CMAC៖ កម្ពុជាឈឺចាប់ពីរដង ដោយសារករណីទម្លាក់គ្រាប់បែកពីអាមេរិក
ប្រជាពលរដ្ឋកម្ពុជារងទុក្ខពីរដងក្នុងករណីទម្លាក់គ្រាប់បែក ដែលធ្វើឡើងដោយអាមេរិក កាលពីសម័យសង្រ្គាមវៀតណាម។ នេះបើតាមប្រធានមជ្ឈមណ្ឌលសកម្មភាពកម្ចាត់មីនកម្ពុជា(CMAC) ក្រោយពេលដែលលោកអូបាម៉ា ប្រធានាធិបតីអាមេរិកផ្តល់ជំនួយ៩០លានដុល្លារអាមេរិកដល់ប្រទេសឡាវ ដើម្បីដោះគ្រាប់មិនទាន់ផ្ទុះដែលអាមេរិកទម្លាក់។
ចុះផ្សាយនៅថ្ងៃ៖
ស្តាប់ - ០២:៣១
លោកហេង រតនា នាយកមជ្ឈមណ្ឌលសកម្មភាពកម្ចាត់មីនកម្ពុជា បានសរសេរក្នងទំព័រហ្វេសប៊ុករបស់លោកកាលពីថ្ងៃទី០៦ ខែកញ្ញាថា ប្រជាពលរដ្ឋកម្ពុជារងទុក្ខ និងឈឺចាប់ចំនួន២ដង ពីសហរដ្ឋអាមេរិក ករណីទម្លាក់គ្រាប់បែកនៅកម្ពុជាក្នុងអំឡុងសង្គ្រាមវៀតណាម។
ក្នុងសំណេរនោះបានលំអិតពីចំណុចទាំង២ថា “ភាពឈឺចាប់លើកទី១គឺដោយសារអាមេរិកទម្លាក់គ្រាប់បែកជិត៣លានតោន គ្រាប់បែកចង្កោមជិត៣០លានគ្រាប់ គ្រាប់បែកគីមី CSជាដើម។ល។ ... ទី២គឺ នៅពេលដែលអាមេរិកដឹងខ្លួននឹងទទួលស្គាលការពិតក្នុងសង្គ្រាមនៅឥណ្ឌូចិន...ខាងប្រទេសវៀតណាម និងឡាវបានទទួលជំនួយកើនឡើងរហូតដល់ជិត១០០លានក្នុងរយះពេល៣ឆ្នាំ ដើម្បីជាការដោះស្រាយស្រាយបញ្ហាធានាសុខសុវតិ្ថភាពដល់ប្រជាជនរបស់ខ្លួន តែកម្ពុជាទទួលបានតិចតួចប៉ុណ្ណោះ!”
សំណេររបស់លោកហេង រតនា គឺជាសារប្រតិតកម្មភ្លាមៗ ទៅនឹងលុយជំនួយ ដែលលោកប្រធានាធិបតីអាមេរិកបានផ្តល់ទៅឲ្យប្រទេសឡាវកាលពីថ្ងៃទី០៦ ខែកញ្ញា្ ចំនួន៩០លានដុល្លារអាមេរិកសម្រាប់ដោះគ្រាប់មិនទាន់ផ្ទុះ ដែលអាមេរិកទម្លាក់។
ប្រធានCMAC រូបនេះបានសរសេរទៀតថា “កាកសំណល់សង្គ្រាមរបស់អាមេរិកទាំងនេះបន្តសម្លាប់និងធ្វើឲ្យរបួសប្រជាជនស្លូតត្រង់កម្ពុជាយ៉ាងអយុតិ្តធម៌បំផុត! ...តើមានមូលហេតុអ្វីដែលអាមេរិករំលោភសិទិ្ធប្រជាជនកម្ពុជាម្តងជាពីរដង បែបនេះ?”
នៅថ្ងៃទី១០ ខែកញ្ញា វិទ្យុបារាំងអន្តរជាតិមិនអាចទាក់ទងសុំការបំភ្លឺណាមួយពីស្ថានទូតអាមេរិកប្រចាំនៅ កម្ពុជាបានទេ។ ប៉ុន្តែបើតាមប្រភពព័ត៌មានពីCMACបានឲ្យដឹងថា សហរដ្ឋអាមេរិក គឺជាប្រទេសផ្តល់ជំនួយធំទី២ ដើម្បីការដោះមីនក្នុងប្រទេសកម្ពុជា ចំណែកឯជប៉ុនជាប្រទេសមួយនាំមុខក្នុងការផ្ដល់ជំនួយដោះមីន ហើយក្រៅពីនោះមានប្រទេសអាឡឺម៉ង់ជាដើម។ កាលពីឆ្នាំ២០១៤កន្លងទៅ សហរដ្ឋអាមេរិកក៏បានប្រកាសបន្ថែមជំនួយរបស់ខ្លួនពី១លានដុល្លារអាមេរិក ក្នុងមួយឆ្នាំទៅ២.៦លានដុល្លារអាមេរិកក្នុងមួយឆ្នាំ។
លោក ហេង រតនា ធ្លាប់បានថ្លែងប្រាប់វិទ្យុបារាំងអន្តរជាតិថា នៅក្នុងឆ្នាំ២០១៦នេះ ភ្នាក់ងារបរទេសមួយចំនួន បានកាត់បន្ថយជំនួយផ្នែកថវិកានៅក្នុង វិស័យដោះមីនរបស់កម្ពុជា ដោយសារតែស្ថានការណ៍ពិភពលោក និងគោលនយោបាយរបស់ប្រទេសខ្លះមានការប្រែប្រួល។ ចំពោះឆ្នាំ២០១៦នេះ កម្ពុជាបានទទួលជំនួយតែ២២លានដុលា្លរអាមេរិកតែប៉ុណ្ណោះ។
យោងតាមអាជ្ញាធរមីនកម្ពុជាបានឲ្យដឹងថា កម្ពុជាត្រូវការទឹកប្រាក់ប្រមាណ៤៥៥លានដុល្លារអាមេរិក ដើម្បីសំអាតគ្រាប់មិនទាន់ផ្ទុះរហូតដល់ឆ្នាំ២០១៩។ ដោយឡែកក្នុងរយៈពេល៧ខែក្នុងឆ្នាំ២០១៦នេះ មានមនុស្សស្លាប់ និងរបួសដោយសារគ្រប់មីនចំនួន ៥៩ នាក់។ ហើយផ្ទៃដីដែលនៅសេសសល់ទាំងគ្រាប់មីននិងយុទ្ធភណ្ឌមិនទាន់ផ្ទុះមានចំនួនជាង ២ពាន់ម៉ែត្រក្រឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ