ចៅក្រមតុលាការសាលាឧទ្ធរណ៍ សម្រេចមិនដោះលែងបាតុករ ២១ នាក់ទេ
បន្ទាប់ពីសវនាការអសាធារណៈ ដោយបិទទ្វាររយៈពេលប្រហែល ៣ ម៉ោង នៅព្រឹកថ្ងៃទី១១កុម្ភៈនេះ ចៅក្រមតុលាការសាលាឧទ្ធរណ៍ បានសម្រេចមិនដោះលែងបាតុករ ចំនួន ២១ នាក់ ដែលជាសកម្មជនសិទ្ធិមនុស្ស លោក វន់ ពៅ សកម្មជនដីធ្លី និងក្រុមកម្មករ នោះទេ។ ចៅក្រម ៣ រូប របស់តុលាការសាលាឧទ្ធរណ៍ សំអាងលើនីតិវិធីរបស់តុលាការ កំពុងបន្តស៊ើបអង្កេត លើករណីបាតុកម្ម របស់កម្មកររោងចក្រកាត់ដេរ ដែលទាហាន ប៉ូលិស និងប៉េអឹម បង្ក្រាប នាំឲ្យមានមនុស្សស្លាប់ ៥ នាក់ និងរបួសជាច្រើននាក់ កាលពីថ្ងៃទី២ និងថ្ងៃទី៣មករា។
ចុះផ្សាយនៅថ្ងៃ៖
ស្តាប់ - ០២:៤៤
សវនាការដោយបិទទ្វារ នៅតុលាការសាលាឧទ្ធរណ៍ នាព្រឹកថ្ងៃទី១១កុម្ភៈនេះ មានវត្តមានចៅក្រមជំនុំជម្រះ ៣ រូប តំណាងអយ្យការម្នាក់ ក្រឡាបញ្ជីម្នាក់ និងមេធាវី ១០ នាក់ ការពារបាតុករទាំង ២១ នាក់។ សាធារណៈជន មិនអាចចូលស្តាប់សវនាការលើបណ្តឹងនៅក្រៅឃុំបានទេ។ រីឯបាតុករទាំង ២១ នាក់ ក៏មិនត្រូវបាននាំខ្លួន មកចូលរួមសវនាការឡើយ។
ក្រោយពីសួរដេញដោលអស់ពេលប្រហែលជា ៣ ម៉ោង លោកចៅក្រម ឃុន លាងម៉េង ប្រធានក្រុមប្រឹក្សាជំនុំជម្រះ របស់តុលាការសាលាឧទ្ធរណ៍ បានសម្រេចតម្កល់ការសម្រេចរបស់តុលាការ សាលាដំបូងរាជធានីភ្នំពេញ ទុកជាបានការ។ ចៅក្រមសំអាងលើហេតុផល ៣ ចំណុច រួមមាន៖ បើដោះលែងបាតុករទាំង ២១ នាក់ នោះនឹងប៉ះពាល់ដល់សន្តិសុខសណ្តាប់ធ្នាប់សាធារណៈ ធានាវត្តមានរបស់ជនជាប់ចោទ ចំពោះមុខតុលាការ ហើយម្យ៉ាងទៀត សំណុំរឿងក្តីនេះ តុលាការកំពុងបន្តនីតិវិធីស៊ើបអង្កេត។
ប៉ុន្តែមេធាវីការពារបាតុករទាំង ២១ នាក់ និងសកម្មជនសិទ្ធិមនុស្ស បានសម្តែងការសោកស្តាយ ហើយចាត់ទុកថា ចៅក្រមតុលាការ មិនឯករាជ្យ ហើយសម្រេចផ្នែកលើហេតុផលនយោបាយ។
សកម្មជនសិទ្ធិមនុស្ស អាដហុក លោក នី ចរិយា បានលើកឡើងថា តុលាការ សម្រេចក្តីនេះ មិនឈរលើមូលដ្ឋានច្បាប់ទេ។ ការបន្តឃុំខ្លួនលើបាតុករទាំង ២១ នាក់ ជាយុទ្ធសាស្ត្រ ក្នុងការយកជនទាំង ២១ នាក់ ធ្វើជាចំណាប់ខ្មាំងនយោបាយ។
ចំណែកលោក សំ សុខគង់ មេធាវីការពារលោកវន់ពៅ និងបាតុករជាច្រើននាក់ផ្សេងទៀត បានប្រកាសថា នឹងដាក់ពាក្យប្តឹងបន្តទៅកាន់តុលាការកំពូល ដើម្បីស្នើសុំឲ្យបាតុករទាំង ២១ នាក់ បាននៅក្រៅពន្ធនាគារ។
ប្រពន្ធលោក វន់ ពៅ សកម្មជនដីធ្លី និងអ្នកការពារសិទ្ធិមនុស្សរាប់រយនាក់ បានយំស្រែកបោកខ្លួននៅតុលាការសាលាឧទ្ធរណ៍ ខណៈដែលពួកគេលើកបដា ស្រែកតវ៉ា ទាមទារឲ្យដោះលែង បាតុករទាំង ២១ នាក់។ បាតុករ ២៣ នាក់ ត្រូវបានចោទប្រកាន់ពីបទប្រើអំពើហិង្សា ធ្វើឲ្យខូចខាតទ្រព្យសម្បត្តិដោយចេតនា ប្រមាថមន្ត្រីរាជការសាធារណៈ និងបទប៉ះពាល់សណ្តាប់ធ្នាប់សាធារណៈ។ ប៉ុន្តែកាលពីថ្ងៃទី៧កុម្ភៈ ចៅក្រមតុលាការសាលាដំបូងរាជធានីភ្នំពេញ បានសម្រេចដោះលែងកម្មករ ២នាក់ ឲ្យនៅក្រៅឃុំជាបណ្តោះអាសន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ