អគ្គលេខាធិការរដ្ឋសភានឹងត្រូវសួរនាំដោយគណៈកម្មការទី២នៅសប្តាហ៍ក្រោយ
អគ្គលេខាធិការរដ្ឋសភា ត្រូវបានកោះអញ្ជើញដោយប្រធានគណៈកម្មការទី២រដ្ឋសភា លោក ជាម យៀប ចូលរួមប្រជុំនៅថ្ងៃទី១០ មីនា ខាងមុខ លើប្រធានបទលទ្ធកម្មសាធារណៈ។ ការចេញលិខិតអញ្ជើញរបស់ប្រធានគណៈកម្មការទី២ដូច្នេះ បានធ្វើឡើងតបតាមលិខិត របស់លោកសុន ឆ័យ អនុប្រធានគណៈកម្មការទី២រដ្ឋសភាដែលបានស្នើកន្លងមកទាក់ទងទៅនឹងការចាយវាយ និងការដេញថ្លៃការងារនានារបស់អគ្គលេខាធិការដ្ឋានរដ្ឋសភា។
ចុះផ្សាយនៅថ្ងៃ៖
ស្តាប់ - ០១:៥១
អ្នកតំណាងរាស្ត្រមកពីគណបក្សសង្គ្រោះជាតិ លោកសុន ឆ័យ ថ្លែងប្រាប់វិទ្យុបារាំងអន្តរជាតិ RFI នៅថ្ងៃនេះថា ការប្រកាសបើកកិច្ចប្រជុំមួយរបស់គណៈកម្មការទី២នៃរដ្ឋសភាទាក់ទង ទៅនឹងលទ្ធកម្មសាធារណៈ តបតាមការស្នើសុំរបស់លោកគឺជានីតិវិធីដែលគណៈកម្មការនានា របស់រដ្ឋសភាត្រូវតែធ្វើ ដោយមិនខ្លាចប៉ះពាល់ដល់ផលប្រយោជន៍បុគ្គល ឬគណបក្ស ណាឡើយ។
ការថ្លែងដូច្នេះរបស់អ្នកតំណាងរាស្ត្របក្សប្រឆាំង បានធ្វើឡើងបន្ទាប់ពីមានការបង្ហាញលិខិត
មួយច្បាប់របស់លោកជាម យៀប ប្រធានគណៈកម្មការទី២ ចុះថ្ងៃទី២មីនា ហើយទើបតែដល់ដៃ អ្នកសារព័ត៌មាន ដែលក្នុងលិខិតនោះគណៈកម្មការទី២ បានកោះអញ្ជើញអគ្គលេខា
ធិការរដ្ឋសភាចូលរួមកិច្ចប្រជុំនៅថ្ងៃទី១០មីនាខាងមុខ។
កាលពីខែមុនការផ្តល់សិទ្ធិដល់ក្រុមហ៊ុនក្នុងការធ្វើបង្គោលទង់ជាតិ និងការដេញថ្លៃផ្សេងៗ
ទៀត រួមទាំងការចាយវាយរបស់រដ្ឋសភាផងដែរ ត្រូវបានលើកឡើងដោយលោក សុន ឆ័យ
អនុប្រធាននៃគណៈកម្មការទី២រដ្ឋសភា ដែលនេះជាសំណួរដែលត្រូវទទួលចម្លើយនៅក្នុង
កិច្ចប្រជុំខាងមុខ។
លើសពីនេះ លោក សុន ឆ័យក៏បានត្រៀមផងដែរពីការចោទសួរទាក់ទងទៅនឹងការតែងតាំង សមាជិកគ្រួសារ ដោយសំដៅទៅលើលោកមិត្ត ការ៉េន អគ្គលេខាធិការង ដែលមានសាច់ញាតិជាច្រើនបម្រើការងារនៅអគ្គលេខាធិការដ្ឋានរដ្ឋសភា។ លោកឡេង ប៉េងឡុង មិនអាចសុំការពន្យល់បានទេនៅថ្ងៃនេះ។
ក្នុងគោលបំណងកែលម្អស្ថាប័នរដ្ឋសភា កាលពីខែតុលាឆ្នាំទៅ លោកសុន ឆ័យ បានសរសេរលិខិតទៅប្រធានរដ្ឋសភាលោកហេង សំរិន ដើម្បីស្នើសុំព្យួរការងារលោកឡេង ប៉េងឡុង
ដោយយល់ថា អគ្គលេខាធិការរដ្ឋសភារូបនេះ មិនបានឆ្លើយតបទាក់ទងទៅនឹងអ្វីដែលលោក លើកឡើងថាមានភាពមិនប្រក្រតីនៅក្នុងអគ្គលេខាធិការដ្ឋានរដ្ឋសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ