រដ្ឋមន្ត្រីការពារជាតិកម្ពុជា បំពេញទស្សនកិច្ចនៅចិន
នៅថ្ងៃច័ន្ទនេះ លោកនាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា បានដឹកនាំគណៈប្រតិភូយោធាមួយក្រុម ទៅបំពេញទស្សនកិច្ចនៅប្រទេសចិន។ ទស្សនកិច្ចរបស់លោក ទៀ បាញ់ នៅចិនរយៈពេល ១ សប្តាហ៍នេះ ដើម្បីពង្រឹងកិច្ចសហប្រតិបត្តិការលើវិស័យយោធារវាងកម្ពុជា និងចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
លោកនាយឧត្តមសេនីយ៍ ទៀ បាញ់ រដ្ឋមន្ត្រីការពារជាតិ បានដឹកនាំគណៈប្រតិភូយោធាកម្ពុជាដ៏ធំមួយ ចេញដំណើរទៅបំពេញទស្សនកិច្ច នៅប្រទេសចិន រយៈពេល ១ សប្តាហ៍ ចាប់ពីថ្ងៃទី២០មិថុនា ឆ្នាំ២០១១។
មុនឡើងយន្តហោះ នៅព្រឹកមិញ លោកនាយឧត្តមសេនីយ៍ ទៀ បាញ់ បានលើកឡើងថា ក្រៅតែពីសួរសុខទុក្ខ និងផ្លាស់ប្តូរយោបល់ ដំណើរទស្សនកិច្ច ១ សប្តាហ៍ នៅប្រទេសចិន គណៈប្រតិភូយោធាកម្ពុជា នឹងបន្តពិភាក្សាការងារមួយចំនួនជាមួយមិត្តចិន។
លោក ទៀ បាញ់ បានប្រាប់ក្រុមអ្នកកាសែតថា ដំណើរទស្សនកិច្ចរបស់លោក ដើម្បីពង្រឹងទំនាក់ទំនងខាងវិស័យយោធា រវាងក្រសួងការពារជាតិប្រទេសកម្ពុជា និងចិន។ ដំណើរទស្សនកិច្ចនេះ ក៏ជាការពង្រឹងចំណងទំនាក់ទំនងរវាងកម្ពុជា និងចិន ដែលតែងតែផ្លាស់ប្តូរគណៈប្រតិភូយោធាទៅវិញទៅមក ក្នុងការពង្រឹងមិត្តភាពរវាងប្រទេសទាំងពីរ។
រយៈពេលចុងក្រោយនេះ ទំនាក់ទំនងយោធារវាងកម្ពុជា និងចិន មានការរីកចម្រើនទៅមុខគួរឲ្យកត់សម្គាល់។ ចិនបានផ្តល់សម្ភារៈយោធាជាច្រើន រួមទាំងឯកសណ្ឋានយោធា និងរថយន្តយោធាចំនួន ២៥៧ គ្រឿង។
ក្នុងដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសចិន កាលពីដើមខែឧសភា ឆ្នាំ២០១០ លោក ហ៊ូ ជិនតាវ ប្រធានាធិបតីចិន បានប្រកាសផ្តល់ជំនួយដល់កម្ពុជា នូវសម្ភារៈយោធា ដែលមានតម្លៃប្រមាណ ១៤ លានដុល្លារអាមេរិក។ សម្ភារៈទាំងនោះ ត្រូវបានបញ្ជូនមកដល់កម្ពុជា ជាបន្តបន្ទាប់ ចាប់តាំងពីឆ្នាំ២០១០។
ទំនាក់ទំនងកាន់តែល្អលើវិស័យយោធារវាងកម្ពុជា និងចិន បានកើតឡើង បន្ទាប់ពីអាមេរិកបានផ្អាកជំនួយយោធាដល់កម្ពុជា។ នោះក៏ដោយសារតែរដ្ឋាភិបាលកម្ពុជា បានបញ្ជូនជនជាតិភាគតិចចិនអ៊ុយហ្គួរ ២០ នាក់ ត្រឡប់ទៅឲ្យចិន កាលពីខែមេសាឆ្នាំ២០១០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ