កម្ពុជា-សង្គម

ការរម្លឹកខួប២ឆ្នាំនៃការបាញ់សម្លាប់ លោក បណ្ឌិត កែម ឡី ធ្វើឡើងខុសថ្ងៃគ្នា

ពលរដ្ឋខ្មែរនៅសហរដ្ឋអាមេរិក និងប្រទេសអូស្រ្តាលី ព្រមជាមួយភរិយាលោក កែម ឡី និងកូនៗ គ្រោងធ្វើពិធីរម្លឹកខួប២ឆ្នាំនៃការបាញ់សម្លាប់ អ្នកវិភាគល្បីឈ្មោះរូបនេះ នៅថ្ងៃទី៧កក្កដាខាងមុខ គឺចំថ្ងៃដំបូងនៃការឃោសនាបោះឆ្នោតតែម្តង។ ចំណែកសាច់ញាត្តិលោក កែម ឡី នៅកម្ពុជា គ្រោងធ្វើបុណ្យខួប២ឆ្នាំនេះ នៅថ្ងៃ១០កក្កដា ជាថ្ងៃឃាតកម្មកើតឡើង។

ចុះផ្សាយនៅថ្ងៃ៖ 01/07/2018 - 06:58

ដោយ៖ អ៊ឹង ប៊ុនថន

ផ្សាយពាណិជ្ជកម្ម

ទាំងអ្នកស្រី ប៊ូ រចនា ទាំងលោក កែម រិទ្ធិសិត ប្អូនប្រុសបង្កើតលោក កែម ឡី សុទ្ធតែបានអំពាវនាវដល់ជនរួមឈាមខ្មែរ ចូលរួមឲ្យបានច្រើនកុះករក្នុងពិធីបុណ្យរំលឹកខួប២ឆ្នាំនៃការស្លាប់របស់លោក កែម ឡី។

នៅក្នុងវីដេអូឃ្លើបដែលបង្ហោះតាមបណ្ដាញសង្គមហ្វេសប៊ុក អ្នកស្រី ប៊ូ រចនា បានឲ្យដឹងថា ការរៀបចំពិធីបុណ្យរំលឹកខួប២ឆ្នាំ នៃការស្លាប់របស់លោក កែម ឡី នឹងធ្វើនៅវត្តពុទ្ធរង្ស៊ី ហៅវត្តធំ ក្នុងប្រទេសអូស្ត្រាលី។

អ្នកស្រី ប៊ូ រចនា អះអាងថា ថវិកាដែលទទួលបានពីការរៀបចំពិធីបុណ្យនេះ អ្នកស្រីនឹងបរិចា្ចគ៤០ភាគរយ ជួយប្រជាពលរដ្ឋខ្មែរដែលទទួលរងភាពអយុត្តិធម៌នៅក្នុងសង្គមខ្មែរ និងជួយដល់ជនភៀសខ្លួនខ្មែរផ្សេងទៀត។ អ្នកស្រីបន្តថា ការសម្រេចបរិច្ចាគថវិកានេះ ធ្វើឡើងដោយសារអ្នកស្រីចង់បន្តបេសកម្មរបស់លោកបណ្ឌិត កែម ឡី ដែលបានធ្វើការងារជួយសង្គមកន្លងមក។

ចំណែកពលរដ្ឋខ្មែរក្នុងសហរដ្ឋអាមេរិកវិញក៏នឹងរៀបចំពិធីរំលឹកខួបពីរឆ្នាំនេះនៅថ្ងៃ៧ ខែកក្កដា ខាងមុខនេះដែរ ដូចជានៅរដ្ឋកាលីហ្វ័រញ៉ា រដ្ឋម៉ាសាជូសេធ និងបណ្តារដ្ឋជាច្រើនទៀត។

ដោយឡែក នៅក្នុងប្រទេសកម្ពុជាវិញ បុណ្យគំរប់ខួប២ឆ្នាំរបស់លោក កែម ឡី គឺនឹងធ្វើនៅថ្ងៃទី១០ខែកក្កដា នៅក្នុងគេហដ្ឋានរបស់លោកក្នុងស្រុកត្រាំកក់ ខេត្តតាកែវ ដោយនិមន្តព្រះសង្ឃចំនួន៥២អង្គ ទៅតាមអាយុ៥២ឆ្នាំរបស់លោក កែម ឡី។ នេះជាការបញ្ជាក់របស់លោក កែម រិទ្ធិសិត ដែលជាប្អូនប្រុសបង្កើត។ ប៉ុន្តែលោកបញ្ជាក់ថា ការធ្វើបុណ្យនេះ មិនមានឈ្មោះ អ្នកស្រី ប៊ូ រចនា និងកូនៗនៅក្នុងសំបុត្រអញ្ជើញនោះទេដោយសារតែដឹងថាគាត់មិនអាចវិលមកចូលរួមបាន។

សូមរំឮកថា លោកបណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់កាលពីថ្ងៃទី១០កក្កដាឆ្នាំ២០១៦ នៅក្នុងហាងទំនិញមួយកន្លែងជិតស្តុបបូកគោ។ ក្រោយឃាតកម្មកណ្តាលក្រុងនេះ សមត្ថកិច្ចបានចាប់ខ្លួនបុរសម្នាក់ ឈ្មោះ អឿត អាង ហៅខ្លួនឯងថា «ជួប សម្លាប់» ដោយតុលាការកាត់ទោសឲ្យជាប់ពន្ធនាគារមួយជីវិត នៅក្នុងករណីឃាតកម្មលើអ្នកវិភាគល្បីឈ្មោះរូបនេះ។ តែកាលពីចុងខែមីនា ឆ្នាំ២០១៧ តុលាការបានប្រកាសបំបែកសំណុំរឿងនេះជាពីរ ដើម្បីស៊ើបអង្កេតរកអ្នកពាក់ព័ន្ធផ្សេងទៀតយកមកកាត់ទោស៕