ប្រធានាធិបតីសាធារណរដ្ឋ ស្លូវ៉ាគ ទស្សនកិច្ចរយៈពេល ៤ ថ្ងៃនៅកម្ពុជា
លោក អ៊ីវ៉ាន ហ្គាស្ប៉ារ៉ូវីច ( IVAN GASPAROVIC ) ប្រធានាធិបតី នៃសាធារណរដ្ឋ ស្លូវ៉ាគ នឹងផ្តើមបំពេញដំណើរទស្សនកិច្ចផ្លូវរដ្ឋរយៈពេល ៤ ថ្ងៃ នៅកម្ពុជា ចាប់ពីថ្ងៃទី៧ ខែកញ្ញា ស្អែកនេះ។
ចុះផ្សាយនៅថ្ងៃ៖
លោក កុយ គួង អ្នកនាំពាក្យក្រសួងការបរទេសកម្ពុជា បានមានប្រសាសន៍ថា ដំណើរទស្សនកិច្ចរបស់លោកប្រធានាធិបតី ស្លូវ៉ាគ នៅកម្ពុជា ពេលនេះ ដើម្បីពង្រឹង និងពង្រីកទំនាក់ទំនងមិត្តភាព និងកិច្ចសហប្រតិបត្តិការទ្វេភាគី ដែលប្រទេសទាំងពីរ មានស្រាប់ ពិសេស ដើម្បីពង្រីកនូវវិស័យសហប្រតិបត្តិការទ្វេភាគី រួមទាំងវិស័យពាណិជ្ជកម្មរវាងប្រទេសទាំងពីរ ឲ្យមានវិសាលភាព កាន់តែទូលំទូលាយថែមទៀត។
ដំណើរទស្សនកិច្ចរបស់លោកប្រធានាធិបតី ស្លូវ៉ាគ នៅកម្ពុជា ក៏ជាការផ្លាស់ប្តូរដំណើរទស្សនកិច្ចផ្លូវរដ្ឋ បន្ទាប់ពីព្រះករុណាព្រះមហាក្សត្រ នរោត្តម សីហមុនី បានយាងទៅបំពេញព្រះរាជដំណើរទស្សនកិច្ចផ្លូវរដ្ឋ នៅប្រទេស ស្លូវ៉ាគ កាលពីខែកញ្ញា ឆ្នាំ២០០៦។
កម្ពុជា និងសាធារណរដ្ឋ ស្លូវ៉ាគ បានភ្ជាប់ទំនាក់ទំនងការទូតនឹងគ្នា នៅក្នុងឆ្នាំ១៩៩៧ បន្ទាប់ពីសាធារណរដ្ឋសង្គមនិយម ឆេកូស្លូវ៉ាគី បានបំបែកជារដ្ឋពីរ គឺសាធារណរដ្ឋ ស្លូវ៉ាគ និងសាធារណរដ្ឋ ឆេក នៅក្នុងឆ្នាំ ១៩៩៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ