លោក សម រង្ស៊ី ដែលគ្មានឈ្មោះបោះឆ្នោត ដើរពិនិត្យមណ្ឌលបោះឆ្នោត
បើទោះបីជាគ្មានឈ្មោះបោះឆ្នោត និងឈ្មោះជាតំណាងរាស្ត្រក៏ដោយ ក៏លោក សម រង្ស៊ីប្រធានគណបក្សសង្គ្រោះជាតិ បានធ្វើដំណើរចេញចូលតាមការិយាល័យបោះឆ្នោតនីមួយៗក្នុងក្រុងភ្នំពេញ នៅថ្ងៃទី២៨ កក្កដា ឆ្នាំ២០១៣ ដែជាថ្ងៃបោះឆ្នោតនេះ។ ក្នុងដំណើរត្រួតពិនិត្យនេះដែរ លោកសម រង្ស៊ី ត្រូវបានប្រជាពលរដ្ឋមួយចំនួនស្វាគមន៍។ តែទោះជាយ៉ាងណាប្រធានគណបក្សប្រឆាំងរូបនេះ ត្រូវវិលចូលស្នាក់ការគណបក្សរបស់លោកនៅ សង្កាត់ចាក់អង្រែលើវិញ បន្ទាប់ពីបានចេញចូល ការរិយាល័យចំនួន៥ មុនពេលអាជ្ញាធររារាំងមិនឱ្យចូលការិយាល័យបោះឆ្នោតជាបន្តទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ប្រធានគណបក្សប្រឆាំងនៅកម្ពុជា លោក សម រង្ស៊ី ខណៈដែលមិនមានឈ្មោះបោះឆ្នោត និងឈ្មោះជាតំណាងរាស្ត្រនោះ បានធ្វើដំណើរចេញចូលតាមការិយាល័យបោះឆ្នោតនីមួយៗក្នុងទីក្រុងភ្នំពេញ។ ការរិយាល័យបោះឆ្នោតសង្កាត់ចាក់អង្រែលើជាទីតាំងដែលលោកសម រង្ស៊ី បានធ្វើដំណើរចូលមុនគេជាមួយភរិយារបស់លោក។
ក្នុងការិយាល័យនោះហើយ ដែលលោកប្រធានគណបក្សប្រឆាំងគ្មានឈ្មោះបោះឆ្នោតរូបនេះ ត្រូវប្រជាពលរដ្ឋក្នុងមណ្ឌលបោះឆ្នោតសង្កាត់ចាក់អង្រែលើ បានស្វាគមន៍រូបលោក ដោយអ្នកខ្លះចាប់ដៃ អោបថើប និងសុំថតរូបជាមួយជាដើម ដែលបង្ហាញពីភាពស្និទស្នាល។ ភាពស្និទស្នាលដែលលោក សម រង្ស៊ីចំណាយពេលជាងកន្លះម៉ោងដើម្បីរាក់ទាក់ជាមួយប្រជាពលរដ្ឋ ក្រោមក្រសែភ្នែកមនុស្សរាប់រយនាក់ និងហៅឈ្មោះលោក សម រង្ស៊ី។
ការរិយាល័យបឋមសិក្សាសុធារស ក្នុងខណ្ឌចំការមន គឺមណ្ឌលបោះឆ្នោតទី២ ដែលលោកសម រង្ស៊ី បានធ្វើដំណើរចូលទៅ។ មិនខុសពីមណ្ឌលបោះឆ្នោតមុនទេ លោក សម រង្ស៊ីត្រូវបានប្រជាពលរដ្ឋស្វាគមន៍ ដោសម្តែងក្តីនឹងរលឹក។
ក្រោមការសាកសួរជាច្រើន និងការប្រមាញ់រូបថត ពីក្រុមអ្នកយកព័ត៌មានទាំងជាតិ និងអន្តរជាតិ លោក សម រង្ស៊ី ក្នុងហ្វូងមនុស្សចោមរោមជាច្រើន បាននិយាយថា លោក មកកាន់មណ្ឌលបោះឆ្នោតនេះ គឺដើម្បីឱ្យឃើញនឹងភ្នែកផ្ទាល់ពីដំណើរការ និងស្ថានការណ៍នៃការបោះឆ្នោតអាណត្តិទី៥ឆ្នាំ២០១៣នេះ។ ហើយលោកថា ទិន្នន័យពីភាពអសកម្ម និងភាពមិនប្រកតីទាំងនៅទីក្រុងភ្នំពេញ និងទូទាំងប្រទេសកម្ពុជា ដែលមន្ត្រីគណបក្សសង្គ្រោះជាតិ បានប្រមូលនោះ គឺគណបក្ស នឹងធ្វើការសន្និដ្ឋានពីស្ថានការណ៍បោះឆ្នោតទាំងមូលនៅល្ងាចថ្ងៃទី២៨ កក្កដានេះ។ ហើយ ការបញ្ចេញប្រតិកម្ម ឬការបញ្ជាក់ណាមួយនឹងមាននៅថ្ងៃទី២៩ កក្កដា ស្អែក។
បើទោះបីជាអត់មានឈ្មោះបោះឆ្នោត និងឈ្មោះបេក្ខភាពតំណាងរាស្ត្រ លោក សម រង្ស៊ី បាននិយាយថា លោកមានក្តីរំភើបពេលដែលពលរដ្ឋជាច្រើនស្វាគមន៍រូបលោកយ៉ាងដូចច្នេះ។ ប៉ុន្តែទន្ទឹមនឹងនោះ ដំណឹងអំពីការបាត់ឈ្មោះ និងភាពមិនប្រក្រតីដែលប្រជាពលរដ្ឋមួយចំនួនក្នុងមណ្ឌលនីមួយៗបានជួបប្រទះនោះ ក៏ជាអ្វីដែលលោក សម រង្ស៊ី បានកាត់ត្រាទុកផងដែរ។
តែទោះជាយ៉ាងណា ការធ្វើដំណើរចូលតាមមណ្ឌលបោះឆ្នោតរបស់លោកសម រង្ស៊ី ប្រធានគណបក្សប្រឆាំង ត្រូវបានអាជ្ញាធររារាំង និងហាមមិនឱ្យចូលក្នុងមណ្ឌលការិយាល័យបោះឆ្នោតទៀតនោះទេ បន្ទាប់ពីលោក បានធ្វើដំណើរចូលការិយាល័យបោះឆ្នោតចំនួន ៥គឺមណ្ឌលសាលាបឋមចាក់អង្រែលើ មណ្ឌលសាលាបឋមសិក្សាសុធារស មណ្ឌលចតុមុខ និងមណ្ឌលវត្តភ្នំ និងការិយាល័យចិនវត្តតំដែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ