លោក ហ៊ុន សែន ឡើងជាប្រធានបក្សប្រជាជន អមដោយអនុប្រធានថ្មីដល់ទៅពីររូប
នៅព្រឹកថ្ងៃសៅរ៍នេះ គណៈកម្មាធិការកណ្តាលរបស់គណបក្សប្រជាជនកម្ពុជា បានរៀបចំសន្និបាតលើកទី៣៨ ដើម្បីបោះឆ្នោតជ្រើសរើសប្រធាន និងអនុប្រធានថ្មីនៅទីស្នាក់ការកណ្តាលរបស់ខ្លួនក្នុងរាជធានីភ្នំពេញ។ បន្ទាប់ពីបោះឆ្នោត លោកនាយករដ្ឋមន្ត្រី ហ៊ុន សែន បានជាប់ឆ្នោតធ្វើជាប្រធានគណបក្សប្រជាជនកម្ពុជា ខណៈដែលលោក សាយ ឈុំ និង លោក ស ខេង ជាប់ជាសហអនុប្រធាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
ការជ្រើសរើសថ្នាក់ដឹកនាំកំពូលនេះ បានធ្វើឡើងតាមរយៈការបោះឆ្នោតជាសំងាត់ និងជាកញ្ចប់ ដោយមានសមាជិកគណៈកម្មាធិការកណ្តាលគណបក្សប្រជាជនកម្ពុជាចំនួន ៥០៧ រូបបានចូលរួមបោះឆ្នោត។ ក្នុងនោះ សមាជិកចំនួន ៥០៦ រូប បានបោះឆ្នោតគាំទ្រលោហ៊ុន សែន ធ្វើជាប្រធាន និង គាំទ្រលោក សាយ ឈុំ និងលោកស ខេង ធ្វើជាសហអនុប្រធានថ្មីរបស់គណបក្ស។
លោកសុខ ឥសាន អ្នកនាំពាក្យគណបក្សប្រជាជនកម្ពុជា បានពន្យល់ថា មូលហេតុដែលគណបក្សជ្រើសរើសអនុប្រធានដល់ទៅពីររូបនោះ គឺដើម្បីជួយកិច្ចការក្នុងគណបក្សដល់ប្រធានបក្សថ្មីលោក ហ៊ុន សែន។ លោក ហ៊ុន សែន ដែលបច្ចប្បន្នកំពុងកាន់តំណែងជានាយករដ្ឋមន្ត្រី។ អ្នកនាំពាក្យរូបនេះ បានពន្យល់បន្ថែមថា ការណ៍ដែលមិនកំណត់ឲ្យមានអនុប្រធានទី១ និងទី២នោះទៀតសោត ព្រោះថា អនុប្រធានថ្មីទាំងពីររូបនេះ គឺជាឥស្សរជនលេចធ្លោនៅក្នុងជួរគណៈកម្មាធិការអចិន្ត្រៃយ៍របស់គណបក្សប្រជាជនកម្ពុជា។ លោកថា ទោះបីមានអនុប្រធានដល់ទៅពីរក្តី តែរចនាសម្ព័ន្ធដឹកនាំគណបក្សនៅតែដដែល។
គួរបញ្ជាក់ថា ការបោះឆ្នោតជ្រើសរើសថ្នាក់ដឹកនាំកំពូលថ្មីរបស់គណបក្សប្រជាជនកម្ពុជាគឺបានធ្វើឡើងតែមួយថ្ងៃប៉ុណ្ណោះ បន្ទាប់ពីសពលោក ជា ស៊ីម បានបូជារួចរាល់កាលពីថ្ងៃទី១៩ មិថុនា ម្សិលមិញ។ លោក សុខ ឥសាន បានបញ្ជាក់ថា គណបក្សប្រជាជនកម្ពុជាបានសម្រេចដករូបលោកជា ស៊ីម ចេញពីផ្ទាំងឃោសនាគណបក្ស ដោយរក្សាទុកតែរូបលោកហ៊ុន សែន និង លោក ហេង សំរិន ដែលជាប្រធានកិត្តិយសគណបក្សប៉ុណ្ណោះ។ អ្នកនាំពាក្យគណក្សកាន់អំណាចក៏បានគូសបញ្ជាក់ឲ្យដឹងផងដែរថា ថ្វីបើលោកសាយ ឈុំ ក្លាយជាអនុប្រធានបក្សក្តី តែលោកនៅតែកាន់តំណែងជាអគ្គលេខាធិការគណបក្សប្រជាជនកម្ពុជាដដែល។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ មិនបានអត្ថាធិប្បាយយ៉ាងណាទេចំពោះការជ្រើសរើសថ្នាក់ដឹកនាំកំពូលរបស់គណបក្សដែលជាគូប្រកួតប្រជែងរបស់ខ្លួននេះ ដោយ លោក លើកហេតុផលថា វាជារឿងផ្ទៃក្នុងរបស់គណបក្សប្រជាជនកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ