សម្រាលកូនដោយវះកាត់ អាចប៉ះពាល់ដល់សុខភាពដែរឬយ៉ាងណា ?
ចុះផ្សាយនៅថ្ងៃ៖
ស្តាប់ - ០៩:០១
នៅប្រទេសបារាំង ស្ត្រីម្នាក់ក្នុងចំណោម៥នាក់ ផ្តល់កំណើតកូនដោយការវះកាត់ ជួនដោយភាពបន្ទាន់ និងចាំបាច់ តែជាងពាក់កណ្តាល គឺបានត្រៀមទុកជាមុន។ អាជ្ញាធរសុខាភិបាលបារាំង បានសម្គាល់ឃើញ ជម្រើសបង្កើតកូនដោយវះ បានកើនឡើងទ្វេដង។ អង្គការសុខភាពពិភពលោក ក៏បានទាញសញ្ញាអាសន្នអំពីកំណើនហួសហេតុនៃការវះបង្កើតកូនតើគេត្រូវមានអាការៈសញ្ញាបែបណាទើបត្រូវជ្រើសរើសការវះបង្កើតកូន ? ការសម្រេចវះបង្កើតកូន ដើម្បីផាសុកទាំងម្តាយនិងកូន មានគ្រោះហានិភ័យយ៉ាងណា បើប្រៀបទៅនឹងការបង្កើតកូនតាមបែបធម្មជាតិ ?!
បង្កើតកូនដោយវះកាត់ មិនមែនជាសកម្មភាពថ្មីថ្មោងសម័យវិទ្យាសាស្ត្រជឿនលឿនទេ ! វះពោះម្តាយយកកូន ធ្លាប់មានធ្វើតាំងពីសម័យ១០០ឆ្នាំមុនគ្រិស្តសករាជទៅទៀត។ នេះបើគេជឿតាមរឿងព្រេង ដែលពន្យល់អំពីកំណើតព្រះ ដែលមានលក្ខណៈអភិនិហារ ខុសពីមនុស្សលោក។
នៅក្នុងជីវិតលោកជាក់ស្តែង ការវះកាត់បង្កើតកូន ត្រូវបានអនុវត្តតាំងពីសតវត្សរ៍ទី ១៦មក និងត្រូវធ្វើឡើងចំពោះតែការឆ្លងទន្លេដែលលំបាកខ្លាំងប៉ុណ្ណោះ។ រហូតមកទល់នឹងសតវត្សរ៍ទី ២០ទៅហើយ ក៏ការកើតកូនដោយវះកាត់នៅតែតំណាងគ្រោះថ្នាក់ និងហានិភ័យដ៏ខ្ពស់ ដំឡើងអត្រាស្លាប់របស់ម្តាយនិងទារកដដែល។
ការសម្រាលកូនដោយវះកាត់ជាអ្វី ? ដូចពាក្យដែលបានហៅ ការវះកាត់បង្កើតកូន ត្រូវប្រព្រឹត្តទៅក្នុងសាលវះកាត់។ នៅក្នុងប្រតិបត្តិការវះកាត់ គេត្រូវវះសាច់ពោះ បន្ទាប់មកវះអារស្បូន ដើម្បីអាចទាញយកទារកចេញមកក្រៅបាន។ ការវះកាត់បែបនេះ តម្រូវឱ្យមានការចាក់ថ្នាំសន្តំ ដល់សន្លប់ទាំងស្រុង ឬចាក់ថ្នាំស្ពឹកមួយកំណាត់ខ្លួន ដែលជាវិធីសាស្ត្រដ៏ ពេញនិយមបំផុតនាពេលបច្ចុប្បន្ននេះ។
វិទ្យាសាស្ត្រពេទ្យកាន់តែជឿនលឿន ការបង្កើតកូនដោយការវះកាត់ ក៏មានកើនឡើងជាលំដាប់ ពីមួយឆ្នាំទៅមួយឆ្នាំ។ អត្រានៃការវះកាត់សម្រាលកូន បានឡើងដល់៣០%ជាមធ្យម។ នៅតាមមន្ទីរសម្ភពខ្លះ និងក្រុងខ្លះ ដូចយ៉ាងនៅសហរដ្ឋអាមេរិក ៣៥,៦% នៃការសម្រាលកូន ជាការវះកាត់ ២៤%នៅអឺរ៉ុប និង២៣%នៅតំបន់ប៉ាស៊ីហ្វិក មានតែទ្វីបអាហ្វ្រិកមួយប៉ុណ្ណោះ ដែលសកម្មភាពនេះមិនសូវរីកលូតលាស់ (៣,៨%) អាស៊ី ៨,៨%។
កាលពីឆ្នាំទៅអង្គការសុខភាពពិភពលោក បានទាញសញ្ញាអាសន្ន អំពីការងាកទៅជ្រើសរើសវិធីសាស្ត្រសម្រាលកូន តាមការវះកាត់ និងបានចេញអនុសាសន៍រំលឹកថា ការវះកាត់បង្កើតកូន ត្រូវតែធ្វើឡើងក្នុងករណីវេជ្ជសាស្ត្រតម្រូវប៉ុណ្ណោះ។ អង្គការសុខភាពពិភពលោក បានចេញផ្សព្វផ្សាយឯកសារមួយទាក់ទងនឹងការបង្កើតកូនដោយវះកាត់ ដោយបានបរិហារថា ការវះកាត់បង្កើតកូន បានក្លាយជាជំងឺរាតត្បាត ! គ្រូពេទ្យ កំពុងតែសម្រួលជីវិត ដោយជ្រើសរើសការវះកាត់ ព្រោះអាចដាក់ផែនការនិងកំណត់ពេលវេលាបាន។
ប្រទេសខ្លះទៀត បានបង្កើតវប្បធម៌បង្កើតកូនដោយវះកាត់ ដើម្បីសម្រួលកាលវិភាគការងារ ទាំងគ្រូពេទ្យ ទាំងអ្នកជាឪពុកម្តាយ។ ប្រេស៊ីលជាជើងឯកខាងវះកាត់សម្រាលកូនដោយមានភាគរយទៅជាង៥០%។ នេះបើតាមអង្គការសុខភាពពិភពលោកដដែល ដែលបានអះអាងថា ករណីបង្កើតកូនដោយវះកាត់ គួរមានត្រឹមជាង១០% ដើម្បីអាចកាត់បន្ថយគ្រោះមរណៈរបស់ម្តាយនិងទារក។ មានន័យថាការសម្រាលកូនជាជំងឺធម្មជាតិ ដែលម្តងម្កាលអាចមានករណីលំបាក និងគ្រោះថ្នាក់ខ្លះ ទាមទារការវះកាត់ ដើម្បីជួយសង្គ្រោះជីវិតអ្នកជាម្តាយ និងទារក។
ចុះតើពេលណាដែលត្រូវធ្វើការវះកាត់ ?
នៅប្រទេសបារាំង ស្ត្រីម្នាក់ក្នុងចំណោមស្ត្រី៥នាក់បង្កើតកូនតាមការវះកាត់។ ជួនដោយភាពបន្ទាន់ ប៉ុន្តែជិតពាក់កណ្តាល គឺជាជម្រើសដែលដឹងមុន និងបានដាក់កម្មវិធី កំណត់ថ្ងៃវះ រួចជាស្រេចហើយ។ នៅប្រទេសកម្ពុជា និន្នាការជ្រើសរើសមធ្យោបាយវះកាត់បង្កើតកូន ក៏បានកើនឡើងឥតឈប់ឈរដែរ។
តាមច្បាប់ក្បួនវេជ្ជសាស្ត្រ គ្រូពេទ្យអាចសម្រេចចិត្តធ្វើការវះបង្កើតកូន ដោយយោលទៅតាមជំហររបស់ទារកក្នុងផ្ទៃ។ ឧទាហរណ៍ ទារកមិនបង្វិលក្បាល ដែលជាហេតុនាំឱ្យកូនអាចកើតច្រាសជើង ឬក៏ទារកបង្វិលក្បាលដែរតែមិនអស់ បែរជាត្រូវស្ថិតក្នុងទទឹងពោះដែលអាចធ្វើឱ្យដំណើរការឆ្លងទន្លេជួបការលំបាក ឬប្រសូតមិនចេញ។ ទីតាំងរបស់សុក ក៏ជាមូលហេតុដ៏ចំបងមួយដែលជំរុញឱ្យគ្រូពេទ្យសម្រេចចិត្តធ្វើការបង្កើតកូនដោយវះកាត់ដែរ មានជាអាទិ៍នៅពេលសុកមកបាំងមាត់ស្បូន។ ជាធម្មតា សុកស្ថិតនៅផ្នែកខាងលើនៃស្បូន តែបើសុករំកិលមកផ្នែកខាងក្រោម ឬចំហៀង វាអាចរំខាន ឬបាំងផ្លូវមិនឱ្យទារកអាចចេញមកក្រៅបាននៅពេលប្រសូត។
ជួនកាលទៀត នៅពេលពិនិត្យផ្ទៃពោះ គ្រូពេទ្យវាស់ ទំហំក្បាលទារកក្នុងផ្ទៃ និងទំហំរង្វង់ឆ្អឹងត្រគៀកអ្នកម្តាយទៅ ឃើញអាចមានបញ្ហា ត្រគៀកតូចជាក្បាលទារកខ្លាំង គ្រូពេទ្យក៏អាចគ្រោងផែនការវះបង្កើតកូនបានដែរ បើទោះបីជាដឹងថានៅពេលប្រសូត ឆ្អឹងត្រគៀកម្តាយ អាចបើកបានបន្ថែមទៀតក៏ដោយ។
ជាចុងក្រោយ ការពរពោះកូនភ្លោះ ឬកូនច្រើនក្នុងពោះ ក៏អាចជាដើមហេតុនាំឱ្យគ្រូពេទ្យគិតគូរអំពីការបង្កើតតាមផ្លូវវះដែរ។ ប៉ុន្តែក្នុងករណីនេះ វាមិនមែនជាការចាំបាច់ត្រូវតែវះ នោះទេ។
តើត្រូវបំពេញលក្ខខណ្ឌអ្វីខ្លះ ដើម្បីអាចរៀបគម្រោងវះបង្កើតកូន ?
ជាទូទៅ នៅពេលការទម្ងន់ចូលដល់ខែទី៨ ឬ៨ខែកន្លះ គេអាចចាប់ផ្តើមកំណត់កាលបរិច្ឆេទនេះការវះបានហើយ។ ព្រោះជារយៈពេលដែលគ្រូពេទ្យអាចព្យាករបាន ថាអាចមានការលំបាកអ្វីមួយនៅក្នុងដំណើរការឆ្លងទន្លេ និងមានផលវិបាកប៉ះពាល់ដល់អ្នកជាម្តាយ ឬទារក។ ខាងក្រោមនេះ លក្ខខណ្ឌ ផ្សេងៗ ដែលនាំឱ្យយើងគិតគូររៀបចំការវះ
- ប្រសិនបើអ្នកជាម្តាយ ធ្លាប់បានឆ្លងកាត់ការវះកាត់បង្កើតកូនម្តងហើយ។ គ្រូពេទ្យអាចនឹងស្នើវះ ជាលើកទីពីរ ប៉ុន្តែលទ្ធភាពបង្កើតកូនតាមផ្លូវធម្មជាតិ អាចនឹងត្រូវលើកមកពិចារណាបានជាមួយក្រុមគ្រូពេទ្យ។
- ប្រសិនបើកូនមិនបង្វិល ហើយស្ថិតក្នុងជំហរអង្គុយ។ ការវះមិនមែនជាដំណោះស្រាយចាំបាច់ទេ តែគ្រូពេទ្យអាចផ្តល់អនុសាសន៍ ក្នុងករណីជាក់ស្តែងខ្លះ ដើម្បីបញ្ចៀសផលវិបាកខ្លាំងនៃការបង្កើតកូនដោយច្រាសជើង។
- ប្រសិនបើទារកក្នុងផ្ទៃ ធំខ្លាំង (មានទម្ងន់លើសពី ៤គីឡូក្រាមឡើងទៅ) ការបង្កើតកូនតាមផ្លូវវះកាត់ គួរតែត្រូវលើកយកពិចារណា ជាពិសេសប្រសិនបើអ្នកជាម្តាយមានជំងឺជាប់ខ្លួន ឧទាហរណ៍ជំងឺទឹកនោមផ្អែម។
- ប្រសិនបើជាកូនភ្លោះ គេអាចគិតគូរជ្រើសរើសការវះកាត់ ដោយផ្អែកទៅតាមស្ថានភាពទារក តែមិនមែនត្រូវវះជាស្វ័យប្រវត្តិឡើយ
- ប្រសិនបើអ្នកជាម្តាយ មានផ្ទុកមេរោគឆ្លង ដូចជា ស៊ីដា រលាកថ្លើមប្រភេទសេ ឬបេ។ ការបង្កើតកូនដោយវះពោះ ជាការចាំបាច់ ដើម្បីបញ្ចៀសគ្រោះឆ្លងមេរោគទាំងនោះពីម្តាយទៅកូន នៅពេលប្រសូតតាមទ្វារមាស។
- ជាករណី និងជាផលវិបាកដ៏កម្រ គឺបញ្ហាទីតាំងសុកដែលអាចមកបាំងមាត់ស្បូន ឃាំងមិនឱ្យដំណើរការប្រសូតប្រព្រឹត្តទៅបាន។ បើមើលឃើញស្ថានភាពបែបនេះ គ្រូពេទ្យចាំបាច់ និងជាដាច់ខាតត្រូវរៀបចំគម្រោងវះកាត់ ដើម្បីសង្គ្រោះជីវិតម្តាយផង និងជីវិតទារក។
តើការវះកាត់បង្កើតកូន មានហានិភ័យយ៉ាងណា ?
រាល់គ្រប់សកម្មភាពវះកាត់ មិនថាជាការវះកាត់ធំ ឬតូច ធ្ងន់ឬស្រាលទេ សុទ្ធតែមានហានិភ័យ !
យ៉ាងណាមិញ ការវះបង្កើតកូន ក៏ជាប្រតិបត្តិការវះកាត់ ! នៅក្នុងអំឡុងពេលវះនោះ សរីរាង្គ ក្នុងពោះនៅជិតៗស្បូន ដូចជា ពោះវៀន ផ្លូវបញ្ចេញទឹកមូដ សរសៃឈាមតូចៗ ... អាចនឹងត្រូវប៉ះទង្គិច និងត្រូវរងរបួស ដំបៅ ជាំ ឬរលាក។ ថ្វីបើជាការកម្រក៏ដោយ តែវាអាចកើតឡើងបានប្រសិនបើ មានជ្រុលជ្រួសបន្តិចបន្តិច និងជាយថាហេតុណាមួយ។ ដូច្នេះចាំបាច់ត្រូវប្រុងប្រយ័ត្ន និងចាំបាច់ត្រូវមានការត្រួតពិនិត្យតាមដានសុខភាព ក្រោយការវះកាត់ដោយពិសេសតែម្តង។
ការហូរឈាម ! នៅក្នុងករណីមានការហូរឈាមច្រើនខុសប្រក្រតី ចេញពីស្បូន ដែលអាចប៉ះពាល់ដល់ជីវិត អ្នកជំងឺ (ស្ត្រីកំពុងឆ្លងទន្លេ) គេត្រូវតែបញ្ចូលឈាម។
ក្រោយការវះកាត់។ ២៤ម៉ោងដំបូង ជាពេលវេលាដែលមានការឈឺចុកចាប់ខ្លាំងណាស់ និងទាមទារត្រូវមានការផ្តល់ថ្នាំបំបាត់ការឈឺចាប់ខ្លាំង។ ស្ត្រីជាម្តាយអាចមានស្នាមជាំ ការបង្ករោគលើស្នាមវះ។ របួសនេះត្រូវការព្យាបាលក្រៅៗទេ។ ជាចុងក្រោយ ការវះបង្កើតកូន អាចនឹងបង្កឱ្យមានការរលាកផ្លូវទឹកនោមបន្តិចបន្តួច ប៉ុន្តែមិនមែនជាជំងឺអ្វីធ្ងន់ធ្ងរ គួរឱ្យព្រួយបារម្ភខ្លាំងឡើយ គ្រាន់តែត្រូវការថែរក្សាខ្លួននិងប្រុងប្រយ័ត្នខ្លាំងបន្តិចជាង ការបង្កើតកូនតាមបែបធម្មជាតិប៉ុណ្ណោះ។
ការព្យាបាល ! មានករណីពិសេសខ្លះ ក្រោយការវះកាត់បង្កើតកូនហើយ គ្រូពេទ្យបានផ្តល់ការថ្នាំព្យាបាល ប្រឆាំងនឹងការឆាប់កកឈាម ក្នុងរយៈពេលស្នាក់នៅក្នុងមន្ទីរសម្ភព ដើម្បីកាត់បន្ថយគ្រោះមានដុំកំណកឈាម ក្នុងសរសៃវែន នៅជើង ឬស្ទះប្រហោងសរសៃឈាមembole នៅសួត។
ការវះបន្ទាន់
ការវះ អាចជាជម្រើសជាបន្ទាន់ និងដ៏ប្រពៃដើម្បីសង្គ្រោះជីវិតម្តាយ-កូន នាពេលឆ្លងទន្លេ។ ពាក្យថាឆ្លងទន្លេ ជំងឺធម្មជាតិ តែក៏ជាវេលានៃគ្រោះភ័យសម្រាប់ស្ត្រី និងក្រុមគ្រួសារមួយចំនួនដែរ ប្រសិនបើកូនចង់ចេញហើយ តែស្បូនម្តាយមិនបើក ឬប្រសិនបើទារកចាប់ខ្សោយ ថប់ដង្ហើម ឬប្រសិនបើ សុករបូតដាច់ពីផ្ទៃស្បូន ឬពេលខ្លះទៀតអ្នកជាម្តាយស្រាប់តែមានអាការៈឡើងឈាមធ្ងន់ធ្ងរពេលកំពុងសម្រាល ដែលជីវិតអ្នកទាំងពីរត្រូវរងការគំរាមកំហែងយ៉ាងខ្លាំង។ មានតែការវះកាត់បង្កើតទារកទាន់ពេលវេលាទេ ដែលអាចសង្គ្រោះជីវិតអ្នកទាំងពីរបាន។
ផលវិបាកនៃការវះបង្កើតកូនបែបនេះ មិនមែនមានត្រឹមរូបរាងខាងក្រៅឡើយ ដែលជាការឈឺចុកចាប់ទេ តែបើទោះបីជាបានត្រៀមទុកជាមុនក្តី ក៏ជាញឹកញយតែងប៉ះពាល់ដល់ផ្លូវចិត្ត ដល់ស្ត្រីខ្លះឱ្យពិភលជាប់ក្នុងចិត្ត ទាំងមុន និងបន្ថែមការលំបាកមួយចំនួន នៅពីរបីថ្ងៃដំបូងភ្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ