអាណត្តិរបស់បក្សពលករ
បក្សពលករជាបក្សប្រឆាំង មានបេក្ខជនឈរឈ្មោះជាអតីតមេសហជីព នោះគឺលោក Bill Shorten អាយុ៤៩ឆ្នាំ។ ក្នុងយុទ្ធនាការបោះឆ្នោតកន្លងមក បក្សពលករផ្តោតយុទ្ធសាស្ត្រលើអ្នកបោះឆ្នោតជាកម្មករ និងប្រជាជនមានជីវភាពមធ្យម។
ដើម្បីទាក់ទាញអ្នកបោះឆ្នោត បក្សប្រឆាំងបានលើកយកវិស័យសុខភាព និងការរួបរួមជាតិមកធ្វើជាប្រធានបទឃោសនា។ លោក Bill Shorten សន្យាផ្តល់ថវិកាអភិវឌ្ឈន៍ផ្នែកសុខភាព ផ្នែកយុត្តិធម៌និងពន្ធអាករអោយបានខ្លាំងក្លា។ លោកក៏មានគម្រោងអភិវឌ្ឈន៍ថាមពលមិនចេះរីងស្ងួតដែរ។ យុទ្ធនាការបក្សពលករមានលក្ខណៈបែបបុរាណបន្តិច តែជាយុទ្ធនាការដែលសាមញ្ញ មានភាពទាក់ទាញ ខុសពីយុទ្ធនាការមានលក្ខណៈអួតអាងរបស់នាយករដ្ឋមន្ត្រីថឺនប៊ុល។
ចំពោះការឃោសនារបស់បក្សកាន់អំណាចវិញ លោកថឺនប៊ុល បានជ្រើសរើសប្រធានបទទាក៉ទងនឹងពាណិជ្ជកម្មសេដ្ឋកិច្ចជាតិ។ លោកបានអួតសមត្ថភាព ពីជំនាញរបស់បក្សសេរីនិយម និងរិះគន់បក្សតូចៗ។ ខណៈអង់គ្លេសបានសម្រេចដើរចេញពីអឺរ៉ុបនោះ លោកថឺនប៊ុលបានឆ្លៀតយកប្រធានបទសេដ្ឋកិច្ចនេះមកឃោសនាថា ប្រិចស៊ីតនេះ គឺជាមូលហេតុមួយទៀត ដែលធ្វើអោយប្រជាជនអូស្ត្រាលីត្រូវការរដ្ឋាភិបាលដែលមានស្ថិរភាព។
បក្សកាន់អំណាចក៏បានឃោសនាការពារនយោបាយអន្តោប្រវេសន៍ដ៏តឹងតែងទាក់ទងនឹងបញ្ហាទូកជនភៀសខ្លួនដែរ។ ប៉ុន្តែ សម្រាប់អ្នកបោះឆ្នោត បើទោះជាបក្សពលករឡើងមកកាន់អំណាច ក៏បក្សពលករមិនប្តូរនយោបាយអន្តោប្រវេសន៍អ្វីលើសពីបក្សកាន់អំណាចដែរ ព្រោះថា ក្រុមសិទ្ធិមនុស្សរិះបានគន់ដាក់សម្ពាធចំពោះនយោបាយអន្តោប្រវេសន៍ អូស្ត្រាលីមិនតិចទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ