គណៈកម្មការរដ្ឋសភាចំនួន៣ បញ្ចប់ការពិនិត្យពិភាក្សាលើសេចក្ដីព្រាងច្បាប់អង្គការ
នៅព្រឹកថ្ងៃពុធនេះ គណៈកម្មការរដ្ឋសភាចំនួន៣ បានបញ្ចប់ការពិភាក្សាលើសេចក្ដីព្រាងច្បាប់ស្ដីពីសមាគមនិងអង្គការមិនមែនរដ្ឋាភិបាលហើយ ដោយសម្រេចតម្កល់ខ្លឹមសារនៃសេចក្ដីព្រាងច្បាប់នេះឲ្យនៅដដែល។ គួរជម្រាបថា ជំនួបនេះធ្វើឡើងបន្ទាប់ពីរដ្ឋសភាកំណត់យកថ្ងៃទី១០ខែកក្កដាខាងមុខ ដើម្បីរៀបចំសិក្ខាសាលាពិគ្រោះយោបល់លើសេចក្ដីព្រាងច្បាប់ដ៏ចម្រូងចម្រាស់នេះ។ ជាការសម្គាល់ គណៈកម្មការរដ្ឋសភាទាំង៣ ដែលជួបពិភាក្សាអំពីសេចក្ដីព្រាងច្បាប់អង្គការនេះ សុទ្ធសឹងតែជាគណៈកម្មការដែលមានប្រធានជាសមាសភាពមកពីគណបក្សកាន់អំណាច។
ចុះផ្សាយនៅថ្ងៃ៖
ស្តាប់ - ០១:៤៨
ការពិភាក្សារវាងអន្ដរគណៈកម្មការនៅរដ្ឋសភា អំពីសេចក្ដីព្រាងច្បាប់សមាគមនិងអង្គការមិនមែនរដ្ឋាភិបាល បានរៀបចំធ្វើឡើងនៅថ្ងៃពុធទី០១ ខែកក្កដានេះ នៅវិមានរដ្ឋសភា។ នៅក្នុងជំនួបនោះ គណៈកម្មការចំនួន៣ដែលចូលរួម សម្រេចតំកល់ទុកខ្លឹមសាររបស់សេចក្ដីព្រាងច្បាប់ឲ្យនៅដដែល ដោយគ្រាន់តែកែសម្រួលនូវអក្ខរាវិរុទ្ធមួយចំនួនតែប៉ុណ្ណោះ។
ជាការកត់សម្គាល់ គណៈកម្មការរដ្ឋសភាទាំង៣ ដែលជួបពិភាក្សាអំពីសេចក្ដីព្រាងច្បាប់អង្គការនេះ សុទ្ធសឹងតែជាគណៈកម្មការដែលមានប្រធានជាសមាសភាពមកពីគណបក្សប្រជាជនកម្ពុជា ដែលជាគណបក្សកាន់អំណាច។ គណៈកម្មការទាំង៣នោះរួមមាន៖ ទី១ គណៈកម្មការទទួលបន្ទុកកិច្ចការបរទេស សហប្រតិបត្តិការអន្ដរជាតិ ឃោសនាការ និងព័ត៌មាន ដែលមានលោកឈាង វុន ជាប្រធាន។ ទី២ គណៈកម្មការទទួលបន្ទុកនីតិកម្មនិងយុត្តិធម៌ ដែលមានលោក ប៉ែន បញ្ញា ជាប្រធាន។ និងទី៣ គឺគណៈកម្មការទទួលបន្ទុកមហាផ្ទៃ ការពារជាតិ និងមុខងារសាធារណៈ ដែលមានលោកហ៊ុន ណេង ជាប្រធាន។
គួរជម្រាបជូនថា ជំនួបរវាងគណៈកម្មការរដ្ឋសភាចំនួន៣នាពេលនេះ ធ្វើឡើងបន្ទាប់ពីរដ្ឋសភាបានកំណត់យកថ្ងៃទី១០ខែកក្កដា ដើម្បីរៀបចំសិក្ខាសាលាពិគ្រោះយោបល់ទៅលើសេចក្ដីព្រាងច្បាប់អង្គការដ៏ចម្រូងចម្រាស់។ រដ្ឋសភាបានអះអាងថា សិក្ខាសាលានៅថ្ងៃទី១០កក្កដានោះ នឹងមានការអញ្ជើញចូលរួមពីសំណាក់អង្គទូតនានាប្រចាំនៅកម្ពុជា អង្គការជាតិ អង្គការអន្ដរជាតិ តំណាងក្រសួងពាក់ព័ន្ធ រដ្ឋសភា និងព្រឹទ្ធសភាផងដែរ។
ការរៀបចំឲ្យមានសិក្ខាសាលាពិគ្រោះយោបល់នេះ បានទទួលការអបអរស្វាគមន៍។ ក៏ប៉ុន្តែទន្ទឹមគ្នានេះ សង្គមស៊ីវិលទទូចឲ្យមានការពិភាក្សាប្រកបដោយអត្ថន័យ មិនមែនធ្វើក្នុងរយៈពេលខ្លីដើម្បីបង្គ្រប់កិច្ចឡើយ ខណៈដែលសង្គមស៊ីវិលខ្លះទៀត ទាមទារឲ្យទម្លាក់ចោលសេចក្ដីព្រាងច្បាប់ស្ដីពីសមាគមនិងអង្គការក្រៅរដ្ឋាភិបាលនេះតែម្ដង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ