មានការប្រគុំតន្ត្រីអន្តរជាតិធំៗពីរនៅប្រាសាទអង្គរវត្ត
ក្នុងឱកាសរំលឹកខួបទី ៦០នៃចំណងមិត្តភាពកម្ពុជា-ជប៉ុន ស្ថានទូតជប៉ុននៅកម្ពុជាបានរៀបចំការប្រគំតន្ត្រីមួយ នៅប្រាសាទអង្គរវត្ត នៅយប់ថ្ងៃទី៤ធ្នូនេះ ។ ជាការប្រគំតន្ត្រី ដែលមានការចូលរួម ពីក្រុមតន្ត្រីករ ដ៏ល្បីរបស់ប្រទេសជប៉ុន វៀតណាម ឥណ្ឌូនេស៊ី ថៃ សិង្ហបុរី និងកម្ពុជា។ នៅថ្ងៃទី៥ធ្នូ ក៏មានការប្រគុំតន្ត្រីអន្តរជាតិមួយទៀតឈ្មោះថា Fondementus ដែលមានការចូលរួមពីសិល្បៈករ បារាំង កម្ពុជា និងមីយ៉ាន់ម៉ា នៅចំកណ្តាលប្រាសាទអង្គរវត្តតែម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
ក្រុមតន្ត្រីករ មកពីប្រទេសជប៉ុន វៀតណាម ឥណ្ឌូនេស៊ី ថៃ សងិ្ហបុរី និងកម្ពុជា ប្រមាណជា ៦ក្រុម នឹងមកប្រគំតន្ត្រី នៅវេទិកាមុខប្រាសាទអង្គរវត្ត នៅយប់ថ្ងៃពុធ ទី៤ធ្នូនេះ។ ជាការប្រគំតន្ត្រី ដើម្បីអបអរសាទរខួបគំរប់ ៦០ឆ្នាំ នៃចំណងមិត្តភាព រវាងកម្ពុជា និងជប៉ុន។ នេះបើតាមការឲ្យដឹងពីកញ្ញា អាត់ ចតុរា អ្នករៀបចំកម្មវិធីប្រគំតន្ត្រីនេះ។
តាមកញ្ញា អាត់ ចតុរា ការប្រគំតន្ត្រីនេះ មានឈ្មោះថា One Asia Concert។ ហើយការប្រគំតន្ត្រីនេះ នឹងមានការចូលរួមជាអធិបតីភាព ពីលោកឧបនាយករដ្ឋមន្ត្រី សុខ អាន និងតំណាងស្ថានទូតជប៉ុននៅកម្ពុជា។ កញ្ញា អាត់ ចតុរា បានបន្ថែមថា ការប្រគំតន្ត្រីនេះ មិនមានការលក់សំបុត្រនោះទេ ប៉ុន្តែក៏មិនមែនជាការបើកចំហឲ្យមានអ្នកចូលរួមទស្សនាដោយសេរីនោះដែរ។ មានអ្នកទស្សនា ជាអ្នកជំនួញ ជប៉ុន កម្ពុជា ប្រមាណជា ៦៥០នាក់ តែប៉ុណ្ណោះ ដែលត្រូវបានអញ្ជើញចូលរួម។
តាមការបញ្ជាក់ពីអ្នករៀបចំកម្មវិធី ការប្រគំតន្ត្រីប្រភេទនេះ គឺមានរយៈពេល ១០ឆ្នាំម្តង ហើយគេតែងតែប្រារព្ធធ្វើ នៅប្រាសាទអង្គរវត្ត ដែលជាសម្បត្តិវប្បធម៌ពិភពលោក។ កាលពីឆ្នាំ ២០០៣ ដែលជាខួបលើកទី ៥០នោះ ក៏មានការប្រគំតន្ត្រីបែបនេះផងដែរ។
ក្នុងខួបលើកទី ៦០ នៅឆ្នាំ ២០១៣នេះ នឹងមានការសម្តែងតន្ត្រីប្រភេទអូប៉េរ៉ា ពីក្រុមតន្ត្រីករទាំងនោះ ពីម៉ោង ៦ល្ងាច ដល់ម៉ោង ៨យប់។ ការរៀបចំតុបតែង ដាក់ភ្លើងពណ៌ចម្រុះ នៅបរិវេណវេទិកាប្រគំតន្ត្រី ក្នុងប្រាសាទអង្គរវត្ត គឺបានចាប់ផ្តើមតាំងពីថ្ងៃទី២៨ខែវិច្ឆិកាមកម្ល៉េះ។
សូមបញ្ជាក់ថា ក្រៅពីការប្រគុំតន្ត្រីមិត្តភាពកម្ពុជា-ជប៉ុន នៅប្រាសាទអង្គរវត្ត នៅថ្ងៃទី ៥ធ្នូ ក៏មានការប្រគុំតន្ត្រីអន្តរជាតិដ៏ធំ មួយទៀត ដែលមានឈ្មោះថា Fendementus នៅកណ្តាលប្រាសាទផងដែរ។ ការប្រគុំតន្ត្រី ដែលមានការសម្តែងពីក្រុមតន្ត្រី Klourous របស់បារាំង កម្ពុជា និងមីយ៉ាន់ម៉ា ក៏នឹងបើកឲ្យមានការចូលរួមទស្សនាដោយសេរីផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ