កីឡាការិនី ស៊ន សៀវម៉ី បើកទំព័រប្រវត្តិសាស្ត្រថ្មីសម្រាប់កីឡាតេក្វាន់ដូនៅក្នុងព្រឹត្តការណ៍កីឡាអូឡាំពិក
កីឡាការិនី ស៊ន សៀវម៉ី បានបំបែកកំណត់ត្រាជាប្រវត្តិសាស្ត្រកីឡាតេក្វាន់ដូ របស់កម្ពុជាក្នុងរយៈពេល៦២ឆ្នាំមកនេះ ដោយដណ្ដើមបានមេដាយមាសក្នុងការប្រកួតវគ្គជម្រុះក្នុងតំបន់អាស៊ីនៅថ្ងៃទី១៦មេសា ម្សិលមិញ នៅទីក្រុងម៉ានីល ប្រទេសហ្វីលីពីន។ ការដណ្ដើមបានមេដាយមាសប្រភេទតេក្វាន់ដូរបស់ កីឡាការិនី ស៊ន សៀវម៉ី គឺជាការបើកផ្លូវនាំឲ្យរូបនាងឈានទៅប្រកួតជាផ្លូវការ ក្នុងព្រឹត្តការណ៍កីឡាអូឡាំពិក ហ្គេម ឆ្នាំ២០១៦ នៅប្រទេសប្រេស៊ីលនៅថ្ងៃទី៥ដល់២១ខែសីហាខាងមុខ។
ចុះផ្សាយនៅថ្ងៃ៖
ស្តាប់ - ០២:០៦
កាលពីយប់ថ្ងៃសៅរិ៍ កីឡាការិនី ស៊ន សៀវម៉ី វ័យ២១ឆ្នាំ ដណ្ដើមបានមេដាយមាសប្រភេទតេក្វាន់ដូ បន្ទាប់ពីនាងប្រកួតវគ្គជម្រុះនិងបានយកឈ្នះគូប្រគួតពីរប្រទេសគឺហ្វីលីពីនដែលជាម្ចាស់ផ្ទះ និងប្រទេសតាហ្ស៊ីគីស្ថាន(Tadjikistan) ដោយមាន៤២ប្រទេសនៅក្នុងទ្វីបអាស៊ីបានចូលរួម។
សូមជម្រាបជូនថា នេះ គឺជាព្រឹត្តការណ៍ប្រវត្តិសាស្ត្រលើកទី១ របស់ ស៊ន សៀវម៉ីសម្រាប់ប្រភេទកីឡាតេក្វាន់ដូរ ក្នុងរយៈពេល៦២ឆ្នាំមកនេះ គិតចាប់ពីឆ្នាំ១៩៥៤ដែលគណៈកម្មាធិការជាតិអូឡាំពិកកម្ពុជាត្រូវបានទទួលស្គាល់ដោយគណៈកម្មាធិការអូឡាំពិកអន្តរជាតិដែលមាន២០៤ប្រទេសជាសមាជិក។ សូមបញ្ជាក់ថា នេះជាមោទនភាពលើកទីពីររបស់ ស៊ន សៀវម៉ី នាំមកជូន កម្ពុជាបន្ទាប់ពីដណ្ដើមបាន មេដាយមាសពីការប្រកួតកីឡា អាស៊ី ហ្គេម (Asian Games) លើកទី១៧ នៅប្រទេសកូរ៉េខាងត្បូង កាលពីឆ្នាំ២០១៤។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាឲ្យដឹងថា មុនចេញទៅប្រកួតនៅហ្វីលីពីន កីឡាការិនី ស៊ន សៀវម៉ី បានទៅហ្វឹកហាត់ជំនាញពិសេសដែលទទួលការបណ្ដុះបណ្ដាលពីគ្រូបង្វឹកល្អៗ នៅប្រទេសកូរ៉េ កាលពីមួយខែមុនចាប់ពីថ្ងៃ១០មិនាដល់ថ្ងៃ១០មេសា។
ភ្លាមៗបន្ទាប់ពីទទួលបានជ័យជំនះ លោក នាយករដ្ឋមន្ដ្រី បានសម្ដែងនូវការអបអរសាទរ ចំពោះជ័យជម្នះរបស់កីឡាការិនីតេក្វាន់ដូ ស៊ន សៀវម៉ី ។ និងលើកទឹកចិត្ត ឲ្យកីឡាការិនី ស៊ន សៀវម៉ីខិតខំប្រឹងប្រែងប្រកួតលើឆាកអន្តរជាតិដើម្បីប្រទេសកម្ពុជា។
តាមគម្រោង សៀវម៉ី នឹងត្រឡប់មកកម្ពុជាវិញនៅថ្ងៃទី២១មេសា វេលាម៉ោង១រសៀលដោយមានការទទួលយ៉ាងហឹកហាក់ តាមរយៈការបរិភោគថ្ងៃត្រង់រួមគ្នាជាមួយថ្នាក់ដឹកនាំគណៈកម្មាធិការជាតិអូឡាំពិកកម្ពុជា។
ដោយឡែក ដើម្បីជាការត្រៀមខ្លួនសំរាប់ចេញទៅប្រកួតនៅប្រេស៊ីលនៅថ្ងៃទី៥សីហាខាងមុខគឺកីឡាការិនី ស៊ន សៀវម៉ី នឹងហ្វឹកហាត់ជំនាញពិសេសជាមួយគ្រូបង្វឹកជនជាតិកូរ៉េបន្តទៀតនៅបន្ទប់ពិសេសមួយនៅទីស្នាក់ការគណៈកម្មាធិការជាតិអូឡាំពិកកម្ពុជា។
បើមានឱកាស សៀវម៉ី នឹងត្រូវបញ្ជូនទៅហ្វឹកហាត់ជាថ្មីម្ដងទៀតនៅកូរ៉េមុននាងចេញទៅប្រកួតនៅប្រេស៊ីល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ