សាលារាជធានីភ្នំពេញ៖ បញ្ហាដីធ្លីបឹងកក់នៅសល់មិនដល់១០គ្រូសារទៀតទេ
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានបញ្ជាក់ប្រាប់វិទ្យុបារាំងថាបញ្ហាជម្លោះដីធ្លីនៅតំបន់បឹងកក់ ដោះស្រាយជិតរួចរាល់ហើយ។ លោកថាមកដល់ពេលនេះ គឺសាលាក្រុងដោះស្រាយបាន៩០ភាគរយហើយ ចាប់តាំងពីពេលមានបញ្ហានេះមក។ តែអ្នកតំណាងសហគមន៍បឹងកក់ បានបញ្ជាក់ថា ការដោះស្រាយបច្ចុប្បន្ននេះគ្រាន់តែជាការសន្យាលើក្រដាសតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:១០
ដំណោះស្រាយបញ្ហាដីធ្លីដ៏រ៉ាំរ៉ៃ របស់សហគមន៍បឹងកក់អាចនឹងត្រូវដោះស្រាយចប់ ក្នុងពេលឆាប់ៗខាងមុខនេះ ដោយសារតែពេលនេះ សាលាក្រុងបានដោះស្រាយបានប្រមាណ៩០ភាគរយហើយ ចាប់តាំងពីពេលមានបញ្ហាជម្លោះដីធ្លីកើតឡើងនៅឆ្នាំ២០០៧មក។ នេះបើតាមការបញ្ជាក់របស់លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ។
បើតាមការបញ្ជាក់របស់អ្នកនាំពាក្យ រូបនេះ បានបន្តថា បច្ចុប្បន្ននៅសល់មិនដល់១០គ្រួសារទេ ដែលសាលារាជធានីភ្នំពេញ កំពុងធ្វើការដោះស្រាយជាមួយពួកគាត់។ អ្នកទាំង១០គ្រួសារនោះ មិនយល់ស្របនឹងការចែកប្លង់ដីឡូ ឬទំហំដីឡូ ដែលសាលាក្រុងផ្តល់ឲ្យ។ ចំពោះការដោះស្រាយនេះ លោក ឡុង ឌីម៉ង់ បញ្ជាក់ថា សូម្បីតែតំបន់ផ្លូវរថភ្លើង របស់លោក ចាន់ ពុទ្ធិស័ក្ក ក៏សាលាក្រុងបានដោះស្រាយឲ្យរួចរាល់ហើយដែរ បើទោះបីជាដី ដែលលោក ចាន់ ពុទ្ធិស័ក្ក មិនបានរាប់បញ្ចូលក្នុងដីតំបន់បឹងកក់ក៏ដោយ។
ចំណែកលោក ចាន់ ពុទ្ធិស័ក្ក អ្នកតំណាងសហគមន៍បឹងកក់បានបញ្ជាក់ថាការសន្យាផ្តល់ដីដល់ក្រុមសហគមន៍របស់លោក គឺគ្រាន់តែធ្វើឡើងនៅលើក្រដាសតែប៉ុណ្ណោះ ប៉ុន្តែជាក់ស្តែងរហូតមកដល់ពេលនេះ លោក និងអ្នកភូមិរបស់លោកមិនទាន់បានទទួលដីជាក់ស្តែងនៅឡើយទេ។ ហើយលោកបន្ថែមថា លោកមិនទាន់ដឹងថាដី ដែលសាលាក្រុងប្រកាសផ្តល់ឲ្យនោះ នៅកន្លែងណាដែរ។
លោកបន្ថែមថា ដោយសារតែពេលនេះ មិនទាន់មានដីជាក់ស្តែងនៅឡើយ ដូច្នេះលោកចង់បានទំហំដី ដែលមានរាងត្រឹមត្រូវ ពោលគឺមិនមែនជាទំហំដី ដែលមានទំហំមិនស្មើគ្នានោះទេ។ ម្យ៉ាងទៀត បើទោះបីជាទំហំដីដែលលោកទទួលបានមិនមានទំហំដូចអ្នកភូមិបឹងកក់ទទួលបានក៏ដោយ តែលោកសុំឲ្យទំហំដីឡូ ដែលផ្តល់ឲ្យនោះ គឺមានទំហំដូចៗគ្នា ទទឹង ៤ម៉ែត្រ និងបណ្តោយ ១៦ម៉ែត្រ។
ចំពោះអ្នក ដែលមិនទាន់បានដោះស្រាយបញ្ហាដីធ្លីនោះ លោកឡុង ឌីម៉ង់ថា ដោយសារតែពួកគាត់ចង់បានទំហំដីជាក់ស្តែងដូចបច្ចុប្បន្ន ឬគ្រាន់តែកាត់ចេញ៣០ភារយនៃដីបច្ចុប្បន្ន។ ប៉ុន្តែសាលារាជធានីភ្នំពេញ ធ្វើគោលការណ៍ចែកទំហំដី ទទឹង៤ម៉ែត្រ និងបណ្តោយ១៨ម៉ែត្រសម្រាប់ពួកគាត់ ហើយអាចនឹងចរចាតាមស្ថានភាពជាក់ស្តែង។
សូមរំលឹកថា បញ្ហាជម្លោះដីធ្លីរបស់សហគមន៍បឹងកក់បានកើតឡើងនៅឆ្នាំ២០០៧ ជាមួយនឹងក្រុមហ៊ុន ស៊ូកាគូអ៊ីន ដែលក្នងនោះមានគ្រួសារប្រមាណ៣០០០គ្រួសារ ត្រូវបានបណ្តេញចេញពីតំបន់នោះ ដើម្បីបើកផ្លូវឲ្យគំរោងអចលនទ្រព្យរបស់ក្រុមហ៊ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ