ផ្អាកបុណ្យអុំទូក៖ អ្នកភ្នំពេញសម្រុកទៅខេត្ត៦០ភាគរយ និង១០ភាគរយចេញទៅក្រៅ
នៅព្រឹកថ្ងៃអង្គារ៍ទី២៤វិច្ឆិកានេះ រាជធានីភ្នំពេញមានសភាព ស្ងប់ស្ងាត់ជាងសព្វមួយដងដោយសារតែរដ្ឋាភិបាលសម្រេចផ្អាកព្រះរាជពិធីបុណ្យអុំទូក។ អ្នកជំនាញក្នុងវិស័យទេសចរណ៍បានវាយតម្លៃជាបឋមថា ពលរដ្ឋរស់នៅរាជធានីភ្នំពេញ៦០ភាគរយ សម្រុកទៅកំសាន្តនៅខេត្ត និង១០ភាគរយ ទៀតចេញទៅកំសាន្តនៅក្រៅប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ទិដ្ឋភាពទូទៅនៅក្នុងរាជធានីភ្នំពេញ នៅព្រឹកថ្ងៃអង្គារ៍ ទី២៤វិច្ឆិកានេះ មានសភាពស្ងប់ស្ងាត់ជាងសព្វមួយដង ដោយសារតែអ្នករស់នៅធានីភ្នំពេញប្រមាណ៦០ភាគរយ បានសម្រុកទៅកំសាន្ត និងទៅស្រុកកំណើតនៅតាមបណ្ដាខេត្ត និងប្រមាណ១០ភាគរយទៀត ចេញទៅកំសាន្តនៅក្រៅប្រទេសក្នុងឱកាសឈប់សម្រាកចំនួនបីថ្ងៃនៃព្រះរាជពិធីបុណ្យអុំទូក។ នេះជាការវាយតម្លៃជំហានដំបូងក្នុងថ្ងៃទី១ នៃពិធីបុណ្យអុំទូក របស់លោក អាង គឹមអៀង ប្រធានសមាគមទីភ្នាក់ងារទេសចរណ៍កម្ពុជា។
ថ្លែងប្រាប់វិទ្យុបារាំងអន្តរជាតិRFI លោកអាង គឹមអៀង យល់ថាការផ្អាកព្រះរាជពិធីបុណ្យអុំទូកនៅភ្នំពេញ គឺជារឿងមួយល្អ ដើម្បីជៀសវាងការប្រមូលផ្ដុំនៅក្នុងក្រុង។ ម្យ៉ាងទៀតទាំងភ្ញៀវទេសចរជាតិនិងអន្តរជាតិ បានចាប់អារម្មណ៍ទៅទស្សនានៅតាមបណ្ដាខេត្តដែលមានរៀបចំពិធីបុណ្យអុំទូក។ លោកបន្តថា ទោះនៅភ្នំពេញ មិនរៀបចំពិធីបុណ្យអុំទូកជាផ្លូវការក៏ដោយ តែចំនួនភ្ញៀវទេសចរណ៍ជាតិ និងអន្តរជាតិទស្សនាក្រុងភ្នំពេញមិនមានការថយចុះទេ។
ទន្ទឹមនេះលោក ឡុង ឌីម៉ង់ អ្នកនាំពាក្យសាលារាជធានីភ្នំពេញឲ្យដឹងថា នៅម៉ោង៧យប់នេះនិងពីរយប់បន្ត មានការបាញ់កាំជ្រួចដូចរៀងរាល់ឆ្នាំ ដើម្បីចូលរួមអបអរសាទរព្រះរាជពិធីបុណ្យអុំទូក។ ជំនួសឲ្យការប្រណាំងទូកអាជ្ញាធរក្រុងភ្នំពេញ មានកម្មវិធីពិសេស២ គឺទី១ ការបណ្តែតគោមលើផ្ទៃជលសា ប្រមាណជា៥០០គោមនៅទន្លេចតុមុខ មុខព្រះបរមរាជវាំង និងទី២ គឺការបង្ហាញពីពិធីដាល់អំបុក អកអំបុក និងសំពះព្រះខែ នៅរមណីយដ្ឋានវត្តភ្នំ។ កម្មវិធីទាំងពីរនេះ នឹងធ្វើឡើងនៅថ្ងៃទី២៥ ខែវិច្ឆិកា ដែលជាថ្ងៃទី២ នៃព្រះរាជពិធីបុណ្យ។
ដោយឡែកទាក់ទងនឹងសកម្មភាពទូទៅនៅភ្នំពេញវិញឃើញថា ស្តង់លក់ផលិតផលនានា និងឆាកប្រគុំតន្ត្រីរបស់ស្ថានីយ៍ទូរទស្សន៍សម្រាប់ការកំសាន្តនៅពេលយប់បានតំឡើង និងរៀបចំទុកជាស្រេចដូចជា៖ នៅមុខវត្តបុទុមវត្តី កោះពេជ្រ ទីលានប្រជាធិបតេយ្យ ផ្សាររាត្រី និង រមណីយដ្ឋានវត្តភ្នំជាដើម។ ជាមួយគ្នានេះ បើក្រឡេកទៅមើលចរាចរណ៍វិញ ពុំមានភាពមមាញឹកទេ នៅតាមវិថីសំខាន់ៗដូចជា៖ ព្រះមុន្នីវង្ស ព្រះនរោត្តម និងមុខព្រះបរមរាជវាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ