កុប្បកម្មផ្ទុះឡើងនៅមណ្ឌលដាក់ជនភៀសខ្លួន នៅលើកោះChristmas របស់អូស្ត្រាលី
អូស្ត្រាលី នៅថ្ងៃចន្ទនេះ បានដកមន្រ្តី សន្តិសុខរបស់ខ្លួន ចេញពីមណ្ឌល ដាក់ជនភៀសខ្លួន បរទេស ដែលមានទីតាំងនៅលើកោះ Christmas របស់អូស្ត្រាលី។ ចំណាត់ការនេះបានធ្វើឡើង បន្ទាប់ពីទាំងជនភៀសខ្លួន និងទណ្ឌិតបានរួមគ្នា បះបោរ ធ្វើកុប្បកម្មយ៉ាងហិង្សា ប្រឆាំងនយោបាយរើសអើងរបស់អាជ្ញាធរអូស្ត្រាលី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
រដ្ឋមន្រ្តីអន្តោប្រវេសន៍អូស្រ្តាលី លោកPeter Dutton បាននិយាយប្រាប់ទូរទស្សន៍អង់គ្លេស ថា មន្រ្តីសន្តិសុខអូស្ត្រាលីនៅមិនទាន់អាចចូលទៅបញ្ជា គ្រប់គ្រងមណ្ឌល ដែលកំពុងកើតមានកុប្បកម្មរបស់ក្រុមជនភៀសខ្លួន នៅឡើយទេ។ នៅថ្ងៃចន្ទនេះ ទាំងក្រុមជនភៀសខ្លួន និងទណ្ឌិត ដែលផ្ទុះកំហឹង មិនពេញចិត្តនឹងការគ្រប់គ្រងរបស់មន្រ្តីសន្តិសុខអូស្ត្រាលី បានធ្វើកុប្បកម្ម ហើយ ម្នាក់ៗ នាំគ្នា ចាប់កាន់ដំបងវាយបាល់ ដើម្បីត្រៀមប្រឈមមុខជាមួយប៉ូលិសអូស្ត្រាលី។
គឺការបាត់បង់ជីវិត ដោយគ្មានមូលហេតុរបស់អ្នកសុំសិទ្ធិជ្រកកោន ជាតិអ៊ីរ៉ង់ម្នាក់ ដែលជាផ្កាភ្លើង ធ្វើឲ្យកើតមានកុប្បកម្មប្រឆាំងអាជ្ញាធរអូស្ត្រាលី។ តាមអ្នកតំណាងរាស្រ្តនូវែលហ្សេឡង់ម្នាក់ ដែលធ្លាប់បានធ្វើដំណើរទៅកោះ Christmas កាលពីខែតុលាមុន គេបានប្រាប់គាត់ថា ដំបូងឡើយ ក្រុមជនភៀសខ្លួន បានសួររកហេតុផល ដែលធ្វើឲ្យបុរសជាតិអ៊ីរ៉ង់ ដេកស្លាប់ នៅលើផ្ទាំងថ្ម កាលពីថ្ងៃអាទិត្យម្សិលមិញ។ អ្នកយាមអូស្ត្រាលីមិនបានបកស្រាយអ្វីទេ ផ្ទុយទៅវិញ បានដាល់ចំមុខអ្នកដែលបានសួរ។ នៅថ្ងៃអាទិត្យ ក្រុមជនភៀសខ្លួន បានធ្វើបាតុកម្មសន្តិភាព ប៉ុន្តែ បាតុកម្ម បានប្រែក្លាយជាកុប្បកម្មហិង្សា ដោយសារការឆ្លៀតឱកាសរបស់ក្រុមអ្នកទោសគ្មានសញ្ជាតិផ្សេងទៀត ដែលអាជ្ញាធរអូស្ត្រាលីបានយកដាក់នៅក្នុងមណ្ឌលតែមួយ នឹងក្រុមជនភៀសខ្លួន។
នៅក្រោមច្បាប់អន្តប្រវេសន៍ដ៏តឹងតែងរបស់អូស្ត្រាលី រាល់ជនភៀសខ្លួន ដែលធ្វើដំណើរតាមទូកសំដៅទឹកដីអូស្ត្រាលី ត្រូវបានទាហាន អូស្ត្រាលី ចាប់ឃាត់ យកទៅដាក់នៅក្នុងជំរំជនភៀសខ្លួន នៅលើកោះ ណូរុ ឬកោះ ដ៏សែនឆ្ងាយរបស់អូស្ត្រាលី ឈ្មោះ Christmas។ នៅលើកោះChristmas ដែលស្ថិតនៅចម្ងាយប្រមាណ២៦០០គីឡូម៉ែត្រពីអូស្ត្រាលី អាជ្ញាធរអូស្ត្រាលី មានសង់មណ្ឌលសម្រាប់ដាក់ជនភៀសខ្លួនដែលកំពុងដាក់ពាក្យសុំសិទ្ធិជ្រកកោនផង និងដាក់អ្នកទោសបរទេស ដែលគ្មានសញ្ជាតិ បន្ទាប់ពីអូស្ត្រាលីបានឈប់ផ្តល់ទិដ្ឋាការ ដោយសារតែសកម្មភាពឧក្រិដ្ឋកម្មរបស់ពួកគេ។ ថ្មីៗនេះ ចំនួនអ្នកទោស នូវែលហ្សេណង់ ដែលអូស្ត្រាលីដកទិដ្ឋាការ និង ដាក់ទោស ដោយសារតែអំពើឧក្រិដ្ឋកម្ម បានកើនឡើងជាលំដាប់ ក្នុងមណ្ឌលលើកោះ Christmas។
នៅថ្ងៃនេះ ពីកន្លែងកើតហេតុ អ្នកទោសម្នាក់បាននិយាយតាមទូរស័ព្ទ ប្រាប់វិទ្យុនូវែលហ្សេឡង់ ថា ទាំងជនភៀសខ្លួន និងក្រុមអ្នកទោស ដែលបានរួមគ្នាបះបោរប្រឆាំង អាជ្ញាធរអូស្ត្រាលី ព្រោះតែពួកគេ ធុញទ្រាន់ និងមិនអាចទ្រាំតទៅទៀតបានទេ ដែលឃើញមនុស្សនៅក្នុងមណ្ឌល ប៉ុនប៉ងសម្លាប់ខ្លួន ដោយសារការអស់សង្ឃឹម នឹងនយោបាយគ្រប់គ្រងរបស់អូស្ត្រាលី។
នាយករដ្ឋមន្រ្តីនូវែលហ្សេឡង់ លោកចន ឃី ធ្លាប់បានរិះគន់នយោបាយគ្រប់គ្រងជនបរទេសរបស់អូស្ត្រាលី។ តាមលោកចន ឃី ជនជាតិនូវែលហ្សេឡង់ជាច្រើនបានទៅរស់នៅយូរអង្វែងនៅអូស្ត្រាលី។ ការចាប់ដាក់ឃុំនៅកោះដ៏សែនឆ្ងាយរឹតតែធ្វើឲ្យពួកគេដាច់ ទំនាក់ទំនងជាមួយគ្រួសាររបស់ពួកគេ នៅនូវែលហ្សេឡង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ