សកម្មជនអង្គការសង្គមស៊ីវិលកម្ពុជាលើកបដានិងដាក់ញត្តិនៅសហភាពអឺរ៉ុប ជុំវិញថ្នាំពន្យារជីវិតប្រឆាំងមេរោគអេដស៍
បណ្តាញអង្គការសង្គមស៊ីវិល ចំនួន ១៣ ស្ថាប័ន ដែលធ្វើការងារពាក់ព័ន្ធនឹងស្ត្រី និងក្រុមអ្នករកស៊ីផ្លូវភេទជាដើម បានប្រមូលផ្តុំលើកបដាតវ៉ា នៅមុខទីស្នាក់ការរបស់សហភាពអឺរ៉ុប នៅជិតវិមានឯករាជ្យ ក្នុងទីក្រុងភ្នំពេញ នាព្រឹកថ្ងៃអង្គារ ទី៩មេសានេះ។ ក្រុមសកម្មជនអង្គការទាំងនោះ បានតវ៉ាប្រឆាំងនឹងការប៉ុនប៉ងចុះកិច្ចព្រមព្រៀងពាណិជ្ជកម្មសេរីរវាងសហភាពអឺរ៉ុប និងឥណ្ឌា ស្តីពី ឱសថមូលដ្ឋានប្រឆាំងមេរោគអេដស៍សម្រាប់ពន្យារជីវិត។ កិច្ចព្រមព្រៀងនោះ ត្រូវបានសកម្មជនអង្គការកម្ពុជា អ្នកតវ៉ា ចាត់ទុកថា ជាការរារាំងមិនឲ្យប្រទេសឥណ្ឌា បន្តផលិតថ្នាំពន្យារជីវិតប្រឆាំងមេរោគអេដស៍ ដើម្បីលក់ក្នុងតម្លៃថោក ដូចសព្វថ្ងៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
ញត្តិរបស់សកម្មជនអង្គការសង្គមស៊ីវិល ជូនលោក ហ្សង់ ហ្វ្រង់ស្វ័រ កូតង់ ឯកអគ្គរាជទូតនៃសហភាពអឺរ៉ុបប្រចាំកម្ពុជា ចុះថ្ងៃទី៩ ខែមេសា ឆ្នាំ២០១៣ ធ្វើឡើងដោយក្រុមកម្មកររោងចក្រកាត់ដេរនៅកម្ពុជា អ្នកប្រកបរបរផ្លូវភេទ អ្នកធ្វើការនៅតាមគ្រឹះស្ថានសេវាកំសាន្ត អ្នករស់នៅជាមួយមេរោគអេដស៍ និស្សិត សកម្មជនស្ត្រី និងសកម្មជនសិទ្ធិមនុស្ស មកពីបណ្តាញ និងអង្គការផ្សេងៗ សរុប ១៣ ស្ថាប័ន។
សកម្មជនអ្នកតវ៉ា បានបង្ហាញនូវក្តីកង្វល់របស់ខ្លួន អំពីកត្តាគំរាមកំហែងដល់អាយុជីវិតប្រជាជនកម្ពុជា និងប្រទេសកំពុងអភិវឌ្ឍន៍រាប់លាននាក់ ដែលបណ្តាលមកពីកិច្ចព្រមព្រៀងពាណិជ្ជកម្មសេរីរវាងសហភាពអឺរ៉ុប និងរដ្ឋាភិបាលឥណ្ឌា។ កិច្ចព្រមព្រៀងនោះ អាចនឹងត្រូវធ្វើឡើង នាពេលខាងមុខដ៏ឆាប់នេះ។
ញត្តិដដែលលើកឡើងថា របាយការណ៍ជាច្រើនបានបង្ហាញថា កិច្ចចរចាពាណិជ្ជកម្មសេរីរវាងសហគមន៍អឺរ៉ុប និងឥណ្ឌា ជិតត្រូវបានអនុម័តហើយ។ ដូច្នេះក្រុមសកម្មជនអ្នកតវ៉ា មានការព្រួយបារម្ភថា កិច្ចព្រមព្រៀងនេះនឹងក្លាយជាមហន្តរាយដ៏ធ្ងន់ធ្ងរ ហើយអាចប៉ះពាល់ដល់អាយុជីវិតមនុស្សរាប់លាននាក់ ក្នុងប្រទេសក្រីក្រដូចប្រទេសកម្ពុជា។ មូលហេតុមកពីកិច្ចព្រមព្រៀងពាណិជ្ជកម្មសេរីសហភាពអឺរ៉ុប និងឥណ្ឌា អាចមានផលប៉ះពាល់ដល់ស្ថិរភាពក្នុងការផ្គត់ផ្គង់ឱសថសង្គ្រោះជីវិតមនុស្ស ដល់បណ្តាប្រទេសក្រីក្រលើពិភពលោក។
ញត្តិលើកឡើងថា ប្រសិនបើមិនមានឱសថមូលដ្ឋានពីប្រទេសឥណ្ឌាទេ តម្លៃព្យាបាលមេរោគអេដស៍ សម្រាប់ប្រជាជនកម្ពុជាម្នាក់ នឹងកើនឡើងប្រហែល ១៥ ដង ពី ១៧៥ ដុល្លារ នៅពេលបច្ចុប្បន្ន ទៅដល់ជាង ២.៥០០ ដុល្លារ ក្នុងមួយខែ។
តាមសកម្មជនអ្នកតវ៉ា នៅកម្ពុជា មានប្រជាជនប្រមាណ ៧៥.០០០ នាក់ ដែលកំពុងរស់នៅជាមួយមេរោគអេដស៍ ហើយពឹងផ្អែកយ៉ាងខ្លាំងទៅលើឱសថមូលដ្ឋាន ផលិតនៅប្រទេសឥណ្ឌា ដើម្បីជីវិតរស់នៅរបស់ពួកគេ។ ក្នុងនោះ មាន ៤៨.០០០ នាក់ កំពុងប្រើប្រាស់ថ្នាំប្រឆាំងនឹងមេរោគអេដស៍ (ថ្នាំពន្យារអាយុជីវិត) ដែលជាឱសថមូលដ្ឋាន ដោយផ្តល់ការគាំទ្រដោយម្ចាស់ជំនួយ។ យោងតាមអង្គការសហប្រជាជាតិ ប្រយុទ្ធនឹងជំងឺអេដស៍ UNAIDS នៅឆ្នាំ២០០៩ បានថវិកាចំណាយសំរាប់សេវាព្យាបាលអ្នកផ្ទុកមេរោគអេដស៍នៅកម្ពុជា អស់ប្រមាណ ១២ លានដុល្លារអាមេរិក ក្នុងមួយឆ្នាំ។
បន្ទាប់ពីជួបជុំលើកបដា និងដាក់ញត្តិនៅទីស្នាក់ការសហភាពអឺរ៉ុបរួចមក នៅព្រឹកមិញ ក្រុមសកម្មជនអ្នកតវ៉ា ក៏បានលើកគ្នាទៅប្រមូលផ្តុំតវ៉ា និងដាក់ញត្តិ នៅស្ថានទូតឥណ្ឌា។
លោក ហ្សង់ហ្វ្រង់ស្វ័រ កូតង់ ឯកអគ្គរាជទូត នៃសហភាពអឺរ៉ុបប្រចាំកម្ពុជា មិនទាន់ឆ្លើយតបបែបណា ជុំវិញការតវ៉ារបស់សកម្មជនខាងលើទេ។ តែញត្តិតវ៉ា ៤ ទំព័រនោះ ត្រូវបានតំណាងសហភាពអឺរ៉ុបទទួលយកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ