ជំនន់ទឹកភ្លៀងបន្តលិចផ្នែកខ្លះនៃទីក្រុង
ទឹកភ្លៀងនៅតែបន្តលិច តំបន់មួយចំនួនក្នុងខ័ណ្ឌសែនសុខរាជធានីភ្នំពេញ បង្កជាពាក្យពេជន៍នានាទាក់ទងទៅនឹងការមិនយកចិត្តទុកដាក់ពីសាលាក្រុង។ ក៏ប៉ុន្តែអាជ្ញាធរខ័ណ្ឌសែនសុខ ដែលរងការលិចលង់ខ្លាំងជាងគេ អះអាងថា កំពុងធ្វើការងារយ៉ាងសកម្មដើម្បីរិះរកវិធីរំដោះទឹកចេញពីទីក្រុង។
ចុះផ្សាយនៅថ្ងៃ៖
ស្តាប់ - ០១:៥៤
តំបន់មួយចំនួនជាពិសេសស្ថិតនៅភាគខាងលិចនៃទីក្រុងភ្នំពេញនៅតែបន្តរងការលិចលង់ដោយសារជំនន់ទឹកភ្លៀងដដែលនៅថ្ងៃព្រហស្បតិ៍នេះ បើទោះណាជាមិនមានភ្លៀងធ្លាក់ជាថ្មីក៏ដោយ។ ប្រជាជនដែលមានអាសយដ្ឋាននៅក្នុងតំបន់លិចលង់ទាំងនោះ នៅតែមានការលំបាកក្នុងការរស់នៅ ចរាចរនៅតែមានការកកស្ទះ ដោយយានយន្តបានប្រជ្រៀតទៅគគ្នា គេចពីទឹកជំនន់។
ប្រជាពលរដ្ឋដែលមានលំនៅស្ថាននៅក្នុងខ័ណ្ឌពោធិសែនជ័យ និងខ័ណ្ឌសែនសុខ រាជធានីភ្នំពេញបានឲ្យដឹងថាជំនន់ទឹកភ្លៀងដែលលិចលង់ផ្ទះសម្បែងនិងទ្រព្យសម្បត្តិរបស់ពួកគាត់នោះ មើលទៅហាក់ដូចជាស្រកតិចតួចបំផុត គឺប្រមាណជាកន្លះតឹកប៉ុណ្ណោះសម្រាប់រយៈពេលជិត ២ថ្ងៃ។
ឯម សុវណ្ណ ប្រជាពលរដ្ឋមួយរូបដែលផ្លូវនិងផ្ទះរបស់គេត្រូវទឹកលិចនៅក្នុងខ័ណ្ឌពោធិសែនជ័យ បានកត់សម្គាល់ថា អាជ្ញាធរអត់មានឆន្ទៈបូមទឹកចេញពីតំបន់លិចលង់បន្ទាប់ពីការបាត់បង់សម្លេងឆ្នោតដ៏ច្រើននៅក្នុងទីក្រុងភ្នំពេញ។ ម្យ៉ាងទៀតអាចនិយាយថាខ្វះថវិការក្នុងការទ្រទ្រង់ការជួយសង្គ្រោះ។ប្រព័ន្ធបង្ហូទឹករំដោះទឹកភ្លៀងមានទំហំតូចៗចោទជាបញ្ហា និងការកសាងហេដ្ឋារចនាសម្ព័ន្ធថ្មី មិនបានគិតគូដល់ផលប៉ះពាល់និងតម្លៃស្ថាបត្យកម្ម។តំបន់ស្តុកទឹកដូចជាបឹង ត្រពាំង។ល។និង។ល។ ត្រូវចាក់បំពេញដោយដី ជាមួយនឹងសំណង់គ្មានបទដា្ឋនត្រឹមត្រូវ។
មិនមានការពន្យល់ពីថ្នាក់ដឹកនាំ ក៏ដូចជាផ្នែកជំនាញនគររូបនីយកម្មរបស់លាក្រុងភ្នំពេញនោះទេ ក៏ប៉ូន្តែ លោក លី សាវ៉េត អភិបាលខ័ណ្ឌ សែន សុខ ដែលភូមិសាស្ត្រនោះទទួលរងការលិចលង់ដោយជំនន់ទឹកភ្លៀងខ្លាំងជាងគេ បានប្រាប់វិទ្យុបារាំង RFI ថា លោកកំពុងតែធ្វើការកាត់ផ្តាច់ផ្លូវលំចំនួន៦កន្លែង នៅក្នុងសង្កាត់ភ្នំពេញថ្មីនិងសង្កាត់ឃ្មួញ ដើម្បីឲ្យមានមុខទឹកហូរទៅកាន់ប្រឡាយមេឆ្ពោះទៅកាន់ម៉ាស៊ីនបូមទឹកនៅទំនប់កប់ស្រូវ។
លោកអភិបាលដែលបានបដិសេធការចោទប្រកាន់របស់ប្រជាពលរដ្ឋខាងលើ សង្ឃឹមថា
ឆ្នាំក្រោយបញ្ហាជំនន់ទឹកភ្លៀងនឹងអាចដោះស្រាយរួច ដោយសារតែក្រុងគ្រោងនតម្លើងម៉ាស៊ីនបូមទឹកថ្មីមួយទៀតនៅទំនប់កប់ស្រូវ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ