ប្រធានបក្សសង្គ្រោះជាតិប្រកាសចូលរួមវេទិកាសាធារណៈរបស់សហជីពនៅទីលានប្រជាធិបតេយ្យ
ប្រធានគណបក្សសង្គ្រោះជាតិ លោក សម រង្ស៊ី និងលោក កឹម សុខា ប្រកាសចូលរួមវេទិកាសាធារណៈរបស់ក្រុមសហជីពដែលគ្រោងប្រមូលផ្តុំនៅទីលានប្រជាធិបតេយ្យនៅថ្ងៃសៅរ៍ទី៨ មីនាស្អែកនេះ។ រដ្ឋាភិបាលបានប្រកាសមិនអនុញ្ញាតឱ្យមានការប្រមូលផ្តុំនោះទេ ប៉ុន្តែអនុញ្ញាតឱ្យធ្វើនៅទីតាំងផ្ទាល់ខ្លួនជំនួសវិញ។ រដ្ឋាភិបាលបានអះអាងថា ការមិនអនុញ្ញាតនេះ គឺដើម្បីបញ្ហាសន្តិសុខ។
ចុះផ្សាយនៅថ្ងៃ៖
ស្តាប់ - ០៣:១៩
លោក សម រង្ស៊ី និងលោក កឹម សុខា ប្រធានគណបក្សសង្គ្រោះជាតិ បញ្ជាក់ពីវត្តមានចូលរួមវេទិកាសាធារណៈរបស់ក្រុមសហជីពកម្មករនៅថ្ងៃ៨មីនា ដែលជាថ្ងៃសិទ្ធិនារីអន្តរជាតិស្អែកនេះ។ ការប្រកាសនេះគឺតបតាមការអញ្ជើញរបស់ក្រុមសហជីពកម្មករ ដែលបានដាក់លិខិតអញ្ជើញទាំងរដ្ឋាភិបាល និងបក្សប្រឆាំងឱ្យចូលរួមវេទិការសាធារណៈរបស់ខ្លួន។ ជាវេទិការដែលធ្វើឡើងនៅទីលានប្រជាធិបតេយ្យ ដើម្បីទាមទារឱ្យរដ្ឋាភិបាលពន្យល់ពីការចាប់ខ្លួនសកម្មជនសិទ្ធមនុស្ស និងកម្មករទាំង២៣ នាក់ រួមទាំងគោលជំហរនៃការដំឡើងប្រាក់ឈ្នួលគោលអប្បរមាផងដែរ។
ថ្លែងទៅកាន់អ្នកសារព័ត៌មានក្នុងពេលសម្រាកនៃសិក្ខាសាលាស្តីពីក្របខ័ណ្ឌកំណែទម្រង់កិច្ចការបោះឆ្នោត ដែលរៀបចំឡើងដោយគណបក្សសង្គ្រោះជាតិ នៅក្នុងសណ្ឋាគារ អ៊ឹមផឺរៀលក្នុងក្រុងភ្នំពេញ លោក កឹម សុខា អនុប្រធានគណបក្សសង្គ្រោះជាតិ បានអះអាងថាក្នុងនាមជាអ្នកនយោបាយ និងជាតំណាងរាស្ត្រ ការស្តាប់មតិប្រជាពលរដ្ឋគឺជាកត្តាសំខាន់។ សំខាន់ព្រោះថាអាចបង្ហាញពីគោលនយោបាយរបស់គណបក្សទៅកាន់ពលរដ្ឋដែលជាម្ចាស់ឆ្នោត និង អាចយកមតិពលរដ្ឋជាគោលនយោបាយ ក្នុងនាមជាប្រទេសប្រកាន់របស់ប្រជាធិបតេយ្យ។
សូមរំលឹកឱ្យដឹងបន្ថែមដែរថា នៅព្រឹកថ្ងៃសុក្រនេះ ប្រធានគណបក្សសង្គ្រោះជាតិ លោក សម រង្ស៊ី និងលោក កឹម សុខា បានបង្កើតវេទិកាដើម្បីស្នើសុំយោបល់ អង្គការសង្គមស៊ីវិល ដែលធ្វើការងារទាក់ទងនឹងការបោះឆ្នោតនៅកម្ពុជា។ វេទិកាកាលពីព្រឹកមិញបានពិភាក្សាលើចំណុចចំនួនពីរ គឺការរៀបចំបញ្ជីអ្នកបោះឆ្នោត និងច្បាប់ហិរញ្ញវត្ថុរបស់គណបក្សនយោបាយ ដែលចំណុចទាំងពីរនេះ គណបក្សប្រជាជន និងគណបក្សសង្គ្រោះជាតិ បានឯកភាពគ្នា ក្នុងក្របខ័ណ្ឌកំណែទម្រង់កាបោះឆ្នោត។ ហើយការពិភាក្សានេះ គឺធ្វើឡើងនៅមុនពេលដែលគណបក្សដែលកំពុងមានជម្លោះទាំងពីរនឹងត្រូវជួបគ្នាសារជាថ្មីម្តងទៀតនៅថ្ងៃចន្ទទី១០ មីនាដើមសប្តាហ៍ក្រោយ។
ការប្រកាសពីវត្តមានចូលរួមក្នុងវេទិកាសាធារណៈរបស់ប្រធានគណបក្សប្រឆាំងជាមួយក្រុមសហជីពដែលគ្រោងឱ្យមានមនុស្សចូលរួមប្រមាណ៣ម៉ឺននាក់ នៅទីលានប្រជាធិបតេយ្យនោះ រដ្ឋាភិបាល តាមរយៈលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានបញ្ជាក់សាជាថ្មីថា គ្មានឡើយការអនុញ្ញាតឱ្យមានកាប្រមូលផ្តុំជួបជុំគ្នានៅទីលានប្រជាធិបតេយ្យ ឬ ជាការដង្ហែក្បួនតាមដងផ្លូវនោះទេ។
យ៉ាងណាក៏ដោយ ក្រោយការប្រកាសជំហរផ្សេងគ្នារវាងមេបក្សប្រឆាំង ក្រុមសហជីព រួមទាំងរដ្ឋាភិបាលស្តីពីការប្រមូលផ្តុំគ្នានៅទីលានប្រជាធិបតេយ្យនៅថ្ងៃ៨ មីនា ដែលជាថ្ងៃសិទ្ធិនារីនោះ នឹងអាចមានភាពតានតឹងប្រឈមដាក់គ្នារវាងកងកម្លាំង នឹងអ្នកចូលរួមវេទិកាសាធារណៈឬយ៉ាងណា!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ