របេងស៊ាំថ្នាំច្រើនមុខពិបាកព្យាបាល និងត្រូវការពេលយូរ
ចុះផ្សាយនៅថ្ងៃ៖
ស្តាប់ - ០៨:២០
ថ្ងៃទី ២៤មីនា ជាទិវាពិភពលោកប្រយុទ្ធប្រឆាំងនឹងជំងឺរបេង។ នាឱកាសនេះអង្គការសុខភាពពិភពលោក បានអំពាវនាវឱ្យមានការសន្យាថ្មី សកម្មភាពថ្មី សម្រាប់ប្រយុទ្ធប្រឆាំងនឹងជំងឺឆ្លងមួយនេះ។ អង្គការសុខភាពពិភពលោក បានកំណត់យុទ្ធសាស្ត្រ ដ៏មានមហិច្ឆតា រយៈពេល២០ឆ្នាំ (២០១៦-២០៣៥) កាត់បន្ថយការស្លាប់ដោយជំងឺរបេងឱ្យបានដល់៩៥% កាត់ ឈឺចាប់បង្កឡើង ជំងឺរបេង ឱ្យបាន៩០% និងគ្មានគ្រួសារអ្នកជំងឺណាត្រូវរីងរៃ ហិនហោចថវិកា ដើម្បីព្យាបាលខ្លួនពីជំងឺរបេងឡើយ។ សម្រាប់បច្ចុប្បន្ននេះ ថ្វីបើមានការជឿនលឿនខ្លាំង ពិភពលោកកំពុងឈានទៅសម្រេចកម្មវត្ថុសហវត្សរ៍ក៏ដោយ ក៏របេងនៅតែមានបន្តចម្លង និងសម្លាប់អ្នកជំងឺច្រើនជាងគេនៅលើពិភពលោក ជាពិសេសជំងឺរបេងដែលមានការស៊ាំនឹងថ្នាំព្យាបាល។
តើគេអាចស្រមៃបានទេ ទៅថ្ងៃអនាគត ពិភពលោក នឹងគ្មានជំងឺរបេង ?! ការប្រយុទ្ធប្រឆាំងនឹងជំងឺរបេងនេះ មានការជឿនខ្លាំងគួរកត់សម្គាល់ខ្លាំងណាស់ នារយៈពេលប៉ុន្មានឆ្នាំចុងក្រោយនេះ។ ពិភពលោកកំពុងឈានទៅសម្រេចកម្មវត្ថុរបស់ខ្លួនហើយ ! ប៉ុន្តែនៅមិនគ្រប់គ្រាន់ទេ ត្រូវប្រឹងប្រែងបន្ថែមទៀត ព្រោះបើតាមតួលេខ មានមនុស្សប្រមាណ៩លាននាក់មានផ្ទុកជំងឺរបេង នៅឆ្នាំ ២០១៣ ក្នុងនោះ៤៨០០០០នាក់ជាអ្នកឆ្លងថ្មី និង១លាននាក់កន្លះបានស្លាប់។
ហេតុដូច្នេះហើយបានជា អង្គការសុខភាពពិភពលោកនៅតែចាត់ទុកការប្រយុទ្ធប្រឆាំងនឹងជំងឺរបេងនេះ ជាបញ្ហាចម្បងមួយនៅឡើយ និងជំរុញឱ្យដៃគូសុខាភិបាល ដៃគូនយោបាយរដ្ឋាភិបាល បង្កើនសកម្មភាព ដើម្បីសម្រេចគោលដៅសហវត្សរ៍។ បើពុំនោះទេជំងឺរបេង ជាពិសេសរបេងស៊ាំថ្នាំ នឹងអាចសម្លាប់មនុស្សអស់៧៥លាននាក់ ក្នុងរយៈពេលតែ៣៥ឆ្នាំ ពោលគឺពីពេលនេះ ដល់ឆ្នាំ២០៥០។ ឯផលប៉ះពាល់ផ្នែកសេដ្ឋកិច្ចពិភពលោកវិញ នឹងមានការខាតបង់ជាថវិកាអស់ប្រមាណ១៦៧០០ពាន់លានដុល្លារអាមេរិក។ នេះបើយោងតាមរបាយការណ៍ប្រទេសអង់គ្លេសចេញផ្សាយនៅក្នុងថ្ងៃអង្គារទី ២៤មីនា២០១៥ ដែលជាទិវាពិភពលោកប្រយុទ្ធប្រឆាំងនឹងជំងឺរបេងផ្ទាល់តែម្តង។
គេហៅជំងឺរបេងថាស៊ាំនឹងថ្នាំ នៅពេលដែល ថ្នាំព្យាបាលជំងឺរបេងធម្មតា ចំនួនចាប់ពីពីរមុខ (Isoniazide និងRifampicine)ឡើងទៅ លែងមានប្រសិទ្ធិភាពចំពោះអ្នកជំងឺ។ ការស៊ាំថ្នាំនេះ បណ្តាលមកពីការព្យាបាលមិនបានត្រឹមត្រូវ លេបថ្នាំមិនជាប់លាប់ មិនគ្រប់ចំនួនតាមវេជ្ជបញ្ជា និងជួនកាលទៀតបណ្តាលមកពីគុណភាពថ្នាំមិនល្អ អាចថាជាថ្នាំក្លែងក្លាយក៏បាន។
ផលវិបាកនៃជំងឺរបេងស៊ាំថ្នាំ មានលក្ខណៈធ្ងន់ធ្ងរណាស់ ព្រោះជាបឋមអ្នកជំងឺអាចស្លាប់ និងអាចចម្លងមេរោគរបេងដែលជាពពួកស៊ាំថ្នាំទៅកាន់មនុស្សនៅជិតខ្លួន។ ចំពោះអ្នកជំងឺដែលបានទទួលការព្យាបាល ត្រូវប្រើពេលវេលាយូរខ្លាំង។ អ្នកកើតជំងឺរបេងធម្មតាអាចជាសះស្បើយបានក្នុងរវាងពី ៦ទៅ៨ខែ ឯអ្នកមានជំងឺរបេងស៊ាំថ្នាំវិញ ត្រូវចំណាយពេលព្យាបាលពី២០ទៅ ២៤ខែ ហើយអត្រាមានប្រសិទ្ធិភាពជា មានត្រឹមតែ៦០%ប៉ុណ្ណោះជាមធ្យម បើប្រៀបទៅជំងឺរបេងធម្មតាដែលអាចជាដល់ទៅ ៩០%។ ផលប៉ះពាល់សំខាន់មួយទៀត គឺថ្នាំព្យាបាលជំងឺរបេងស៊ាំថ្នាំ មានតម្លៃខ្ពស់ណាស់ ប្រមាណជា២០០ដងលើតម្លៃថ្នាំរបេងធម្មតា។
ការកម្ចាត់ជំងឺរបេង នៅជួបការលំបាកនៅឡើយ ដោយហេតុតែកង្វះថ្នាំវ៉ាក់សាំង។ ថ្នាំបង្ការតែមួយគត់ BCG ដែលកំពុងធ្វើចរាចរណ៍សព្វថ្ងៃនេះ មានប្រសិទ្ធិភាពអាចការពារបានតែទម្រង់ធ្ងន់ធ្ងរនៃជំងឺរបេងតែប៉ុណ្ណោះ តែមិនអាចការពារបានទាំងស្រុងជំងឺរបេងសួត ដែលជាប្រភេទជំងឺរបេងកើតមានច្រើនជាងគេនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ