សមយុទ្ធយោធាពហុជាតិសាសន៍ចាប់ផ្តើមជាផ្លូវការ
លំហាត់សមយុទ្ធយោធាពហុជាតិសាសន៍ដែលប្រទេសកម្ពុជាធ្វើជាម្ចាស់ផ្ទះ បានចាប់ផ្តើមជាផ្លូវការហើយនៅថ្ងៃសៅរ៍នេះ នៅឯខេត្តកំពង់ស្ពឺ។ ពិធីបើកសមយុទ្ធយោធាដែលគាំទ្រដោយកងទ័ពសហរដ្ឋអាមេរិក និងមានប្រទេស២៦ចូលរួមបានប្រារព្ធធ្វើឡើងនៅព្រឹកមិញក្រោម វត្តមានរបស់លោកនាយករដ្ឋមន្ត្រី ហ៊ុន សែន។ ព្រឹត្តិការណ៍នេះជាឱកាសដែលប្រមុខដឹកនាំរដ្ឋាភិបាលខ្មែរលើកឡើងពី កិច្ចសហប្រតិបត្តិការយោធារបស់កម្ពុជាលើឆាកអន្តរជាតិ ជាពិសេសជាមួយសហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ ប៉ែន បូណា
ប្រទេសកម្ពុជាបានទទួលធ្វើជាម្ចាស់ផ្ទះសម្រាប់លំហាត់ហ្វឹកហ្វឺនយោធាពហុជាតិសាសន៍ដែលមានប្រទេស២៤ និងអង្គការចំនួន២ចូលរួម។ លំហាត់ហ្វឹកហ្វឺនយោធាដ៏ធំដែលមានឈ្មោះថា «ឆ្មាំអង្គរ២០១០» កើតឡើងក្រោមការរៀបចំរបស់បញ្ជាការដ្ឋានយោធាសហរដ្ឋអាមេរិកប្រចាំតំបន់អាស៊ីប៉ាស៊ីហ្វិក។
លំហាត់ហ្វឹកហ្វឺនយោធាដ៏ធំនេះដែលបានចាប់ផ្តើមជាផ្លូវការនៅព្រឹកថ្ងៃសៅរ៍នេះនៅឯទីលានបាញ់គ្រាប់ពិតA.C.Oក្នុងខេត្តកំពង់ស្ពឺ នឹងត្រូវដំណើរការក្នុងរយៈពេល២សប្តាហ៍។ លោកនាយករដ្ឋមន្ត្រី ហ៊ុន សែន ដែលចូលរួមជាអធិបតីក្នុងពិធីបើកសមយុទ្ធយោធាជាផ្លូវការនេះបានលើកឡើងពីមោទនភាពរបស់ប្រទេសកម្ពុជានៅក្នុងកិច្ចសហប្រតិបត្តិការយោធានៅលើឆាកអន្តរជាតិ។
លោកនាយករដ្ឋមន្ត្រីបានថ្លែងថា កម្ពុជាបានក្លាយពីប្រទេសដែលទទួលកងទ័ពមួកខៀវនៅលើទឹកដីរបស់ខ្លួន ទៅជាប្រទេសដែលបានបញ្ជូនទាហានមួកខៀវទៅបរទេស ដើម្បីរក្សាសន្តិភាពក្នុងក្របខ័ណ្ឌអង្គការសហប្រជាជាតិ។ កងទ័ពមួកខៀវផ្នែកដោះមីនរបស់កម្ពុជាបាននិងកំពុងបំពេញបេសកកម្មនៅឯប្រទេសស៊ូដង់ ឆាត និងអាហ្វ្រិកខាងត្បូង។ ឥឡូវនេះកម្ពុជាបានធ្វើជាម្ចាស់ផ្ទះក្នុងការទទួលព្រឹត្តិការណ៍អន្តរជាតិដ៏ធំមួយទៀតផ្នែកយោធានៅក្នុងប្រទេសរបស់ខ្លួន។
លោកនាយករដ្ឋមន្ត្រី ហ៊ុន សែន បានថ្លែងកោតសរសើរដល់ការរីកចម្រើននៃកិច្ចសហប្រតិបត្តិការផ្នែកយោធារវាងកម្ពុជានិងសហរដ្ឋអាមេរិក។ គួរកត់សម្គាល់ថាកាលពីពេលថ្មីៗនេះ សហរដ្ឋអាមេរិកបានប្រកាសផ្អាកជំនួយយោធាដល់កម្ពុជាមួយរយៈ ដោយសារតែការខឹងសម្បារនឹងកម្ពុជាដែលបានបញ្ជូនជនជាតិភាគតិចអ៊ុយហ្គួរ២០នាក់ដែលស្វែងរកសិទ្ធិជ្រកកោននយោបាយត្រឡប់ទៅប្រទេសចិនវិញ។ ភ្លាមៗបន្ទាប់ពីការផ្អាកជំនួយយោធារបស់អាមេរិក ប្រទេសចិនបានផ្តល់ជំនួយជារថយន្តយោធាចំនួន២៥៧គ្រឿង និងសម្លៀកបំពាក់យោធាចំនួន៥ម៉ឺនសម្រាប់ដល់កម្ពុជា។
យ៉ាងណាក៏ដោយទីក្រុងវ៉ាស៊ីនតោន បានរៀបចំលំហាត់ហ្វឹកហ្វឺនយោធាដ៏ធំមួយនៅកម្ពុជានាពេលនេះ។ លោកនាយករដ្ឋមន្ត្រីខ្មែរបានសម្តែងការអបអរចំពោះខួបទី៦០ឆ្នាំនៃចំណងការទូតកម្ពុជានិងអាមេរិក ដែលកំពុងរីកចម្រើនយ៉ាងខ្លាំង។ តាមរយៈការរៀបចំលំហាត់សមយុទ្ធយោធានៅលើទឹកដីកម្ពុជានេះ លោកនាយករដ្ឋមន្ត្រី ហ៊ុន សែន បានបង្ហាញក្តីសង្ឃឹមថាទំនាក់ទំនងកម្ពុជានិងអាមេរិកនឹងកាន់តែរីកចម្រើនទៅមុខថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ