ទីភ្នាក់ងារ អ.ស.ប ស្វាគមន៍ការបង្កើតគណៈកម្មការពិសេសស៊ើបអង្កេតករណីឃាតកម្មលើសពលោក ជា វិជ្ជា
ទីភ្នាក់ងារ អ.ស.ប ស្វាគមន៍ការបង្កើតគណៈកម្មការពិសេសស៊ើបអង្កេតករណីឃាតកម្មលើសពលោក ជា វិជ្ជាការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា (OHCHR Cambodia) និងអង្គការពលកម្មអន្តរជាតិខាងការងារហៅកាត់ថា (ILO) បានស្វាគមន៍ចំពោះរដ្ឋាភិបាលកម្ពុជាដែលបានសម្រេចបង្កើតគណៈកម្មការពិសេសមួយ ដើម្បីបើកការស៊ើបអង្កេតទៅលើឃាតកម្មករណីសពលោក ជា វិជ្ជា មេដឹកនាំសហជីពសេរីកម្មករនៃព្រះរាជាណាចក្រកម្ពុជា រួមនឹងសហការីរបស់លោក២រូបទៀត។ គណៈកម្មការពិសេសនេះ មានរដ្ឋលេខាធិការក្រសួងមហាផ្ទៃម្នាក់ជាប្រធាន និងអមដោយអនុប្រធានពីររូបនិងសមាជិកមួយចំនួនទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
តាមរយៈសេចក្តីថ្លែងការណ៍របស់ខ្លួន ដែលបានចេញផ្សាយកាលពីល្ងាចថ្ងៃទី២៦មិថុនា ការិយាល័យឧត្តមស្នងការទទួលបន្ទុកសិទ្ធិមនុស្សប្រចាំកម្ពុជា (OHCHR Cambodia) និងការិយាល័យអង្គការពលកម្មអន្តរជាតិខាងការងារ ហៅកាត់ថា (ILO) ប្រចាំប្រទេសថៃ កម្ពុជា និងឡាវ បានស្វាគមន៍ចំពោះរដ្ឋាភិបាលកម្ពុជា ដែលបានសម្រេចបង្កើតគណៈកម្មការពិសេសមួយ ស៊ើបអង្កេតលើករណីឃាតកម្មសពលោក ជា វិជ្ជា និងសហការីពីរនាក់ទៀត។
សេចក្តីថ្លែងការណ៍របស់ទីភ្នាក់ងារអង្គការសហប្រជាជាតិទាំងពីរសង្ឃឹមថា គណៈកម្មការអន្តរក្រសួងមួយនេះ នឹងខិតខំប្រឹងប្រែងស្វែងរកជនដៃដល់ពិតប្រាកដ ដែលបានប្រព្រឹត្តអំពើឧក្រិដ្ឋកម្មនេះ មកផ្តន្ទាទោសតាមច្បាប់បាន។ សេចក្តីថ្លែងការណ៍បានបញ្ជាក់ទៀតថា តាមរយៈគណៈកម្មការពិសេសនេះ គេនឹងរកឃើញយុត្តិធម៌នៅទីបញ្ចប់ ស្របតាមការប្តេជ្ញាចិត្តរបស់ប្រទេសកម្ពុជាទាំងនៅកម្រិតជាតិ និងកម្រិតអន្តរជាតិ។
សូមបញ្ជាក់ថា កាលពីថ្ងៃទី១០មិថុនា កន្លងទៅ លោកនាយករដ្ឋមន្ត្រី ហ៊ុន សែន បានសម្រេច បង្កើតគណៈកម្មការអន្តរក្រសួងមួយ ដើម្បីបើកការស៊ើបអង្កេត ទៅលើបណ្តឹងលេខ២៣១៨ ករណីឃាតកម្មលើសពលោក ជា វិជ្ជា ប្រធានសហជីពសេរីកម្មករនៃព្រះរាជាណាចក្រកម្ពុជា និងសហការីពីររូបទៀតរបស់លោក គឺ លោក រស់ សុវណ្ណារ៉េត និងលោក ហ៊ី វុទ្ធី។
លោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា ដែលត្រូវបានឃាតកបាញ់សម្លាប់កាលពីថ្ងៃទី២២ ខែមករាឆ្នាំ២០០៤ នៅពេលដែលលោកកំពុងអានកាសែតនៅក្បែរវត្តលង្កាក្នុងរាជធានីភ្នំពេញ។ ចំណែកឯលោក រស់ សុវណ្ណារ៉េត សហការីរបស់លោក ជា វិជ្ជា និងជាប្រធានសហជីពប្រចាំនៅរោងចក្រ កុមារទុងហ្គា ត្រូវបានឃាតករបាញ់សម្លាប់នៅ៣ខែបន្ទាប់។ ហើយ៣ឆ្នាំក្រោយមក ឃាតកក៏បានបន្តបាញ់សម្លាប់ លោក ហ៊ី វុទ្ធី អតីតប្រធានសហជីពសេរីកម្មករជាបន្តទៀត។ លោក ជា វិជ្ជា ដែលក្រុមកម្មករកម្មការិនីនៅកម្ពុជាចាត់ទុកថា ជាវីរជននោះ បានចេញមុខដឹកនាំកម្មករធ្វើបាតុកម្មយ៉ាងផុសផុលក្នុងអំឡុងឆ្នាំ២០០០-២០០៤។ បាតុកម្ម ដើម្បីទាមទារសិទ្ធិនិងលក្ខ័ណ្ឌការងារកាន់តែប្រសើរឡើង។ ពីឆ្នាំ២០០៤ រហូតមកទល់នឹងចុងខែមិថុនាឆ្នាំ២០១៥នេះ ឃាតករពិតប្រាកដមិនទាន់ត្រូវបានគេរកឃើញនៅឡើយទេ បន្ទាប់ពីឃាតករសិប្បនិមិត្តពីររូប គឺលោក ប៊ន សំណាង និងលោកសុខ សំអឿន ត្រូវបានគេដោះលែងវិញ។
គណកម្មការពិសេសដែលរដ្ឋាភិបាលទើបបង្កើតនេះ រួមមានរដ្ឋលេខាធិការក្រសួងមហាផ្ទៃម្នាក់ជាប្រធាន អមដោយអនុប្រធានពីររូបមកពីក្រសួងការងារនិងក្រសួងយុត្តិធម៌ និងមានសមាជិកមួយចំនួនទៀតមកពីទីស្តីការគណៈរដ្ឋមន្ត្រី១រូប អគ្គស្នងការនគរបាលជាតិ មេបញ្ជាការកងរាជអាវុធហត្ថលើផ្ទៃប្រទេស និងតំណាងអាជ្ញាធរពាក់ព័ន្ធជាសមាជិក។
លោក ខៀវ សុភ័ក្រ អ្នកនាំពាក្យក្រសួងមហាផ្ទៃ បានបញ្ជាក់ថា គណៈកម្មការពិសេសនេះមិនទាន់កើតចេញជារូបរាងនៅឡើយទេ ដោយគេនៅរងចាំការបញ្ជូនឈ្មោះពីក្រសួងពាក់ព័ន្ធជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ