ពិភពលោកកាន់តែព្រួយបារម្ភឡើងៗនឹងជំងឺហ្ស៊ីកា។ រីករាតត្បាតដូចលាជផ្ទុះ ជំងឺហ្ស៊ីកា ត្រូវជាប់សង្ស័យខ្លាំងថាជាភ្នាក់ងារបង្កឱ្យមានជំងឺទាក់ទងនឹងប្រព័ន្ធប្រសាទ ជំងឺហ្គីឡាំងបារ៉េ ការបង្កកំណើតមិនប្រក្រតី ទារកក្នុងផ្ទៃអាចស្លាប់ ឬកើតមកមានក្បាលតូចខុសធម្មតា។ ហ្ស៊ីកាបង្កឡើងតាមរយៈមូសខ្លាខាំ ប៉ុន្តែថ្មីៗនេះ និងជាបន្តបន្ទាប់ មានករណីឆ្លងហ្ស៊ីកា ច្រើនឡើងៗ តាមផ្លូវភេទ។
ចម្លងដោយមូសខ្លា ដូចជំងឺគ្រុនឈាម ឬឈីគុនហ្គុនយ៉ា វីរ៉ុសហ្ស៊ីកា បានចម្លងលើមនុស្សជិតពីរលាននាក់នៅប្រេស៊ីល និងបន្តរាតត្បាតដល់បីទៅ៤លាននាក់ នៅទ្វីបអាមេរិកក្នុងឆ្នាំ២០១៦។
១-តើវីរ៉ុសហ្ស៊ីកាមានប្រភពមកពីណា ? និងអាចធ្វើដំណើរទៅដល់ណា ?
ហ្ស៊ីកាជាវីរ៉ុសដែលចម្លងដោយមូសខ្លា ប្រភេទ Aedes aegypti ឬ albopictus។ ស្ថិតនៅក្នុងចង្កោមគ្រួសារជាមួយ គ្រុនឈាម ឬគ្រុនលឿង ហ្ស៊ីកាត្រូវបានរកឃើញជាលើកទីមួយនៅឆ្នាំ១៩៤៩៧ នៅលើសត្វស្វា រស់នៅក្នុងព្រៃប្រទេសអ៊ូហ្កង់ដា និងរកឃើញនៅលើមនុស្សជាលើកដំបូង នៅឆ្នាំ១៩៥២ នៅប្រទេសអ៊ូហ្កង់ដាដដែលនិងប្រទេសតង់ហ្សានី។
នៅឆ្នាំ២០០៧ មានការរាតត្បាតដំបូងនៅលើកោះ យ៉ាប់ ប្រទេសមីក្រូនេស៊ី ដែលកាលណោះមានប្រជាជនបីភាគបួនបានឆ្លងហ្ស៊ីកា។ គេបានឃើញហ្ស៊ីកាម្តងទៀត នៅខែតុលា ២០១៤-ដល់មេសា២០១៤ នៅកោះប៉ូលីណេហ្ស៊ីបារាំង ក្នុងមហាសមុទ្ទប៉ាស៊ីហ្វិក និងចុងក្រោយកាលពីខែឧសភា ២០១៥ នៅប្រទេសប្រេស៊ីល ដោយរាលដាលបន្តដល់ប្រទេសជិតខាងក្នុងទ្វីបអាមេរិកកណ្តាល។
តំបន់អាស៊ី ក៏មិនបានគេចផុតទាំងស្រុងពីជំងឺហ្សីកានេះដែរ! កម្ពុជាធ្លាប់ជួបប្រទះករណីហ្ស៊ីកាមួយករណី។ នៅថៃ មានបួនប្រាំករណី ក្នុងមួយឆ្នាំៗ គិតចាប់ពីឆ្នាំ២០១២មក។ ឥណ្ឌាប្រទេសក្តៅសើម មានមូសខ្លាគ្រប់ប្រភេទ ក៏កំពុងព្រួយបារម្ភខ្លាចមានការរាតត្បាតឆ្លងទៅដល់ដែរ។ គ្រប់ប្រទេសកំពុងស្ថិតក្នុងស្ថានភាពតានដាន ដោយប្រុងប្រយ័ត្នបំផុត។
២- ហ្ស៊ីកាជាវីរ៉ុសអាចបំផ្លែងខ្លួន ?
ការផ្ទុះឡើងលឿនជាច្រើនករណីនៅស្ទើរគ្រប់ទ្វីប អាចធ្វើឱ្យគេគិតបានថាវីរ៉ុសហ្ស៊ីកាចេះបំផ្លែងខ្លួន។ នេះបើតាមប្រសាសន៍អ្នកឯកទេសចុះផ្សាយក្នុងទំព័រទស្សនាវដ្តី New Scientist។ ប៉ុន្តែអ្នកជំនាញផ្សេងទៀត ហាក់មិនយល់ស្របតាមសម្មតិកម្មខាងលើទេ។ ការវិភាគរូបរាងហ្សែនទាំងមូលរបស់ហ្ស៊ីកា ចម្លងនៅប្រេស៊ីល បានបង្ហាញពីលក្ខណៈស្រដៀងគ្នា ស្ទើរតែទាំងស្រុងទៅនឹងមេរោគដើម ដែលជាប្រភពនៃការរាតត្បាតនៅឆ្នាំ២០១៣ និង២០១៤ ក្នុងតំបន់កោះមហាសមុទ្ទប៉ាស៊ីហ្វិក។ នេះបើតាមការសិក្សារបស់ក្រុមអ្នកស្រាវ ជ្រាវ នៅវិទ្យាស្ថានប៉ាស្ទ័រហ្គីយ៉ាន ចុះផ្សាយក្នុងទំព័រទស្សនាវដ្តីសុខភាព The Lancet។
៣- តើគេអាចសម្គាល់រោគសញ្ញាហ្ស៊ីកាបានយ៉ាងដូចម្តេចខ្លះ ?
ការចម្លងវីរ៉ុសហ្ស៊ីកាបីភាគបួន គ្មានផ្តល់រោគសញ្ញាអ្វីទាំងអស់។ ប្រសិនបើមាន រោគសញ្ញាអាចនឹងស្តែងចេញឡើងនៅរវាងបីទៅ ១២ថ្ងៃ ក្រោយមូសខាំ ដូចជា មានកន្ទួលក្រហមលើស្បែក អមដោយអាការៈក្តៅខ្លួនឬអត់។ បន្ថែមពីលើនេះទៀត គេអាចរកឃើញអាការៈសញ្ញា នឿយហត់ ឈឺក្បាល ឈឺឆ្អឹងឈឺឆ្អែង ពោលគឺដូចអាការៈសញ្ញានៃអ្នកចង់កើតគ្រុនក្តៅយ៉ាងដូច្នោះ។ វីរ៉ុសហ្ស៊ីកាក៏អាចបង្កឱ្យមានអាការៈ ក្រហមភ្នែក រលាក ឈឺភ្នែក ហើមដៃ ហើមជើង។ រោគសញ្ញាទាំងអម្បាលម៉ាននេះ ត្រូវរលុបបាត់ទៅវិញដោយឯកឯង នៅរវាងពីរទៅ៧ថ្ងៃបន្ទាប់។ នេះបើតាមការគូសបញ្ជាក់របស់អង្គការសុខភាពពិភពលោក។
ការចម្លងមេរោគ នៅលើកដំបូង មានទម្រង់ដូចជាការផ្តល់ភាពស៊ាំដល់មេរោគ មានន័យថា យើងមិនអាចមានជំងឺនៅពេលជួបវីរ៉ុសនេះជាលើកទីពីរទេ។ ហ្ស៊ីកា និងផលវិបាកមកលើមនុស្ស នៅតែពុំទាន់ត្រូវបានគេស្គាល់ច្បាស់នៅឡើយទេ។ នេះជាការទទួលសារភាពរបស់អ្នកឯកទេស។
៤- តើគេអាចវិភាគរកឃើញមេរោគហ្ស៊ីកាយ៉ាងដូចម្តេច ?
ការវិភាគឈាម វិភាគទឹកមាត់ ឬទឹកនោម អាចអនុញ្ញាតឱ្យគេរកឃើញវត្តមានវីរ៉ុសហ្ស៊ីកា។ ប៉ុន្តែគេត្រូវរួសរាន់ឆាប់ធ្វើវិភាគ ព្រោះវីរ៉ុសនេះអាចបង្ហាញវត្តមាននៅក្នុងឈាមតែក្នុងរយៈពេលបីទៅ៥ថ្ងៃ ក្រោយមូសខាំភ្លាម នៅក្នុងទឹកនោមប្រមាណ១០ថ្ងៃ និងក្នុងទឹកមាត់ ពីបីទៅ៥ថ្ងៃ។ វីរ៉ុសនេះគ្មានស្នាមដានរកឃើញនៅក្នុងទឹកដោះម្តាយ។
នៅក្នុងករណី ធ្វើវិភាគបីមុខនេះហើយ នៅតែគ្មានសញ្ញាវិជ្ជមានអ្វីទេ ប៉ុន្តែអ្នកជំងឺមានបង្កប់រោគសញ្ញាគ្រប់យ៉ាងនៃជំងឺហ្ស៊ីកា គេត្រូវបន្តវិភាគស្វែងរកទៀត តាមរយៈការវិភាគអង្គបដិបក្ស។ ការវិភាគចុងក្រោយនេះមានលក្ខណៈស្មុគស្មាញជាង និងប្រើពេលវេលាយូរ។ មិនតែប៉ុណ្ណោះ ភាពស្រដៀងគ្នានឹងជំងឺគ្រុនឈាម ឬគ្រុនឈីគុនហ្គុនយ៉ាង រឹតតែធ្វើការវិភាគកាន់តែលំបាក មិនថាក្នុងផ្នែកវែករកអាការៈសញ្ញារោគ ឬខាងវិភាគជីវសាស្ត្រទេ។
៥- តើស្ត្រីមានផ្ទៃពោះ អាចប្រឈមនឹងហានិភ័យហ្ស៊ីកាយ៉ាងណាខ្លះ ?
នេះជាកង្វល់ដ៏ចំបងបំផុត ! ថ្វីបើពុំមានភស្តុតាងផ្លូវការបញ្ជាក់មែន ប៉ុន្តែបើមានការចម្លងវីរ៉ុសហ្ស៊ីកាកំពុងពេលមានផ្ទៃពោះ អាចនឹងបង្កឱ្យទារកក្នុងផ្ទៃមានការលូតលាស់ ខួរក្បាលខុសប្រក្រតី ក្បាលតូចជ្រុល ទំហំក៏តូចខ្លាំង មានខួរក៏តិច។ ក្នុងករណីធ្ងន់ធ្ងរខ្លាំង ទារកនោះអាចស្លាប់ក្នុងផ្ទៃ ឬកើតមកស្លាប់។
នៅដើមឆ្នាំ២០១៦នេះ ក្នុងពេលដែលជំងឺហ្ស៊ីកាផ្ទុះឡើងខ្លាំង អាជ្ញាធរប្រេស៊ីលបានធ្វើជំរឿនរាប់ឃើញមានករណីទារកកើតមក មានជំងឺក្បាលតូច ដែលសង្ស័យថាបណ្តាលមកពីមានវីរ៉ុសហ្ស៊ីកា ដល់ទៅ៤ពាន់ករណីថ្មី ពោលគឺលើសឆ្នាំមុនៗដល់ទៅ ២០ទៅ៣០ដង។
ជំងឺក្បាលតូច ជាជំងឺដ៏កម្រ។ នៅសហរដ្ឋអាមេរិក គេសង្កេតឃើញមានករណីទារកកើតមកក្បាលតូចខុសប្រក្រតី ពី ២ទៅ១២ករណី ក្នុងចំណោមទារក១០០០០នាក់។ ក្បាលតូចអាចបង្កឱ្យភាពពិការជាប់នឹងខ្លួនយ៉ាងធ្ងន់ធ្ងរ មានវិបត្តិប្រព័ន្ធប្រសាទ វិបត្តិផែ្នកលូតលាស់សតិបញ្ញា វិបត្តិបញ្ញាញាណ។
“ជំងឺក្បាលតូច” អាចបង្កឡើងដោយមូលហេតុច្រើនយ៉ាង មានជាអាទិ៍ដោយហេតុមានជាតិពុល មានបញ្ហាហ្សែន ឬ ដោយមានការបង្ករោគ។ ប៉ុន្តែនៅប្រេស៊ីល ការផ្ទុះករណីទារកកើតមកមានក្បាលតូចខុសប្រក្រតី ក្រោយពីការរាតត្បាតនៃជំងឺហ្ស៊ីកា ធ្លាក់មកជួនចំពេល ចំវេលានិងចំកន្លែង ដែលអាចបញ្ជាក់បានថាមានហេតុនិងផល រវាងហ្ស៊ីកា និងការលូតលាស់មិនប្រក្រតីរបស់ទារក។
អ្នកស្រាវជ្រាវកំពុងសិក្សា ដើម្បីវែករកមើលទំនាក់ទំនងជាផ្លូវការរវាងហ្ស៊ីកានិងជំងឺក្បាលតូច ព្រមទាំងដើម្បីឆ្លើយតបឱ្យនូវសំណួរជាច្រើនដែលគ្មានចម្លើយនៅឡើយ។ « តើសុកអាចដើរតួនាទីការពារទារក ប្រឆាំងនឹងវីរ៉ុសផ្សេងទៀត ដូចយ៉ាងករណីមានប្រឆាំងនឹងវីរ៉ុសស៊ីតូមេហ្កាឡូវីរ៉ុសដែរឬអត់”។ បើតាមការពន្យល់របស់សាស្ត្រាចារ្យ Yves Ville ប្រធានមន្ទីរសម្ភពនៃមន្ទីរពេទ្យកុមារ Necker ក្រុងប៉ារីស ការបង្ករោគលើស្រ្តីមានផ្ទៃពោះអាចឬ មិនអាចចម្លងទៅឱ្យទារកបាន គឺអាស្រ័យទៅនឹងពេលវេលានៃការចម្លងមេរោគ ដែលជាអ្នកកំណត់បានថាប៉ះពាល់ដល់ទារកក្នុងផ្ទៃឬអត់ ៖ ប្រសិនបើការបង្ករោគកើតឡើងក្នុងដំណាក់កាលពរពោះត្រីមាសដំបូង ចម្លើយមានច្បាស់ បើគ្មានការចម្លងគឺកូនល្អ បើមានការចម្លងមេរោគ កូនត្រូវរលូត។ ប្រសិនបើការបង្ករោគកើតឡើងនៅត្រីមាសទីពីរឬទីបី កាន់តែក្រមាន ផលវិបាកក៏មានតិច (ដោយគ្រាន់តែធ្វើការលូតលាស់របស់ទារកក្នុងផ្ទៃយឺតយ៉ាវបន្តិច) ប៉ុន្តែអាចកែតម្រូវស្រង់ដើមបានវិញនៅកើតមក។ ចុះតើករណីវីរ៉ុសហ្ស៊ីកាមានដំណើរដូចគ្នាដែរឬយ៉ាងណា។
៦- ប្រឈមនឹងគ្រោះហ្ស៊ីកា តើស្ត្រីកំពុងមានផ្ទៃពោះ ត្រូវធ្វើដូចម្តេច ?
សារដ៏សំខាន់បំផុត ដែលបារាំង ក៏ដូចជាភ្នាក់ងារសុខាភិបាលប្រទេសដទៃមួយចំនួនធំ គឺណែនាំស្ត្រីមានផ្ទៃពោះកុំឱ្យធ្វើដំណើរទៅកាន់តំបន់មានមូសខ្លាហ្ស៊ីកា។ បើជាស្ត្រីអ្នករស់នៅក្នុងតំបន់មានការរាតត្បាតស្រេចទៅហើយ ត្រូវតាមដានសុខភាពឱ្យបានម៉ត់ហ្មត់ ក្រែងមានភាពមិនប្រក្រតីណាមួយកើតឡើង ពីកំណើត ឬដោយមេរោគ ប៉ះពាល់ឬអត់ដល់ប្រព័ន្ធប្រសាទ។
អាការៈក្បាលតូចខុសពីធម្មតា អាចកំណត់មើលដឹងតាមរយៈការធ្វើអេក្រូសាស្ត្រ នៅត្រីមាសទីពីរ ចាប់ពី១៨ទៅ២០អាទិត្យ។ នៅមានវិធីធ្វើតេស្តវិភាគម្យ៉ាងទៀត ដែលគេញែករកវីរ៉ុសហ្ស៊ីកាក្នុងទឹកភ្លោះ ដើម្បីបានដឹងថាមានការបង្ករោគឬអត់។
៧-តើហ្ស៊ីកាអាចបង្កផលវិបាកអ្វីផ្សេងទៀតដែរឬទេ ?
ការលេចឡើងនៃអាការៈសញ្ញា Guillain-Barré (SGB) ក៏ជាមូលហេតុចំបងមួយទៀតនៃការព្រួយបារម្ភដែរ។ តើអ្វីទៅជារោគសញ្ញាហ្គីឡាំង បារ៉េ ? ជារោគសញ្ញាដែលមានការប៉ះពាល់ដល់ឬសគល់នៃសរសៃញាណ អមដោយអាការៈឈឺចុកចាប់ តាមសាច់ដុំ និងនៅតាមសរសៃពួរ មានអារម្មណ៍ស្កៀបរមាស់ ស្ពឹកស្រពន់ច្រើនឬតិចប្រែប្រួលពិបាកកំណត់។ ក្រោយពីមូសហ្ស៊ីកាខាំរួចភ្លាម វីរ៉ុសចាប់ផ្តើមរីកសាយពេញខ្លួន និងដែលអាចមានសកម្មភាពរយៈពេលជាច្រើនសប្តាហ៍។ បន្ទាប់មក រោគសញ្ញា រមាស់ កន្ទួល ... នឹងត្រូវរលុប ជាបាត់ទៅវិញ សម្រាប់អ្នកជំងឺហ្ស៊ីកាភាគច្រើន ៨០%។ អ្វីដែលក្រុមគ្រូពេទ្យខ្វល់ខ្វាយបំផុត គឺវីរ៉ុសអាចវាយលុកប៉ះពាល់ដល់សាច់ដុំផ្លូវដង្ហើម រួចធ្វើឱ្យអ្នកជំងឺ ២០% ជួបការលំបាកផ្នែកដកដង្ហើម ត្រូវការជំនួយ។
រោគសញ្ញាហ្គីឡាំងបារ៉េ ជាករណីកម្រខ្លាំងណាស់ បើតាមប្រេវ៉ាឡង់គឺមានត្រឹមតែ១ឬ២ករណីក្នុងចំណោម ១សែននាក់ នៅអឺរ៉ុប។ ពាក់កណ្តាលបានផ្តើមឡើងដោយមានអាការៈសញ្ញាដូចមានការបង្ករោគ ដោយមីក្រុប បាក់តេរី ឬវីរ៉ុស ដែលជាប្រភពនៃជំងឺគ្រុនផ្តាសាយ ឬដូចទើបចាក់ថ្នាំការពាររួច។ បច្ចុប្បន្ននេះ មានអ្នកកើតជំងឺ ហ្គីឡាំងបារ៉េ ជាង៤២ករណី បង្កឡើងហ្ស៊ីកា និងដែលកំពុងស្ថិតក្រោមការតាមដានអង្កេត។
៨- តើហ្ស៊ីកាអាចចម្លងពីមនុស្សទៅមនុស្សដែរឬទេ ?
ការចម្លង មានជាសំខាន់តែតាមរយៈមូសខាំទេ ! ប៉ុន្តែភ្នាក់ងារសុខាភិបាលអាមេរិក នៅរដ្ឋតិចសាស់ ទើប បានបង្ហាញជាសាធារណៈ មានករណីចម្លងតាមផ្លូវភេទ ពីបុរសម្នាក់ដែលបានធ្វើដំណើរទៅកាន់ប្រទេសវ៉េណេស៊ុយអេឡា និងឆ្លងវីរ៉ុសហ្សីកា រួចចម្លងទៅឱ្យដៃគូ ដែលមិនបានធ្វើដំណើរទៅជាមួយផង។ ហ្ស៊ីកាឆ្លងតាមផ្លូវភេទមានរកឃើញ១៤ករណីនៅសហរដ្ឋអាមេរិក និងមួយករណីនៅប្រទេសបារាំង។ ក្រុមគ្រូពេទ្យសូមណែនាំបុគ្គលគ្រប់រូបដែលធ្វើដំណើរទៅកាន់តំបន់មានហ្ស៊ីកា ឱ្យចេះការពារខ្លួនពាក់ស្រោមអនាម័យរាល់គ្រប់ការរួមភេទ យ៉ាងហោចណាស់មួយខែដំបូង ក្រោយពីត្រលប់មកផ្ទះជួបប្រពន្ធកូនវិញ។
ការសិក្សាមួយទៀត កាលពីខែកុម្ភៈឆ្នាំ២០១៥ បានកត់សម្គាល់ឃើញថា វីរ៉ុសហ្ស៊ីកា អាចសំងំលាក់ខ្លួននៅក្នុងទឹកកាមបុរសម្នាក់ អាយុ ៤៤ឆ្នាំ រស់នៅកោះតាហ៊ីទី រយៈពេល១៥ថ្ងៃ មុននឹងផ្តល់រោគសញ្ញា។ ក៏ប៉ុន្តែអំណះអំណាងទាំងអស់នេះ មិនទាន់គ្រប់គ្រាន់ សម្រាប់ជំរុញឱ្យអាជ្ញាធរ ប្រកាសបញ្ជាក់ថាមានការចម្លងតាមផ្លូវភេទបានឡើយ។
ឯការបង្ករោគ ដែលអាចកើតឡើងបាននៅពេលសម្រាលកូនវិញ ត្រូវបានគេរកឃើញថាគ្មានផលវិបាកអ្វីប៉ះពាល់ដល់សុខភាពទារកទើបនឹងកើតទេ។ ចំណែកការចម្លងតាមរយការបញ្ជូលឈាម ពុំទាន់មានការសិក្សាបំភ្លឺអ្វីទេ តែហានិភ័យនៃការចម្លងមិនត្រូវបានច្រានចោលទាំងស្រុងឡើយ។ ហេតុដូច្នេះហើយបានជាភ្នាក់ងារសុខាភិបាលបានណែនាំបុគ្គលគ្រប់រូបទើបត្រលប់មកពីតំបន់មានការរាតត្បាតហ្ស៊ីកា កុំចូលមកផ្តល់ឈាម ក្នុងរយៈពេល២៨ថ្ងៃដំបូង។
៩-តើមានថ្នាំការពារ ឬថ្នាំព្យាបាលទេ ?
គ្មានទេថ្នាំព្យាបាល និងក៏គ្មានដែរថ្នាំវ៉ាក់សាំង ប្រាកដប្រជាអាចមានប្រសិទ្ធិភាពប្រយុទ្ធប្រឆាំងនឹងហ្ស៊ីកា។ គេត្រូវរង់ចាំយូរខែឆ្នាំទៀត។ ថ្នាំវ៉ាក់សាំងដំបូង នឹងអាចយកទៅធ្វើតេស្តសាកល្បងលើមនុស្សនៅខែកញ្ញា ២០១៦ ហើយនឹងអាចដាក់ឱ្យចរាចរណ៍បាននៅដំណាច់ឆ្នាំ។ តែនេះជាវ៉ាក់សាំងបែបADN ផលិតចេញដោយអ្នកស្រាវជ្រាវអាមេរិកនៅសកលវិទ្យាល័យ Pennsylvanie និងក្រុមហ៊ុនឱសថកូរ៉េខាងត្បូង។
១០- កម្ពុជាគួរភ័យខ្លាចហ្ស៊ីកាដែរឬទេ ?
ហ្ស៊ីកាមិនមែនជាជំងឺថ្មី សម្រាប់កម្ពុជាទេ និងគ្មានការរាតត្បាតទេរហូតមកទល់ពេលនេះ ប៉ុន្តែ ការប្រុងប្រយ័ត្នត្រូវមានជាប់ជានិច្ច។ អង្គការសុខភាពពិភពលោក បានទាញសញ្ញាអាសន្ន កាលពីដើមខែកុម្ភៈអំពីគ្រោះហានិភ័យនៃការគំរាមកំហែងហ្ស៊ីកាលើពិភពលោក។ ឯអ្នកជំនាញសុខាភិបាលវិញបានសម្តែងការព្រួយបារម្ភខ្លាំង ជាទូទៅចំពោះបណ្តាប្រទេសនៅតំបន់អាស៊ី អាស៊ីអាគ្នេយ៍ អាស៊ីខាងត្បូង នៅតំបន់ត្រូពិក សុទ្ធសឹងជាតំបន់មានមូសច្រើន និងអាចមានការចម្លងនិងរាតត្បាតលឿន ព្រោះបរិយាកាសរស់នៅគ្មានអនាម័យ រស់នៅផ្តុំប្រជៀតគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ