ក្រសួងធនធានទឹកប្រកាសពីការឡើងកម្តៅរហូតដល់៤០អង្សា
នៅក្នុងសប្ដាហ៍នេះ ចាប់ពីថ្ងៃទី១១មេសានេះ ដល់ថ្ងៃទី១៧ មេសា ស្ថានភាពអាកាសធាតុនៅក្នុងប្រទេសកម្ពុជាគឺមានសីតុណ្ហភាពចាប់ពី៣៤ ដល់៤០អង្សាសេ។ ក្នុងនោះតំបន់វាលរាបមានសីតុណ្ហភាពចាប់ពី៣៧ ដល់៤០អង្សាសេ តំបន់មាត់សមុទ្រពី៣៤ដល់៣៧ អង្សាសេ និងតំបន់ខ្ពង់រាបមានសីតុណ្ហភាពចាប់ពី៣៦ដល់៣៩អង្សាសេ។ ជាមួយគ្នានេះ តំបន់ទាំងនេះអាចនឹងមានភ្លៀងកក់ខែផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ប្រឈមនឹងការឡើងកម្តៅនៅក្នុងសប្ដាហ៍នេះ ដែលកម្រិតសីតុណ្ហភាពអាចកើនឡើងចាប់ពី៣៧ ដល់៤០អង្សាក្រសួងធនធានទឹកបានអំពាវនាវឲ្យពលរដ្ឋមានការប្រុងប្រយ័ត្នចំពោះបាតុភូត ផ្ទររន្ទះនិងខ្យល់កន្ត្រាក់នៅពេលមេឃរកភ្លៀង។
គួរកត់សម្គាល់ថា ការឡើងកម្តៅនៅកម្ពុជានាពេលនេះកំពុងបង្កការព្រួយបារម្ភយ៉ាងខ្លាំងពីប្រជាពលរដ្ឋរហូត ដល់លោកនាយករដ្ឋមន្ត្រី។ លោកនាយករដ្ឋមន្ត្រី ហ៊ុន សែន ថ្លែងក្នុងឱកាសកាត់សីមាព្រះវិហារ ខេត្តព្រៃវែង បន្តអំពាវនាវ ឲ្យអភិបាលខេត្តគ្រប់ខេត្ត រួមនិងមន្ទីរធនធានទឹកបង្កើនការយកចិត្តដាក់ដោះស្រាយបញ្ហាកង្វះទឹកជូនប្រជាពលរដ្ឋរហូតដល់ពេលមានភ្លៀងធ្លាក់។
សូមបញ្ជាក់ថា ភាពរាំងស្ងួតដែលបណ្ដាលមកពីការឡើងកំដៅខ្លាំងជាងឆ្នាំមុន បាននាំឲ្យប្រជាពលរដ្ឋ ខ្វះទឹកប្រើប្រាស់នៅខេត្តមួយចំនួនដូចជា៖ បន្ទាយមានជ័យ កោះកុង កំពង់ចាម កំពង់ធំ ជាដើម។ ហើយខេត្តទាំងនេះមន្ត្រីជំនាញរបស់ក្រសួងធនធានទឹកនិងឧតុនិយម កំពុងរកដំណោះស្រាយជូនប្រជាពលរដ្ឋ។
ការជូនដំណឹងរបស់ក្រសួង មានឃុំ-សង្កាត់ ជាង៥០នៅក្នុងក្របខណ្ឌទូទាំងប្រទេសនឹងប្រឈមការខ្វះខាតទឹកប្រើ ប្រាស់ចាប់ពីខែបួនតទៅ។ កន្លងមករដ្ឋាភិបាលក៏បានចេញសារាចរមិនអនុញ្ញាត្តឲ្យពលរដ្ឋធ្វើ ស្រែប្រាំងជាលើកទី២នោះទេ ទោះតំបន់មួយចំនួននៅមានទឹកប្រើប្រាស់ក៏ដោយ។ រដ្ឋាភិបាលយល់ថា ទុកទឹកប្រើប្រាស់សម្រាប់តម្រូវការប្រចាំថ្ងៃ ព្រោះភាពរាំងស្ងួតនៅឆ្នាំនេះអូសបន្លាយរហូតដល់ចុងខែកក្កដា៕
ពាក់ព័ន្ធនឹងការឡើងកម្តៅនេះដែរ នៅប្រទេសម៉ាឡេស៊ីឯណោះវិញ រដ្ឋមន្ត្រីក្រសួងអប់រំម៉ាឡេស៊ី បានបញ្ជាឲ្យបិទសាលារៀនចំនួន២៤៩កន្លែង ដែលស្ថិតនៅភាគខាងលិចនៃប្រទេសដើម្បីការពារសុវត្ថិភាពនិងសុខភាពសិស្សខណៈកម្តៅកើនដល់៣៧អង្សាសេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ