រដ្ឋសភានៅមិនទាន់មានចំណាត់ការបន្ទាប់ពីទាហ៊ាននិងសមាគមនិស្សិតបង្កើនការដាក់ញត្តិ
ញត្តិទាមទារឲ្យលោក កឹម សុខា ចុះចេញពីតំណែងអនុប្រធានទី១រដ្ឋសភាធ្លាក់មកជាបន្តបន្ទាប់ដោយដំបូងផ្ដើមចេញពីកម្លាំងទាហ៊ានប្រចាំសមរភូមិព្រំដែនកម្ពុជា ថៃ និងបន្តជាហូរហែដូចជា៖ក្រុមនិស្សិតដែលអះអាងថាជាបណ្ដាញក្រុមបញ្ញវ័ន្ត និង គណបក្សប្រជាជននៅតាមបណ្ដាខេត្តជាដើម។ តែយ៉ាងណាក៏ដោយរដ្ឋសភាថា នៅមិនទាន់បានទទួលញត្តិទាំងអស់នៅឡើយទេហើយក៏មិនទាន់បានគិតពីសំណើទាំងនេះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ខ្លឹមសាររបស់ញត្តិបង្កប់ន័យតែមួយគឺចោទប្រកាន់លោក កឹម សុខា ថាជាមនុស្ស«ឃោសនាបោកប្រាស់ ប្រជាពលរដ្ឋ ញុះញង់អុជអាលលាបព័ណ៌ បង្ករកំហឹងពូជសាសន៍នឹងឈានទៅបង្កសង្គ្រាមផ្ទៃក្នុងប្រទេស»ជាអ្វីដែលម្ចាស់ញត្តិចាត់ទុកថាមិនសមជាទង្វើរបស់ថ្នាក់ដឹកនាំនៃស្ថាប័នកំពូលរបស់ជាតិ។
ហេតុផលនេះហើយភ្លាមៗបន្ទាប់ពីបាតុកម្មទាមទារឲ្យលោក កឹម សុខា ចុះចេញពីតំណែងកាលពីថ្ងៃទី២៦តុលា ដែលបក្សប្រឆាំងថាជាទង្វើមានការរៀបចំពីគណបក្សប្រជាជនកម្ពុជាលោក គន់ គីម តំណាងទាហ៊ាននៅព្រំដែនកម្ពុជា-ថៃ បានអំពាវនាវដោយទទូចជម្រុញទៅលោក ហេង សំរិន និង អ្នកតំណាងរាស្ត្រទាំងអស់មេត្តាដកលោក កឹម សុខា ចេញពីអនុប្រធានទី១រដ្ឋសភាឲ្យបានឆាប់តាមដែលអាចធ្វើទៅបាន។ លោក គន់ គីម សង្ឃឹមទៀតថា ប្រធានរដ្ឋសភានិងតំណាងរាស្ត្រទាំងអស់នឹងចាត់វិធានការតាមការស្នើសុំរបស់លោកជាក់ជាមិនខាន។
ឈរក្រោមកំដៅថ្ងៃពីខេត្តព្រះវិហារព្រំដែនកម្ពុជា-ថៃកម្លាំងទាហ៊ានក៏បានលើកបដាចម្រុះព័ណ៌ជម្រុញលោក កឹម សុខា ចុះចេញពីដំណែង។ ដោយឡែកចំពោះញត្តិរបស់សមាគមសិស្សនិស្សិតបញ្ញាវន្តក្មេងវត្តក៏មិនខុសគ្នាប៉ុន្មានដែរពីក្រុមទាហ៊ានដោយពួកគេយល់ថាដើម្បីរក្សាបាននូវសន្តិសុខ សុវត្ថិភាព ស្ថិរភាពនៅកម្ពុជាឲ្យបានល្អប្រសើរដូចពេលបច្ចុប្បន្ននេះចាំបាច់ត្រូវបោះឆ្នោតទំលាក់លោក កឹម សុខា ចេញពីដំណែង។
គេនៅចាំមើលទៀតថាតើនឹងមានក្រសួងស្ថាប័នរដ្ឋ ឫវិស័យឯកជនណាខ្លះ? ធ្វើញត្តិគាំទ្រឲ្យលោក កឹម សុខា ចុះចេញពីតំណែងអនុប្រធានទី១រដ្ឋសភាបន្ទាប់ពីបាតុកម្មកាលពីថ្ងៃទី២៦តុលា។
ឆ្លើយតបទៅនឹងម្ចាស់ញត្តិលោក ឈាង វុន ឲ្យដឹងថាទាល់តែមានទឡ្ហីករណ៍ផ្នែកច្បាប់ច្បាស់លាស់ទើបសភាមានសិទ្ធសម្រេចលើជោគវាសនាលោក កឹម សុខា។ ម្យ៉ាងទៀតបើផ្អែកទៅតាមសិទ្ធអំណាចរបស់អ្នកតំណាងរាស្ត្រមានសិទ្ធបោះឆ្នោតជ្រើសតំណែងអនុប្រធានរដ្ឋសភាឫប្រធានសភាក៏មានសិទ្ធបោះឆ្នោតទម្លាក់វិញបានដែរ។ តែយ៉ាងក៏ដោយទាំងលោក ឈាង វុន អ្នកនាំពាក្យរដ្ឋសភានិងលោក អេង ឆៃអ៊ាង ប្រធានគណៈកម្មការទី១សភាគឺ គណៈកម្មការសិទ្ធិមនុស្សអង្កេតទទួលពាក្យបណ្តឹង និងទំនាក់ទំនងរដ្ឋសភា ព្រឹទ្ធសភានៅមិនទាន់ទទួលបានញត្តិមួយច្បាប់ណានៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ