អាមេរិកប្រាប់ឲ្យចិនបន្ធូរបន្ថយភាពតានតឹងនៅតំបន់អាស៊ី
នៅក្នុងប្រទេសចិន អនុប្រធានាធិបតីអាមេរិក Joe Biden បានបង្ហាញជំហររឹងមាំដើម្បីទាមទារឲ្យប្រទេសចិនចាត់វិធានការណាមួយដើម្បីបន្ធូបន្ថយភាពតានតឹងនៅអាស៊ី។ កាលពីចុងខែវិច្ឆិកា ទីក្រុងប៉េកាំងបានបង្កើតតំបន់ការពារដែនអាកាស លើសពីដែនអធិបតេយ្យភាពរបស់ខ្លួន ដែលបានបណ្តាលឲ្យមានការខឹងសម្បារពីសំណាក់ជប៉ុន កូរ៉េខាងត្បូង និងការប្រឆាំងពីអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
នៅក្នុងជំនួបកាលពីថ្ងៃពុធ និងថ្ងៃព្រហស្បតិ៍ ជាមួយលោកប្រធានាធិបតីស៊ី ជីនពីង និងលោកនាយករដ្ឋមន្រ្តីចិន លី ខឺឈាំង លោកអនុប្រធានាធិបតីអាមេរិក Joe Biden បានលើកឡើងពីក្តីព្រួយបារម្ភជាក់ស្តែងរបស់អាមេរិក និងប្រទេសនៅអាស៊ីដទៃទៀត នៅក្នុងតំបន់ បន្ទាប់ពីចិនបានប្រកាសបង្កើតតំបន់ការពារដែនអាកាស ដែលបានគ្របដណ្តប់ទៅលើដែនអាកាសរបស់ជប៉ុន។
“ខ្ញុំបាននិយាយត្រង់ទៅ ត្រង់មកជាមួយលោកប្រធានាធិបតីចិន និងបានបញ្ជាក់ជំហររឹងមាំ និងការចង់បានរបស់អាមេរិក”។ លោកអនុប្រធានាធិបតីអាមេរិកបានលើកឡើងយ៉ាងដូច្នេះ ទៅកាន់អ្នកជំនួញអាមេរិកក្នុងទីក្រុងប៉េកាំង ដោយមិនភ្លេចបញ្ជាក់ថា ទីក្រុងវ៉ាស៊ីនតោនដែលមានផលប្រយោជន៍ច្រើននៅក្នុងតំបន់អាស៊ី នៅតែចង់ក្លាយជាមហាអំណាច សេដ្ឋកិច្ច និងយោធា នៅអាស៊ី។ លោកអនុប្រធានាធិបតីអាមេរិក បានបញ្ជាក់ដែរថា ប្រទេសចិនត្រូវរក្សាស្ថិរភាពនៅក្នុងតំបន់ ដើម្បីសន្តិសុខ និងសន្តិភាព ពោលគឺត្រូវកាត់បន្ថយគ្រោះថ្នាក់ដែលអាចបណ្តាលឲ្យទៅជាជម្លោះ។
យោងតាមសេចក្តីថ្លែងការណ៍របស់ក្រសួងការបរទេសចិន ដែលចេញផ្សាយកាលពីថ្ងៃព្រហស្បតិ៍ ទីក្រុងប៉េកាំងបានបញ្ជាក់ជាថ្មី ទៅអនុប្រធានាធិបតីអាមេរិក ថា ប្រទេសចិនបានអនុវត្តទៅតាមច្បាប់ និងបទដ្ឋានអន្តរជាតិ។ ដូច្នេះ អាមេរិកគួរគោរព ការសម្រេចចិត្តរបស់ចិន និងឈប់កាន់ជើងភាគីណាមួយ។
The Global Time វិញដែលជាកាសែតផ្លូវរដ្ឋចិន បានរិះគន់ជប៉ុនថា បានទាញអាមេរិកឲ្យចូលមកពាក់ព័ន្ធក្នុងជម្លោះ ដែលបើតាមចិន គឺជប៉ុនជាដើមហេតុ រំលោភមកលើចិន។ នៅក្នុងបទវិចារណកថារបស់ខ្លួន កាសែតបានរំលឹកថា វានឹងក្លាយជារឿងអាក្រក់បំផុត បើសិនជាចិន និងអាមេរិកត្រូវប្រឈមមុខដាក់គ្នា។
សូមបញ្ជាក់ថា បន្ទាប់ពីប្រទេសចិន លោកអនុប្រធានាធិបតីអាមេរិកបានចាកចេញទៅកូរ៉េខាងត្បូង កាលពីថ្ងៃព្រហស្បតិ៍ម្សិលមិញ ដោយគេរំពឹងថា លោកនឹងនិយាយធានាអះអាងដូចគ្នាទៅនឹងជប៉ុន ពីជំនួយគំាទ្ររបស់អាមេរិកទៅលើកូរ៉េខាងត្បូង ដែលរងគ្រោះដូចជប៉ុន ដោយការបង្កើតតំបន់ការពារហោះហើររបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ