ចូរនិយាយថា “ទេ” ចំពោះបទល្មើសព្រៃឈើ និងសត្វព្រៃ
កម្មវិធីអភិរក្ស នៅកម្ពុជា ហៅកាត់ជាភាសាអង់គ្លេសថា WWF រួម ជាមួយអាជ្ញាធរខេត្តមណ្ឌលគិរី និងម្ចាស់ភោជនីយដ្ឋាននានាក្នុងខេត្តនេះ នឹងជួបជុំគ្នា នៅព្រឹកថ្ងៃទី២៦មេសាស្អែក នៅក្នុងក្រុងសែនមនោរម្យ ដើម្បីសម្ពោធកម្មវិធីយុទ្ធនាការដែលមានឈ្មោះថា៖"និយាយថាមិនពាក់ព័ន្ធនឹងបទល្មើសព្រៃឈើ និងសត្វព្រៃ"។ ជាយុទ្ធនាការអប់រំ រយៈពេលមួយឆ្នាំដើម្បីទប់ស្កាត់ការប្រមាញ់ និងការបរិភោគសត្វព្រៃ និងការជួញដូរព្រៃឈើខុសច្បាប់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍ របស់លាង ដឺលុចពីទីក្រុងភ្នំពេញ
ផ្ទាំងរូបភាពផ្សព្វផ្សាយតូចធំ អាវយឺត និងផ្ទាំងបដាដែលមានសរសេរជាសារអប់រំថា៖ "និយាយថា មិនពាក់ព័ន្ធនឹងសាច់សត្វព្រៃ និងឈើខុសច្បាប់" "បញ្ឈប់ការបរិភោគសាច់សត្វព្រៃ" "គ្មានសាច់សត្វព្រៃលក់ជូនទេ" និងសារមួយទៀត "យើងរួមគ្នាទប់ស្កាត់ និងបញ្ឈប់បទល្មើសព្រៃឈើ និងសត្វព្រៃ"។ ផ្ទាំងផ្សព្វផ្សាយទាំងនេះនឹងត្រូវគេចែកចាយ និងបិទផ្សាយ នៅតាមទីសាធារណៈ ភោជនីយដ្ឋាន សណ្ឋាគារ ហាងលក់ទំនិញ ទីផ្សារ សាលារៀន នៅក្នុងក្រុងសែនមនោរម្យ ខេត្តមណ្ឌលគិរី ចាប់ពីព្រឹកថ្ងៃចន្ទ ទី២៦មេសានេះទៅ នៅក្នុងក្របខណ្ឌនៃការបើកសម្ពោធយុទ្ធនាការប្រឆាំងបទល្មើសព្រៃឈើ និងការលក់សាច់សត្វព្រៃ។
យុទ្ធនាការនេះនឹងមានរយៈពេលមួយឆ្នាំ ដែលរៀបចំដោយរដ្ឋបាលព្រៃឈើ អគ្គនាយកដ្ឋានរដ្ឋបាលការពារ និងអភិរក្សធម្មជាតិ និងអង្គការWWF។ គោលបំណងសំខាន់នៃយុទ្ធនាការនេះ គឺដើម្បីអប់រំ និងបង្កើនការយល់ដឹងរបស់ប្រជាពលរដ្ឋដែលរស់នៅ ក្នុងក្រុងសែនមនោរម្យ ម្ចាស់ភោជនីយដ្ឋាន ដែលនឹងមានវត្តមាន នៅក្នុងពិធីនៅថ្ងៃស្អែកនោះដែរ និងក៏ដើម្បីបញ្ជូនសារអប់រំដល់អ្នកដែលនិយមទទួលទានសាច់សត្វព្រៃ អំពីច្បាប់ និងបទបញ្ញត្តិនានាស្តីពីបទល្មើសព្រៃឈើ និងសត្វព្រៃ។
សេចក្តីប្រកាសព័ត៌មានរបស់អង្គការកម្មវិធីអភិរក្សនៅកម្ពុជា WWFបានសរសេរថា ជាញឹកញាប់ បទល្មើសព្រៃឈើ និងសត្វព្រៃតែងកើតឡើងដោយសារតែមានតម្រូវការទទួលទានសាច់សត្វព្រៃ និងតម្រូវការប្រើប្រាស់នូវគ្រឿងសង្ហារឹមធ្វើពីឈើប្រណិត។ សេចក្តីប្រកាសព័ត៌មានដដែលបន្តថា តម្រូវការទាំងអស់នេះ គឺជាកត្តាជម្រុញអោយមានការបរបាញ់ និងការកាប់ឈើខុសច្បាប់ នៅក្នុងតំបន់ការពារធម្មជាតិ និងនាំអោយមានការជួញដូរខុសច្បាប់នូវផលិតផលឈើ និងសត្វព្រៃ។
លោក សេង ទៀកនាយកអង្គការ WWFនៅកម្ពុជាបានថ្លែងស្នើអោយអ្នកលក់ និងអ្នកទិញត្រូវនិយាយចាប់ពីពេលនេះទៅថា មិនពាក់ព័ន្ធនឹងផលិតផលព្រៃឈើ និងសត្វព្រៃខុសច្បាប់ ដើម្បីអោយមានការកាត់បន្ថយបទល្មើសព្រៃឈើ និងសត្វព្រៃ។
ជាវិធានការមួយដើម្បីដាក់សម្ពាធទៅលើការជួញដូរព្រៃឈើ និងសត្វព្រៃ ប្រព័ន្ធទូរស័ព្ទទាន់ហេតុការណ៍មួយ ក៏នឹងត្រូវប្រកាសដាក់អោយប្រើប្រាស់ផងដែរ ដើម្បីអាចអោយសាធារណជនរាយការណ៍អំពីបទល្មើសព្រៃឈើ និងសត្វព្រៃនេះទៅសមត្ថកិច្ច។
យោងតាមសេចក្តីប្រកាសព័ត៌មានរបស់អង្គការWWF ការបរបាញ់ខុសច្បាប់ប្រហែលជាបានធ្វើអោយសត្វគោព្រៃដែលជានិមិត្តរូបជាតិផុតពូជពីព្រៃធម្មជាតិទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ