សហគមន៍អន្តរជាតិអំពាវនាវឲ្យបញ្ឈប់អំពើហិង្សាហើយវិលចូលតុចរចាវិញ
បន្ទាប់ពីការចោទប្រកាន់និងឃុំខ្លួនអ្នកតំណាងរាស្ត្រ៥នាក់និងសកម្មជនម្នាក់របស់បក្សប្រឆាំងកាលពីថ្ងៃពុធដោយតុលាការរាជធានីភ្នំពេញ ប្រតិកម្មបានធ្លាក់មកជាបន្តបន្ទាប់។ លោក សូរិយា ប្រាសាទ ស៊ូប៊ែឌី អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជាក៏ដូចជាស្ថានទូតបរទេសមួយចំនួនដែរបានអំពាវនាវឲ្យភាគីទាំងពីរបញ្ឈប់អំពើហិង្សា និងវិលចូលតុចរចាដើម្បីបញ្ចប់វិបត្តិនយោបាយ។
ចុះផ្សាយនៅថ្ងៃ៖
ស្តាប់ - ០២:០៥
អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា លោក សូរិយា ប្រាសាទ ស៊ូប៊ែឌី បានអំពាវនាវឲ្យគ្រប់ភាគីជម្លោះនៅកម្ពុជារក្សាភាពស្ងៀមស្ងាត់និងការអត់ធ្មត់។ លោកក៏បានអំពាវនាវឲ្យអាជ្ញាធររដ្ឋាភិបាលកម្ពុជាបញ្ឈប់ការរារាំងបាតុកម្មនិងបើកទីលានប្រជាធិបតេយ្យឡើងវិញ។
នៅក្នុងសេចក្តីថ្លែងការណ៍ពីទីក្រុងហ្សឺណែវកាលពីល្ងាចថ្ងៃពុធ លោក ស៊ូប៊ែឌី បានកត់សម្គាល់ថា ការរឹតបន្តឹងសេរីភាពតាមបែបប្រជាធិបតេយ្យនៅកម្ពុជាចាប់តាំងពីដើមខែមករាមកនោះបានផ្តល់ផលវិបាកអវិជ្ជមានដល់ការគោរពសិទ្ធិមនុស្សនៅក្នុងប្រទេសនេះ។ លោកបានអំពាវនាវឲ្យរដ្ឋាភិបាលកម្ពុជាត្រូវធានាឲ្យមានសិទ្ធិជួបជុំគ្នាដោយសន្តិវិធីរបស់ប្រជាពលរដ្ឋគ្រប់គ្នា និងក៏អំពាវនាវឲ្យអ្នកធ្វើបាតុកម្មចៀសវាងអំពើហិង្សាផងដែរ។
ចំណែកស្ថានទូតអាមេរិកប្រចាំកម្ពុជាក៏បានថ្លែងថ្កោលទោសអំពើហិង្សាកាលពីថ្ងៃទី១៥កក្កដា។ តាមរយៈសារអេឡិចត្រូនិកមកកាន់វិទ្យុបារាំងអន្តរជាតិនៅថ្ងៃព្រហស្បតិ៍នេះ អ្នកនាំពាក្យស្ថានទូតអាមេរិកប្រចាំទីក្រុងភ្នំពេញ លោក John Simmon បានបញ្ជាក់ថា មានតែការចរចាគ្នាដោយសន្តិវិធីទេដែលអាចដោះស្រាយវិបត្តិនយោបាយបច្ចុប្បន្នបាន។ ស្ថានទូតអាមេរិកក៏បានអំពាវនាវឲ្យដោះលែងតំណាងរាស្ត្រគណបក្សប្រឆាំងទាំង៥រូបនិងសកម្មជនមួយរូបដែលកំពុងជាប់មន្ទីរឃុំឃាំងផងដែរ។ ស្ថានទូតអាមេរិកអះអាងថានឹងផ្តល់សេវាពិគ្រោះយោបល់ដល់លោកស្រី មួរ សុខហួរ ផងដែរពីព្រោះលោកស្រីមានសញ្ជាតិអាមេរិកកាំង។
ស្ថានទូតបារាំងប្រចាំកម្ពុជាក៏បានសម្តែងការសោកស្តាយចំពោះអ្វីដែលបានកើតឡើងកាលពីថ្ងៃទី១៥កក្កដាផងដែរ។ ប្រឈមមុខនឹងបញ្ហានេះ ស្ថានទូតបារាំងក៏បានបញ្ជាក់ឡើងវិញអំពីការយកចិត្តទុកដាក់របស់ខ្លួនចំពោះសេរីភាពសម្តែងមតិ និងការធ្វើបាតុកម្មដោយសន្តិវិធី។ ឆ្លើយតបនឹងសំណួររបស់វិទ្យុបារាំងអន្តរជាតិ លោក Nicolas Baudouin លេខាទី១នៃស្ថានទូតបារាំងបានបញ្ជាក់ថា ស្ថានទូតបារាំងសង្កត់ធ្ងន់លើសារសំខាន់ ដែលភាគីទាំងពីរត្រូវវិលទៅរកការចរចាវិញទើបអាចទទួលបានដំណោះស្រាយនយោបាយមួយប្រកបដោយនិរន្តរភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ