អ្នកផ្ទុកមេរោគអេដស៍នៅភូមិរកាជាង១០០នាក់ទទួលថ្នាំពន្យារជីវិត
គិតត្រឹមថ្ងៃទី២ មករាឆ្នាំ២០១៥នេះ មន្ត្រីសុខាភិបាលបានបញ្ជាក់ថា មានមនុស្សជាង១០០នាក់ហើយត្រូវបានផ្តល់ថ្នាំពន្យារអាយុជីវិត ប្រឆាំងមេរោគអេដស៍ ខណៈដែលមនុស្សប្រមាណជាង១០នាក់កំពុងធ្លាក់ខ្លួនឈឺ។
ចុះផ្សាយនៅថ្ងៃ៖
ស្តាប់ - ០១:៥៩
យ៉ាងហោចណាស់មនុស្សជាង១០០នាក់នៅភូមិរកា ខេត្តបាត់ដំបងដែលជាទីផ្ទុះករណីឆ្លងមេរោគអេដស៍នោះ បានទទួលថ្នាំពន្យារជីវិតប្រឆាំងមេរោគអេដស៍ហើយ។ នេះបើតាមការការបញ្ជាក់ពីប្រធានមណ្ឌលសុខភាពឃុំរកា លោក ប៊ី ប៉េងស៊ដែលបានប្រាប់វិទ្យុបារាំងអន្តរជាតិនៅថ្ងៃសុក្រទី០២ មករានេះ។
លោកបានបន្តថា គិតត្រឹមថ្ងៃសុក្រនេះ មានមនុស្សជាង១០០នាក់ហើយមកពីភូមិចំនួន៤ក្នុងឃុំរកា ដែលទទួលបានថ្នាំពន្យារជីវិតនេះ ខណៈដែលមានអ្នកភូមិប្រមាណជាង១ពាន់៧រយនាក់ បានមកធ្វើតេស្ត ដើម្បីរកមេរោគអេដស៍។ លោកប្រធានមណ្ឌលសុខភាពរូបនេះ បានគូសបញ្ជាក់ថា ចំនួនអ្នកដែលរកឃើញថាមានសញ្ញាវិជ្ជមានមេរោគអេដស៍ថ្មីៗបន្ថែមទៀតនោះ គឺមានចំនួនថយចុះព្រោះថា ក្នុងចំណោមមនុស្សធ្វើតេស្តប្រមាណ១០នាក់ មានតែមនុស្ស១ឬ២នាក់តែប៉ុណ្ណោះដែលត្រូវបានបញ្ជាក់ថា មានរោគសញ្ញាអេដស៍។ តែយ៉ាងណាក៏ដោយ រហូតមកដល់ពេលនេះមនុស្សវ័យចំណាស់ដែលឆ្លងមេរោគអេដស៍យ៉ាងហោចណាស់១០នាក់ហើយត្រូវបានបញ្ជូនទៅសម្រាកនៅមន្ទីពេទ្យ បន្ទាប់ពីធ្លាក់ខ្លួនឈឺជាបន្តបន្ទាប់។ នេះបើតាមប្រធានមណ្ឌលសុខភាពដដែល។
លោកមាន ឈីវុន ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគនៃក្រសួងសុខាភិបាល បានបញ្ជាក់ថាការផ្តល់ថ្នាំពន្យារជីវិតប្រឆាំងនឹងមេរោគអេដស៍នេះ គឺធ្វើឡើងតាំងពីថ្ងៃទី២២ ធ្នូមកម្លេះ។ សូមរំលឹកថា ប្រជាពលរដ្ឋជាច្រើនរយនាក់តាំងពីទារក រហូតដល់មនុស្សចាស់ជរានៅក្នុងភូមិ រកា ឃុំ រកា ស្រុកសង្កែ ខេត្តបាត់ដំបង ត្រូវបានពេទ្យបញ្ជាក់ថា មានផ្ទុកមេរោគអេសដ៍។ ការឆ្លងនេះរដ្ឋាភិបាលនៅមិនទាន់អាចបញ្ជាក់ពីមូលហេតុនៃការឆ្លងបាននៅឡើយនោះទេ។
សូមបញ្ជាក់ថា ក្រោយការផ្ទុះការឆ្លងមេរោគអេដស៍នៅឃុំរកានោះ គ្រូពេទ្យភូមិមានប្រជាប្រិយភាពម្នាក់ គឺលោកយ៉ែម ជ្រិន ត្រូវបានតុលាការខេត្តបាត់ដំបងចាប់ឃុំខ្លួនក្រោមបទចោទចំនួន៣គឺប្រព្រឹត្តក្នុងចេតនាចម្លងមេរោគអេដស៍ ទៅអ្នកដទៃ ទី២ ឃាតកម្ម ដោយ អំពើឃោរឃៅ តាមមាត្រា២០៥ នៃក្រមព្រហ្មទណ្ឌ និងទី៣ បើកកន្លែងពិគ្រោះព្យាបាល ជំងឺដោយគ្មានការអនុញ្ញាតពីក្រសួងសុខាភិបាល។
ទន្ទឹមនឹងការបន្តផ្តល់ថ្នាំពន្យារជីវិតដល់ប្រជាពលរដ្ឋនៅភូមិរកានោះ គណៈកម្មការទី៨របស់រដ្ឋសភាដែលទទួលផែនសុខាភិបាល បានស្នើឱ្យក្រសួងសុខាភិបាល ក្រៅពីការផ្តល់ថ្នាំព្យាបាល នោះ រដ្ឋាភិបាលត្រូវតែបង្កើនលើកទឹកដល់អ្នកភូមិជាបន្តទៀតខណៈដែលពួកគេកំពុងបាក់ទឹកចិត្តជាខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ