អត្តពលិកកម្ពុជាបានទៅដល់ទីក្រុងឡុងដ៍ហើយដើម្បីចូលរួមប្រកួតកីឡាអូឡាំពិក
កីឡាករ កីឡាការិនីកម្ពុជា៤រូប បានចេញដំណើរទៅទីក្រុងឡុងដ៍ប្រទេសអង់គ្លេសហើយ កាលពីយប់ថ្ងៃទី២២កក្កដាម្សិលមិញ។ ការរៀបចំជូនដំណើរអត្តពលិកជម្រើសជាតិកម្ពុជាត្រូវបានរៀបចំយ៉ាងអ៊ឹកអធិកដោយគណៈកម្មាធិការជាតិអូឡាំពិកកម្ពុជា។ លោកថោង ខុន ប្រធានគណៈកម្មាធិការជាតិអូឡាំពិកកម្ពុជាបានថ្លែងចាត់ទុកកីឡាករជម្រើសជាតិទាំងនេះ ថាជាវីរជនកីឡារបស់ជាតិ។
ចុះផ្សាយនៅថ្ងៃ៖
ស្តាប់ - ០២:១១
កីឡាករ កីឡាការិនីហែលទឹក២នាក់ និងកីឡាករ កីឡាការិនីរត់ប្រណាំង២នាក់ដែរ បានចាកចេញពីកម្ពុជាហើយ កាលពីយប់ថ្ងៃអាទិត្យម្សិលមិញ។ អត្តពលិកទាំង៤រូប ដែលតំណាងអោយប្រជាជាតិកម្ពុជាត្រូវចូលរួមប្រកួតក្នុងកីឡាអូឡាំពិកលើកទី៣០ នៅក្នុងទីក្រុងឡុងដ៍ប្រទេសអង់គ្លេស។ ការប្រកួតនេះនឹងចាប់ផ្តើមបើកជាផ្លូវការនៅថ្ងៃទី២៧កក្កដានេះ។
តាមពិត កម្ពុជាមានអត្តពលិករបស់ខ្លួន៦រូបដែលត្រូវបានជ្រើសរើសអោយចូលរួមប្រកួតក្នុងកីឡាអូឡាំពិកនេះ ប៉ុន្តែ ២រូបទៀត ម្នាក់ជាកីឡាករយូដូ ដែលកំពុងហាត់រៀននៅប្រទេសបារាំង បានចាកចេញឆ្ពោះទៅទីក្រុងឡុងដ៍ដោយផ្ទាល់តែម្តង និងមួយរូបទៀត ជាកីឡាការិនីវិញ្ញាសារតៃក្វាន់ដូកំពុងតែហ្វឹកហាត់នៅក្នុងទីក្រុងឡុងដ៍នោះរួចស្រាប់ហើយ។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានមានប្រាប់អោយដឹងថា “អត្តពលិកព្រមទាំងប្រតិភូ បានទៅដល់ភូមិកីឡា នៅក្នុងទីក្រុងឡុងដ៍រួចរាល់អស់ហើយ។ នៅថ្ងៃដំបូង អត្តពលិករបស់កម្ពុជាមិនទាន់ធ្វើការហ្វឹកហាត់អ្វីទេ ពោលគឺ ពួកគេត្រូវសម្រាកយកកម្លាំងដែលបាត់បង់ក្នុងពេលធ្វើដំណើរ។ បន្ទាប់មកពួកគេនឹងត្រូវហាត់ ដើម្បីត្រៀមចូលរួមព្យុហយាត្រា នាថ្ងៃបើកពិធីនៅថ្ងៃទី២៧កក្កដា”។
អត្តពលិក និងប្រតិភូ ត្រូវបានលោកថោង ខុន ប្រធានគណៈកម្មាធិការជាតិអូឡាំពិកកម្ពុជាជូនដំណើរដល់ជណ្តើរយន្តហោះ បន្ទាប់ពីពួកគេបានដើរលើកម្រាលព្រំក្រហមមិនធ្លាប់មានកាលពីមុនក្នុងប្រវត្តិកីឡាកម្ពុជា។
មុនពេលចេញដំណើរបន្តិច លោក ថោង ខុន បានផ្តល់ការណែនាំដល់កីឡាករ កីឡាការិនីកម្ពុជាអោយចេះរក្សាកម្លាំងចិត្ត ស្មារតីប្រយុទ្ធ ដើម្បីប្រសិទ្ធិភាពនៃការប្រកួត។ លើសពីនេះទៀត គឺការរក្សាសេចក្តីថ្លៃថ្នូរ និងកិត្តិយស ដើម្បីប្រទេសជាតិ។ សម្រាប់លោកថោង ខុន ពលរដ្ឋកម្ពុជាជាង១៤លាននាក់បានផ្ញើសេចក្តីទុកចិត្តលើអត្តពលិកជម្រើសជាតិទាំង៦រូបនេះ ហើយអត្តពលិកជម្រើសទាំង៦រូប គឺជាវីរជនកីឡាកម្ពុជា។
សូមបញ្ជាក់ថា កម្ពុជាបានទទួលសិទ្ធិអនុគ្រោះ ដើម្បីអាចចូលប្រកួតក្នុងកីឡាអូឡាំពិកនេះដោយមិនចាំបាច់ប្រកួតជម្រុះក្នុងថ្នាក់តំបន់ឡើយ។ គណៈកម្មាធិការជាតិអូឡាំពិកកម្ពុជាបានព្យាយាមរៀបចំព្រឹត្តិការណ៍ជាច្រើន ដើម្បីស្វែងរកការឧបត្ថម្ភ និងការលើកទឹកចិត្តដល់អត្តពលិកកម្ពុជា មុននឹងពួកគេចេញទៅទីក្រុងឡុងដ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ