សកម្មជនការពារព្រៃឈើរម្លឹកខួប២ឆ្នាំនៃការស្លាប់របស់លោក ឈុត វុទ្ធី
សកម្មជនការពារព្រៃឈើ និងព្រះសង្ឈមកពីខេត្តចំនួន៦ នឹងជួបជុំគ្នានៅស្រុកមណ្ឌលសីមា ត្រង់ចំណុចវាលបីដែលជាទីតាំងនៃការបាញ់សម្លាប់លោក ឈុត វុទ្ធីសកម្មជនការពារព្រៃឈើយ៉ាងសកម្មនៅប្រទេសកម្ពុជា។ គឺជាគម្រោងជួបជុំគ្នានៅថ្ងៃទី២៦ មេសាស្អែកនេះ ដើម្បីប្រារព្ឋខួបពីឆ្នាំនៃការបាញ់សម្លាប់។ ពិធីសាសនា និងកាដង្ហែក្បួន គឺនឹងគ្រោងធ្វើឡើងផងដែរ។ កូនប្រុស លោក ឈុត វុទ្ធី នៅតែអះអាងថា ការស្លាប់របស់ឪពុក គឺជាការបាត់បង់ធនធានមនុស្សដ៏មានសក្តានុពល និងបាត់បង់វីរៈជនជាតិពិតប្រាកដ។
ចុះផ្សាយនៅថ្ងៃ៖
ស្តាប់ - ០១:៥៦
សកម្មជនការពារព្រៃឈើ និងព្រះសង្ឈប្រមាណជា១០០នាក់ដែលរួមមានទាំងព្រះសង្ឃ នឹងរៀបចំប្រារព្ឋខួបពីឆ្នាំនៃការស្លាប់របស់លោក ឈុត វុទ្ធីនៅទីតាំងស្លាប់តែម្តង។ នេះបើតាមការបញ្ជាក់របស់លោក ឈឹម សាវុធ នាយកប្រតិបត្តិអង្គការការពារធនធានធម្មជាតិ នៅថ្ងៃសុក្រនេះ។ លោកបន្តថា សកម្មជនការពាព្រៃឈើ រួមទាំងព្រះសង្ឃដែលមកពីខេត្តចំនួន៦បានធ្វើដំណើរចេញពីទីតាំងរៀងខ្លួនឆ្ពោះទៅកន្លែងដែលលោកឈុត វុទ្ធីត្រូវបានគេបាញ់សម្លាប់។
ប្រធានអង្គការូបនេះ បានឱ្យដឹងថាក្នុងថ្ងៃរំលឹកខួបស្អែកនេះ អ្នកចូលរួមទាំងអស់នឹងដើរដង្ហែក្បួន រួមទាំងស្រែកច្រៀងចម្រៀងរំលឹកពីសកម្មភាពរបស់គាត់ក្នុងការពារព្រៃឈើផងដែរ។ ក្រៅពីនោះពិធីសាសនាក៏នឹងត្រូវបានធ្វើឡើងផងដែរ។
សូមបញ្ជាក់ថា លោក ឈុត វុទ្ធី ដែលជាប្រធានអង្គការការពារធនធានធម្មជាតិដ៏ល្បីល្បាញក្នុងព្រះរាជាណាចក្រកម្ពុជា ត្រូវបានគេបាញ់សម្លាប់កាលពីថ្ងៃទី២៦ មេសា ឆ្នាំ២០១២កន្លងទៅ នៅត្រង់ចំណុចវាលបី ក្នុងស្រុកមណ្ឌលសីមា ខេត្តកោះកុងខណៈដែលលោកចុះទៅស៊ើបអង្កេត និងថតរូបសកម្មភាពបទល្មើលព្រៃឈើខុសច្បាប់នៅតំបន់ព្រៃជួរភ្នំក្រវាញ។ ភ្លាមៗក្រោយមរណភាពនោះ រដ្ឋាភិបាលបានបង្កើតក្រុមគណៈកម្មការស៊ើបអង្កេត ហើយ សាលាដំបូងខេត្តកោះកុងបានជម្រះក្តីសំណុំរឿងនេះ ជារឿងក្តីមនុស្សឃាតដោយអចេតនា។
លោក ឈឹម សាវុធ បានរំលឹកថា ការបាត់បង់វីរៈជនការពារព្រៃឈើ លោក ឈុត វុទ្ធីនេះ គឺហាក់ដូចជាការបាត់បង់ដៃម្ខាងរបស់លោកយ៉ាងដូច្នោះដែរ។ យ៉ាងណាក៏ដោយ កូនប្រុសលោកឈុត វុទ្ធី គឺលោក ឆឺយ ឧត្តមរស្មី ដែលបានប្រកាសខ្លួនថាជាអ្នកចង់បន្តវេនការងាររបស់ឪពុកនោះ បានលើកឡើងថា ការប្រារព្ឋខួបរបស់ឪពុកនេះ គឺជាការរំលឹកពីវីរៈភាព និងការលើកកម្ពស់ឱ្យមានការពារព្រៃឈើឡើងវិញ។ ព្រៃឈើនៅកម្ពុជា ដែលអង្គការការពារធនធានធម្មជាតិបានអះអាងគឺកំពុងស្ថិតនៅក្នុងដំណាក់ចុងក្រោយនៃការសាបសូន្យ។ ដូចនេះ លោក ឈឹម សាវុធ សូមអំពាវនាវឱ្យមានវិធានការទប់ស្កាត់ជាបន្ទាន់ និងមានប្រសិទ្ធភាពបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ