លោក ហ៊ុន សែន ដាក់ចំណោទ៣ ឲ្យឯកអគ្គរដ្ឋទូតអាមេរិកដោះស្រាយ
ពីសួនឧស្សាហកម្មវឌ្ឍនៈ១នៅព្រឹកថ្ងៃសុក្រនេះ លោកនាយករដ្ឋមន្ដ្រី ហ៊ុន សែន បានថ្លែងអំពាវនាវឲ្យប្រជាពលរដ្ឋខ្មែរទាំងអស់ ក្រោកឈរឡើងប្រកាន់នយោបាយជាតិនិយម ការពារអធិបតេយ្យភាពរបស់កម្ពុជា ប្រឆាំងនឹងការជ្រៀតជ្រែករបស់បរទេស។ ឆ្លៀតក្នុងឱកាសនោះ ប្រមុខរដ្ឋាភិបាលកម្ពុជាមិនភ្លេចលើកឡើងពីទំនាក់ទំនងជាមួយអាមេរិកដែលកំពុងតែឡើងកម្ដៅទេ។ លោកនាយករដ្ឋមន្ដ្រី បានដាក់ចំណោទចំនួន៣ ឲ្យឯកអគ្គរដ្ឋទូតអាមេរិកដោះស្រាយ។ រឿងទាំង៣នោះរួមមាន៖ ទំនាក់ទំនងអាមេរិកជាមួយលោក កឹម សុខា, ការប្រកាសអាសន្នរបស់ស្ថានទូតពីបញ្ហាសន្តិសុខនៅស្រុកខ្មែរ, និងចុងក្រោយ ពាក់ព័ន្ធនឹងការផ្អាកទិដ្ឋាការរបស់អាមេរិកមកលើកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
នៅក្នុងសំណុំរឿងលោក កឹម សុខា។ លោកនាយករដ្ឋមន្ដ្រី ហ៊ុន សែន បានអះអាងថា កម្ពុជាមិនបានចោទអាមេរិកទេ។ គឺលោក កឹម សុខា ទេ ដែលបានថ្លែងថា បានទទួលការបណ្ដុះបណ្ដាលពីអាមេរិក ដើម្បីផ្ដួលរំលំរបបដឹកនាំនៅកម្ពុជា។ នៅក្នុងសំណុំរឿងនេះ លោក ហ៊ុន សែន ចង់ស្ដាប់ការពន្យល់បកស្រាយពីឯកអគ្គរដ្ឋទូតអាមេរិកប្រចាំនៅទីក្រុងភ្នំពេញ ថាតើសម្ដីរបស់លោក កឹម សុខា នោះ ពិតឬមិនពិត? បន្ថែមពីលើនេះ លោកនាយករដ្ឋមន្ដ្រីបានបញ្ជាឲ្យអគ្គស្នងការនគរបាលជាតិ និងអគ្គនាយកដ្ឋានអន្តោប្រវេសន៍ ស៊ើបអង្កេតលើជនជាតិអាមេរិកនៅកម្ពុជាទាំងអស់ ដើម្បីស្វែងរកអ្នកធ្វើចារកម្មនៅកម្ពុជាផងដែរ ទាំងមុន និងក្រោយឆ្នាំ២០១៣។
រឿងទី២ ទាក់ទងនឹងការប្រកាសរបស់ស្ថានទូត ដែលប្រាប់ឲ្យពលរដ្ឋអាមេរិកាំងប្រុងប្រយ័ត្នចំពោះបញ្ហាសន្តិសុខនៅស្រុកខ្មែរ។ លោក ហ៊ុន សែន នាយករដ្ឋមន្ដ្រី ចង់ដឹងពីហេតុផលនៅពីក្រោយការប្រកាសនោះ។ តើស្ថានទូតអាមេរិកមានព័ត៌មានពីគម្រោងភេរវកម្មនៅកម្ពុជា ឬអាមេរិកមានបំណងបាញ់ម៊ីសីលមកលើកម្ពុជា ឬថាការប្រកាសនោះ មានបំណងចង់បំភិតបំភ័យប្រជាជនកម្ពុជា?
បញ្ហាទី៣ ស្ដីអំពីការដាក់ទណ្ឌកម្មទិដ្ឋាការរបស់អាមេរិកមកលើកម្ពុជា, លោកនាយករដ្ឋមន្ដ្រីឆ្លើយតបទៅវិញដោយសម្រេចផ្អាកកិច្ចសហប្រតិបត្តិការរុករកអដ្ឋិធាតុទាហានអាមេរិកនៅកម្ពុជា។ ប្រសិនបើអាមេរិកចង់បន្តការរុករកអដ្ឋិធាតុទាហានអាមេរិក៤៩នាក់ទៀតដែលស្លាប់ចោលឆ្អឹងនៅស្រុកខ្មែរ ប្រមុខរដ្ឋាភិបាលកម្ពុជាសង្កត់ធ្ងន់ថា គឺទាល់តែអាមេរិកដកទណ្ឌកម្មទិដ្ឋាការលើមន្ដ្រីការទូតខ្មែរចេញវិញសិន។
បើតាមលោកនាយករដ្ឋមន្ដ្រី ហ៊ុន សែន កម្ពុជាគ្មានចេតនារករឿងអាមេរិកទេ។ ប៉ុន្តែអាមេរិកមិនត្រូវមើលកម្ពុជាក្នុងខ្សែភ្នែកអាក្រក់ ហើយក៏មិនត្រូវតាំងខ្លួនជាម៉ែឪកម្ពុជាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ