ក្រុមសហគមន៍ទំនាស់ដីធ្លីក្រុងភ្នំពេញ ដាក់លិខិតរកអន្តរាគមន៍ពីជំទាវទី១អាមេរិក
ស្រី្តតំណាងអ្នកភូមិបឹងកក់ អតីតអ្នកភូមិបឹងកក់ រួមទាំងសហគមន៍ព្រលានយន្តហោះ SOS នៅព្រឹកថ្ងៃទី១៣ មីនានេះ បានដាក់ញត្តិមួយច្បាប់ទៅកាន់ស្ថានទូតសហរដ្ឋអាមេរិកប្រចាំនៅក្រុងភ្នំពេញ ដើម្បីសុំជួបជាមួយភរិយាប្រធានាធិបតីអាមេរិកដែលគ្រោងមកទស្សនកិច្ចផ្លូវរដ្ឋជាលើកដំបូងនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:៤១
តំណាងជម្លោះដីធ្លីសហគមន៍បឹងកក់ បុរីកីឡា និងសហគមន៍ព្រលានយន្តហោះអន្តរជាតិភ្នំពេញsos ចង់ជួបជាមួយប្រពន្ធប្រធានាធិបតីអាមេរិក លោកស្រី មីឆែល អូបាម៉ាដើម្បីពិភាក្សា និងសុំយោបល់ស្តីពីជម្លោះដីធ្លីនៅក្នុងក្រុងភ្នំពេញ និងការឃុំខ្លួនសកម្មជនដីធ្លី រួមទាំងអ្នកនយោបាយ។
ក្នុងលិខិតដែលមានស្នាមមេដៃអ្នកតំណាងជាស្ត្រី៤នាក់ បញ្ហាជម្លោះដីធ្លីនៅទីក្រុងភ្នំពេញក្នុងតំបន់បឹងកកក់ និងតំបន់ជិតព្រលានយន្តហោះអន្តរជាតិភ្នំពេញ រួមទាំងការឃុំខ្លួនសកម្មជនបឹងកក់ អ្នកស្រីទេព វណ្ណីជាដើម គឺជាខ្លឹមសារពីរសំខាន់ក្នុងលិខិតរបស់អ្នកតំណាងជម្លោះដែលបានដាក់ទៅកាន់ស្ថានទូតអាមេរិកប្រចាំនៅកម្ពុជា។ ជាមួយអំណះអណាងនេះ ស្រី្តអ្នកតំបន់ជម្លោះដីធ្លីទាំងអស់រំពឹងថា ខ្លួននឹងមានឱ្យកាសជួបជាមួយជំទាវទី១ដែលជាភរិយាប្រធានាធិបតីអាមេរិកំពុងកាន់អំណាច ព្រោះថាដំណើរទស្សនកិច្ចខាងមុខ គឺមានទិសដៅលើកស្ទួយបញ្ហាស្ត្រី និងកុមា រួមទាំងជាការស្វែងយល់ពីវប្បធម៌កម្ពុជាផងដែរ។
ស្ថានទូតសហរដ្ឋអាមេរិកប្រចាំនៅកម្ពុជា មិនអត្ថាធិប្បាយយ៉ាងណាទេចំពោះការស្នើសុំជួបរបស់ស្ត្រីតំណាងទាំងនោះ។ អ្នកនាំពាក្យសាលារាជធានីភ្នំពេញ លោកឡុង ឌីម៉ង់ បានលើកឡើងថាចំពោះជម្លោះដីធ្លីនៅតំបន់បឹងកក់ និងបូរីកីឡា នឹងឈានដល់ទីបញ្ចប់នៅខែមេសាខាងមុខ ព្រោះថាទាំងសាលាក្រុងភ្នំពេញ និងបូរីកីឡា គឺកំពុងបង្ហាញឯកសារស្របច្បាប់ដើម្បីទទួលបានគេហដ្ឋាន ចំណែកឯអ្នកមិនមានឯកសារស្របច្បាប់សាលាក្រុងបានផ្តល់ទីតាំងលំនៅដ្ឋានក្នុងភូមិអណ្តូង។
ដោយឡែកជម្លោះដីធ្លីនៅបឹងកក់ គឺនៅសល់តែគ្រួសារមួយចំនួនតូចតែប៉ុណ្ណោះ ហើយគ្រួសារទាំងនេះកំពុងដោះស្រាយ។ មួយវិញទៀតអ្នកដែលរស់នៅជិតផ្លូវរថភ្លើងក៏រដ្ឋាភិបាលកំពុងពិចារណាដើម្បីសម្រេចផ្តល់លំនៅដ្ឋានច្បាស់លាស់ដល់ពលរដ្ឋទាំងនោះផងដែរ។ ប៉ុន្តែលោកស្រីច្រាយ នឹមបានលើកឡើងថា ដំណោះស្រាយរបស់សាលារាជធានីភ្នំពេញនៅពេលនេះគឺមិនបានផ្តល់សំណងដល់អ្នកទាមទារគ្រប់គ្នានោះទេ។
លោកស្រីមីឆែល អូបាម៉ា នឹងមកបំពេញទស្សនៈនៅកម្ពុជាចាប់ពីថ្ងៃទី២១ ដល់ថ្ងៃទី២២នៅខេត្តសៀមរាប។ សូមបញ្ជាក់ថា ដំណើរទស្សនៈកិច្ចរបស់ភរិយាប្រធានាធិបតីអាមេរិក លោកស្រីមីឆែលអូបាម៉ា គជាដំណើរទស្សនៈកិច្ចជាលើកទី១ដែលស្វាមីគឺលោកអូបាម៉ាកំពុងកាន់អំណាច។ ដោយឡែកកាលពីឆ្នាំ១៩៦៧ ក្នុងសម័យសង្គមរាស្ត្រនិយមភរិយាអតីតលោកប្រធានាធិបតីអាមេរិក John F. kenady ក៏ធ្លាប់មកបំពេញទស្សនៈកិច្ចជាផ្លូវការនៅកម្ពុជាផងដែរ។ យ៉ាងណាក៏ដោយ ថាតើអ្នកមានជម្លោះដីធ្លីក្នុងទីក្រុងភ្នំពេញនឹងអាចជួបជាមួយភរិយាប្រធានាធិបតីអាមេរិកបានដែរឬទេ ហើយថាតើលោកស្រី មីឆែលអូបាម៉ានឹងអាចជួយដូចការទាមទាររបស់សហគមន៍ជម្លោះដីធ្លីបានដែរឬទេ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ