ក្រុមអ្នកភូមិបឹងកក់ បន្តសកម្មភាពរារាំងអាជ្ញាធរ មិនឲ្យសាងសង់ស្នាក់ការកងរាជអាវុធហត្ថលើដីទំនាស់
តាំងពីរសៀលថ្ងៃសៅរ៍ម្សិលមិញ ក្រុមអ្នកភូមិបឹងកក់ ដឹកនាំដោយលោកស្រី ទេព វន្នី បាន និងកំពុងបន្តចេញមុខប្រឆាំងនឹងកងកម្លាំងសន្តិសុខជាច្រើននាក់ ដែលបានចុះមកការពារដីមួយកន្លែង សម្រាប់សាងសង់ទីស្នាក់ការកងរាជអាវុធហត្ថ នៅភូមិ២២ ក្នុងតំបន់បឹងកក់។ ក្នុងការប្រឈមមុខគ្នាកាលពីម្សិលមិញ អ្នកភូមិមួយក្រុមទៀត បានចេញមុខគាំទ្រការសាងសង់ ដែលបណ្ដាលឲ្យមានការប៉ះទង្គិចគ្នា រហូតដល់មានអ្នករបួសថែមទៀតផង។ នៅថ្ងៃអាទិត្យនេះ ក្រុមអ្នកភូមិគាំទ្រលោកស្រី ទេព វន្នី បានអះអាងថា ខ្លួនកំពុងតែបន្តជួបជុំគ្នានៅទីតាំងជម្លោះនោះដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
នៅថ្ងៃអាទិត្យ ទី២៩មិថុនានេះ ក្រុមអ្នកភូមិបឹងកក់ ដឹកនាំដោយលោកស្រីទេព វន្នី នៅតែបន្តជួបជុំនៅទីតាំងដីមួយកន្លែង ស្ថិតនៅភូមិ២២ ក្នុងតំបន់បឹងកក់ សង្កាត់ស្រះចក ខណ្ឌដូនពេញ។ ការជួបជុំនេះ ធ្វើឡើងនៅទីតាំងដីមួយកន្លែង ដែលមានជម្លោះ និងដែលកងកម្លាំងសមត្ថកិច្ច ព្រមទាំងកងកម្លាំងសន្តិសុខ បានចុះមកការពារ ដើម្បីសាងសង់ទីស្នាក់ការកងរាជអាវុធហត្ថ។
សកម្មជនដីធ្លីតំបន់បឹងកក់ កញ្ញាសុង ស្រីលាភ មានប្រសាសន៍ប្រាប់វិទ្យុបារាំងអន្ដរជាតិ នៅព្រឹកថ្ងៃអាទិត្យ ទី២៩មិថុនានេះថា ដីជម្លោះ ដែលអាជ្ញាធរមានបំណងសាងសង់ទីស្នាក់ការកងរាជអាវុធហត្ថនេះ ស្ថិតនៅក្នុងចំណោមដីជម្លោះ ដែលនៅមិនទាន់ទទួលបានសំណង។ កញ្ញាបន្តថា ការសាងសង់អគារ ឬទីស្នាក់ការ នៅលើដីទំនាស់នេះ គឺមិនអាចធ្វើទៅរួចទេ ល្គឹកណាមានការដោះស្រាយរួចរាល់ជាមុនសិន។ ហើយថា ក្រុមកញ្ញា នឹងនៅតែបន្តការរារាំង មិនឲ្យមានការសាងសង់អគារណាមួយនៅលើដីទំនាស់នេះឡើយ។
នៅព្រឹកថ្ងៃអាទិត្យនេះ បើតាមកញ្ញាសុង ស្រីលាភ មានលេចមុខក្រុមអ្នកភូមិដែលគាំទ្រការសាងសង់ស្នាក់ការកងរាជអាវុធហត្ថ បង្កឲ្យមានការប្រឈមមុខដាក់គ្នាជាពាក្យសម្ដី ជាមួយក្រុមអ្នកភូមិបឹងកក់គាំទ្រលោកស្រីទេព វន្នី ដែលប្រឆាំងមិនឲ្យមានការសាងសង់ទីស្នាក់ការលើដីជម្លោះ។
សូមជម្រាបជូនថា សកម្មភាពរបស់ក្រុមអ្នកភូមិបឹងកក់ ដឹកនាំដោយលោកស្រី ទេព វន្នី រារាំងអាជ្ញាធរ មិនឲ្យសាងសង់ស្នាក់ការនៅលើដីទំនាស់នេះ បានកើតមានឡើងតាំងពីរសៀលថ្ងៃសៅរ៍ ទី២៨មិថុនាមកម្ល៉េះ។ ក្នុងការប្រឈមមុខដាក់គ្នានោះ អ្នកភូមិមួយក្រុមទៀត បានចេញមុខគាំទ្រការសាងសង់ រហូតដល់មានការប៉ះទង្គិចគ្នាថែមទៀតផង។
ស្ដ្រីបឹងកក់ វ័យ៧០ឆ្នាំម្នាក់ រងរបួសបែកក្បាល ដោយសារតែមានការគប់ដុំថ្ម មកលើក្រុមអ្នកភូមិដែលប្រឆាំងជំទាស់នឹងវត្តមានកងកម្លាំងមានសមត្ថកិច្ច។ ក្រោយពេលផ្ទុះអំពើហិង្សាគប់ដុំថ្មនោះ ជនរងគ្រោះ ត្រូវបានអ្នកភូមិបញ្ជូនទៅដាក់ពាក្យបណ្ដឹង នៅប៉ុស្តិ៍នគរបាលខណ្ឌស្រះចក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ