លោក ស៊ុន ចាន់ថុល បង្ហាញកំណែទម្រង់ក្នុងក្រសួងពាណិជ្ជកម្មក្នុងដែនអំណាចរបស់ខ្លួន
លោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្មនៅព្រឹកថ្ងៃអង្គារទី២៧ ឧសភានេះ បានរៀបចំសិក្ខាសាលាមួយបង្ហាញពីកំណែទម្រង់នៅក្នុងក្រសួងពាណិជ្ជកម្មទៅដល់និស្សិតសកលវិទ្យាល័យ។ លោករដ្ឋមន្ត្រីបានបញ្ជាក់ថា ក្រសួងបានលុបបំបាត់បក្សពួកនិយមដោយការជ្រើសរើសដោយតម្លាភាព ការកិបកេងផលប្រយោជន៍តាមនាយកដ្ឋាន ការបង្កើតប្រព័ន្ធការងារតាមបែបអេឡិចត្រូវនិចដើម្បីលុបបំបាត់អំពើពុករលួយ រួមទាំងការផ្ទេអំណាចទៅដល់ថ្នាក់ក្រោមជាដើម។
ចុះផ្សាយនៅថ្ងៃ៖
ស្តាប់ - ០២:៤១
ការលុបបំបាត់អំពើពុករលួយ កំណែទម្រង់ប្រព័ន្ធការងារ និងការលុបបំបាត់ការកិបកេងតាមផ្នែកក្នុងក្រសួង។ ទាំងនេះគឺជាចំណុចកំណែទម្រង់ដែលរដ្ឋមន្ត្រីក្រសួងពាណិជ្ជកម្ម លោក ស៊ុន ចាន់ថុលបានប្រកាសទៅកាន់សិស្សនិស្សិតប្រមាណជាង៣០០នាក់មកពីសកលវិទ្យាកសិកម្ម។
ថ្លែងក្នុងសាលប្រជុំក្រសួងពាណិជ្ជកម្ម លោករដ្ឋមន្ត្រីដែលមានសំលៀកបំពាក់អាវស និងខោខ្មៅបានថ្លែងពីលើឆាកទៅកាន់អ្នកចូលរួមថា ក្រសួងកំពុងដាក់ឱ្យដំណើរការនូវនាយកដ្ឋានច្រកចេញចូលតែមួយដើម្បីកាត់បន្ថយរបៀបធ្វើការការិយាធិបតេយ្យ រួមទាំងការចុះបញ្ជីពាណិជ្ជកម្មតាមបែបប្រព័ន្ធអេឡិចត្រូវនិចជាដើម។ លោកស៊ុន ចាន់ថុល បាននិយាយត្រង់ៗថាក្រសួងបានកែតម្រូវមិនឱ្យនាយកដ្ឋាននីមួយៗមានហិបប្រាក់ទុកសម្រាប់បម្រើផលប្រយោជន៍តាមនាយកដ្ឋានបក្សពួកនោះទេ។
លោករដ្ឋមន្ត្រីដែលបានអះអាងថា កំណែទម្រង់ទាំងនេះ គឺដើម្បីកាត់បន្ថយការចំណាយពេលវេលានៃពាណិជ្ជករ និង ការចំណាយក្រៅផ្លូវការណ៍ និងដើម្បីបង្កើនប្រសិទ្ធភាពការងារ។ លោកស៊ុន ចាន់ថុលដែលទើបបានឡើងជារដ្ឋមន្ត្រីក្នុងអាណត្តិទី៥នេះ បានបន្តថា ក្រសួងពាណិជ្ជកម្មបានបង្កើតឱ្យមានប្រព័ន្ធទូរសព័ទ្ទទាន់ហេតុការណ៍ចំនួនបីខ្សែដើម្បីឱ្យពាណិជ្ជករ ឬពលរដ្ឋអាចរាយការណ៍ពីភាពអសកម្មរបស់មន្ត្រីក្រសួង ឬការទារកំរៃក្រៅផ្លូវការណ៍ជាដើម។ លេខទូរស័ព្ទទាំងបីខ្សែនោះ គឺ ០១៦ ៨៥៥៥និង៨៩ មួយខ្សែទៀតគឺ ០១២ ៩៩ ២០ និង ៣៥ មួយខ្សែចុងក្រោយ គឺ០១២ ៨៦ ៨៣ និង ៥៨ ។
សូមរំលឹកជូនថា ក្រសួង រដ្ឋាភិបាលនៃគណបក្សប្រជាជនកម្ពុជា ត្រូវបានគេរិះគន់ថា ធ្វើការគ្មានប្រសិទ្ធភាព និងបានប្រព្រឹត្តអំពើពុករលួយស្ទើគ្រប់ទីកន្លែង ដែលបណ្តាលឱ្យគណបក្សកាន់អំណាចមួយនេះ បានធ្លាក់ប្រជាប្រិយភាពរបស់ខ្លួនយ៉ាងខ្លាំងក្នុងការបោះឆ្នោតអាណត្តិទី៥ កន្លងទៅនេះ។
ទាក់ទងនឹងកំណែទម្រង់របស់ក្រសួងពាណិជ្ជកម្មនេះ អ្នកនាំពាក្យគណបក្សសង្គ្រោះជាតិ លោក យ៉ែមបុញ្ញាឫទ្ធិ បានមានប្រសាសន៍ថា កំណែទម្រង់របស់ក្រសួងពាណិជ្ជកម្មតែមួយ មិនគ្រប់គ្រាន់នោះទេ ព្រោះថា រដ្ឋាភិបាលកម្ពុជាសព្វថ្ងៃបានចំណាយថវិកាជាតិយ៉ាងច្រើនលើមន្ត្រីរាជការដែលមិនសូវមានប្រសិទ្ធភាពការងារ។ យ៉ាងណាក៏ដោយ លោកយ៉ែម បុញ្ញាឫទ្ធិ នៅតែលើកឡើងថា បញ្ហាបក្សពួកនិយមគឺនៅតែបញ្ហាប្រឈមសម្រាប់រដ្ឋាភិបាលគណបក្សប្រជាជនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ