កម្ពុជានាំចេញផលិតផលកសិកម្មចំនួន៦៦មុខទៅកាន់ទីផ្សារអន្តរជាតិនៅក្នុងឆ្នាំ២០១៥
ផលិតផលកសិកម្មចំនួន៦៦ មុខ ត្រូវបាននាំចេញទៅកាន់ទីផ្សារនៅក្នុងតំបន់ និងពិភពលោក នៅក្នុងឆ្នាំ២០១៥ មានការកើនឡើងចំនួន ២០% ប្រៀបធៀបកាលពីឆ្នាំ២០១៤ ដែលមានត្រឹមតែ៤៧មុខប៉ុណ្ណោះ។ របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ ដែលបានចេញផ្សាយកាលពីថ្ងៃទី ១១ ឧសភាម្សិលមិញ ក្នុងឱកាសបើកសន្និបាទបូកសរុបការងារឆ្នាំ២០១៥-២០១៦ និងលើកទិសដៅឆ្នាំ២០១៦-២០១៧ បានឲ្យដឹងថា ផលិតផលកសិកម្មទាំង ៦៦មុខនោះមានចំនួនប្រមាណ ៤ពាន់១៥៧ លានតោន។
ចុះផ្សាយនៅថ្ងៃ៖
ស្តាប់ - ០២:១១
ក្រសួងកសិកម្ម រុក្ខាប្រមាញ់ និងនេសាទ បានរៀបចំកម្មវិធីសន្និបាតបូកសរុបការងាររបស់ខ្លួនក្នុងរយៈពេលពីរថ្ងៃ គឺចាប់ពីថ្ងៃទី ១១ ដល់ ១២ ឧសភានេះ។ ក្នុងឱកាសបើកសន្និបាទ កាលពីថ្ងៃម្សិលមិញ លោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបង្ហាញរបាយការណ៍ជាច្រើនទាក់ទងនឹងការងាររបស់ក្រសួង នៅក្នុងឆ្នាំ២០១៥ ធៀបនឹងឆ្នាំ២០១៤។
លោករដ្ឋមន្ត្រីវេង សាខុន បានឲ្យដឹងថា ក្នុងឆ្នាំ២០១៥ កន្លងទៅ កសិកម្មកម្ពុជា បានប្រឈមទៅនឹងភាពមិនប្រក្រតីនៃ បាតុភូតធម្មជាតិ ពិសេសគ្រោះរាំងស្ងួត ការកើនឡើងកម្តៅ ហើយបានបង្កផលប៉ះពាល់លើផ្ទៃដីបង្កបង្កើនផលដំណាំស្រូវជាង ២៥៣ ពាន់ហិកតា។ ក្នុងនោះខូចខាតទាំងស្រុង ប្រមាណជា ២៦ ពាន់ហិកតា។ ការបង្កបង្កើនផលស្រូវនៅទូទាំងប្រទេសក្នុងឆ្នាំ២០១៥-២០១៦ មានកម្រិតទាបជាងឆ្នាំមុនប្រមាណជា ០,១៣% ។ ដោយឡែកការនាំអង្ករសម្រេចបានចំនួនជាង ៥៣៨ ពាន់តោន ទៅកាន់ប្រទេសចំនួន ៦០ ជាពិសេសបណ្តាប្រទេសក្នុងសហភាពអឺរ៉ុប អាស៊ាន និងប្រទេសចិន។
លោករដ្ឋមន្ត្រីកសិកម្មក៏បានបញ្ជាក់ពី អង្ករពូជក្រអូបផ្ការំដួលកម្ពុជា ដែលត្រូវបានពិភពលោកទទួលស្គាល់ជាអង្ករល្អ បំផុតនៅក្នុងពិភពលោករយៈពេលបីឆ្នាំជាប់ៗគ្នាផងដែរ គឺនៅឆ្នាំ២០១២ ២០១៣ និង ២០១៤។ ហើយការនាំចេញកៅស៊ូស្ងួតវិញគឺមានបរិមាណជាង ១២៨ ពាន់តោន កើនលើសឆ្នាំមុនប្រមាណ ២៨,៨% ។ លោកក៏បានបន្តឲ្យដឹង ទៀតដែរថា ផលិតកម្មដំណាំរួមផ្សំ និងដំណាំឧស្សាហកម្មសំខាន់ៗ ក៏មានការកើនឡើងលើសឆ្នាំមុនដែរ ហើយក៏កំពុងតែរីកចម្រើនជាបន្តបន្ទាប់ ជាលក្ខណៈគ្រួសារ និងជាលក្ខណៈវិនិយោគខ្នាតតូច មធ្យម និងធំ ដែលមានដូចជាកៅស៊ូ ស្វាយចន្ទី ដំណាំឈើហូបផ្លែផ្សេងៗ និងចំការជាដើម។
ក្រៅពីបង្ហាញពីតួលេខនេះហើយ លោករដ្ឋមន្ត្រីក៏បានបង្ហាញនូវការពិភាក្សាចំនួន១១ចំណុចសំខាន់ៗផងដែរ ដើម្បីឲ្យ អង្គសន្និបាតធ្វើការពិចារណា ដើម្បីចូលរួមចំណែកក្នុងការដោះស្រាយ និងចូលរួមលើកកម្ពស់វិស័យកសិកម្មនៅកម្ពុជាឲ្យកាន់តែមានភាពល្អប្រសើរឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ