កម្ពុជា-ច្បាប់

លោក ស ខេង៖ ចំនួនមនុស្សស្លាប់ដោយសារគ្រោះថ្នាក់ចរាចរណ៍អាចកើនជាង៣ពាន់នាក់នៅឆ្នាំ២០២០

លោក ស ខេង បានជំរុញឲ្យស្ថាប័នពាក់ព័ន្ធ ពង្រឹងវិធានការណ៍ច្បាប់ទប់ស្កាត់គ្រោះថ្នាក់ចរាចរណ៍ឲ្យមានប្រសិទ្ធភាពចាប់ពីពេលនេះដល់ឆ្នាំ២០២០។ បើតាមលោក ស ខេង ប្រសិនបើសមត្ថកិច្ចមិនពង្រឹងការអនុវត្តច្បាប់ឲ្យមានប្រសិទ្ធភាពទេ ចំនួនអ្នកស្លាប់អាចកើនដល់ជាង៣ពាន់នាក់នៅឆ្នាំ២០២០ ខណៈគ្រោះថ្នាក់ចរាចរណ៍បានសម្លាប់អ្នកប្រើប្រាស់ផ្លូវជាមធ្យមក្នុងមួយថ្ងៃ៥នាក់ដដែល។

ចុះផ្សាយនៅថ្ងៃ៖ 19/01/2019 - 08:09

ដោយ៖ អេង គីមហុង

ផ្សាយពាណិជ្ជកម្ម

ការក្រើនរំឭករបស់លោកស ខេង ធ្វើឡើងក្នុងឱកាសបូកសរុបការងារត្រួតពិនិត្យការអនុវត្តច្បាប់ស្ដីពីចរាចរណ៍ផ្លូវគោក ក្រោយច្បាប់នេះបានដាក់ឲ្យដំណើរការរយៈពេលបីឆ្នាំមកហើយគិតមកដល់ឆ្នាំ២០១៩នេះ។ លោក ស ខេង ប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកគូសបញ្ជាក់ថា តាមការប៉ាន់ស្មានរបស់អ្នកជំនាញសុវត្ថិភាពចរាចរណ៍ផ្លូវគោក បើគ្មានវិធានការទប់ស្កាត់អោយមានប្រសិទ្ធភាពទេនោះ ចំនួនអ្នកស្លាប់ដោយសារគ្រោះថ្នាក់ចរាចរណ៍ នឹងកើនដល់ ៣.២០០នាក់ នាឆ្នាំ២០២០ខាងមុខនេះ ខណៈបច្ចុប្បន្ននេះ គ្រោះថ្នាក់ចរាចរណ៍បានធ្វើឲ្យខូចខាតទ្រព្យសម្បត្តិជាច្រើនរយលានដុល្លារក្នុងមួយឆ្នាំ។ ជាការខូចខាតដែលមានអត្រាខ្ពស់បើប្រៀបធៀបនឹងគ្រោះថ្នាក់សង្គមផ្សេងទៀត។

វិធានការណ៍ទប់ស្កាត់មាន៩ចំណុចដើម្បីកាត់បន្ថយចំនួនមនុស្សស្លាប់ដែលអាចកើនដល់ជាង៣ពាន់នាក់នៅឆ្នាំ២០២០រួមមាន៖ ជំរុញការផ្សព្វផ្សាយច្បាប់ស្ដីពីចរាចរណ៍ផ្លូវគោកឲ្យបានទូលំទូលាយតាមគ្រប់រូបភាព។ រឹតបន្តឹងត្រួតពិនិត្យការអនុវត្តច្បាប់ឲ្យបានជាប់ជាប្រចាំប្រកបដោយតម្លាភាព ស្មើភាព ពិសេសផ្ដោតលើម៉ូតូ រថយន្តដឹកកម្មករ រថយន្តដឹកអ្នកដំណើរទូទៅ និងរថយន្តដឹកទំនិញ។ ត្រួតពិនិត្យកន្លែងបង្រៀនបើកបរ យានដ្ឋានកែច្នៃយានយន្ត និងការគ្រប់គ្រងទិន្នន័យ។ ចាត់វិធានការណ៍រៀបចំសណ្ដាប់ធ្នាប់តាមដងផ្លូវ ទីប្រជុំជន សាលារៀន និងរៀបចំចំណតរយន្តដឹកអ្នកដំណើរ ដឹកទំនិញ និងដឹកកម្មករឲ្យមានរបៀបរៀបរយ។

ជាការកត់សម្គាល់ ការអនុវត្តច្បាប់ស្ដីពីចរាចរណ៍ផ្លូវគោក ចាប់ពីឆ្នាំ២០១៦ដល់ឆ្នាំ២០១៨ បានជួយកាត់បន្ថយគ្រោះថ្នាក់ចរាចរណ៍នៅកម្ពុជា បានចំនួន ១៩៣១លើក កាត់បន្ថយអ្នកស្លាប់ ៧០៦នាក់ និងកាត់បន្ថយអ្នករងរបួសបានចំនួន ៤៥៣១នាក់។ ជាក់ស្ដែងនៅឆ្នាំ២០១៨ គ្រោះថ្នាក់ចរាចរណ៍បានថយចុះចំនួន២៦៤លើក ខណៈអ្នកស្លាប់ថយចុះចំនួន១៩នាក់ និងអ្នករបួសថយចុះចំនួន៧៦៩នាក់ ។

របាយការណ៍គណៈកម្មាធិការជាតិសុវត្ថិភាពចរាចរណ៍ផ្លូវគោកឲ្យដឹងថា សណ្ដាប់ធ្នាប់ចរាចរណ៍នៅទីប្រជុំជន នៅតែមានការកកស្ទះ ដោយសារតែការលក់ដូរ ការចតយានយន្តល្មើសច្បាប់ ការប្រើប្រាស់ផ្លូវខុសច្បាប់ និងកំណើនយានយន្តខ្ពស់ក្នុងពេលតែមួយ។ ម្យ៉ាងទៀតអ្នកដំណើរនៅតែខ្លាចប៉ូលីសជាងច្បាប់ ទើបអត្រាគ្រោះថ្នាក់ចរាចរណ៍ចេះតែកើនឡើង ខណៈចំនួនយានយន្ត នៅឆ្នាំ២០១៨ បានកើនដល់ចំនួន៣០.៨៧ភាគរយ៕