ក្រសួងដែនដីបដិសេធរបាយការណ៍ជម្លោះដីធ្លីរបស់អង្គការលីកាដូ
ក្រសួងដែនដី នគរូបនីយកម្មនិងសំណង់បានបដិសេធរបាយការណ៍ស្តីពីជម្លោះដីធ្លីរបស់អង្គការលីកាដូថាជារបាយការណ៍ដែលមិនឆ្លុះបញ្ចាំងការពិត។ ក្រសួងនេះអះអាងថា ចាប់ពីឆ្នាំ ២០០២ ដល់ ២០១៤ ក្រសួងបានទទួលពាក្យបណ្តឹង ជាង ៦ ៥០០ ករណី ប៉ុន្តែ រហូតដល់ដំណាច់ឆ្នាំ ២០១៤ នៅសល់វិវាទតែ៧៥០ ករណីប៉ុណ្ណោះដែលកំពុងបន្តដោះស្រាយ។ តួលេខនេះផ្ទុយពីអង្គការលីកាដូដែលថា ជម្លោះដីធ្លីកើនឡើងយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ក្រសួងរៀបចំដែនដី នគរូបនីយកម្ម និងសំណង់បានបដិសេធថា តួលេខករណីទំនាស់ដីធ្លីរបស់អង្គការការពារសិទ្ធិមនុស្សលីកាដូមិនឆ្លុះបញ្ចាំងពីការពិតទេ។ ក្នុងសេចក្តីជូនដំណឹងរបស់ខ្លួនដែលចេញផ្សាយនៅថ្ងៃសុក្រទី២០ កុម្ភៈនេះ ក្រសួងទទួលបន្ទុកបញ្ហាដីធ្លីរបស់រដ្ឋាភិបាលបានបញ្ជាក់ថា ចាប់ពីឆ្នាំ ២០០២ ដល់ ២០១៤ ក្រសួងទទួលបានពាក្យបណ្តឹងទាក់ទងនឹងជម្លោះដីធ្លីចំនួនជាង ៦ ៥០០ ករណីនៅទូទាំងប្រទេស។
ប៉ុន្តែ នៅដំណាច់ឆ្នាំ ២០១៤ កន្លងទៅ នៅសល់តែករណីចំនួន ៧៥០ ប៉ុណ្ណោះដែលកំពុងដោះស្រាយ។ ក្រសួងនេះបានបញ្ជាក់ទៀតថា ជម្លោះដីធ្លីបានថយចុះយ៉ាងច្រើនដោយសារតែការខិតខំដោះស្រាយរបស់ខ្លួន។ របាយការណ៍នេះផ្ទុយស្រឡះពីតួលេខរបស់អង្គការលីកាដូដែលបង្ហាញថា ជម្លោះដីធ្លីបានកើនឡើងយ៉ាងខ្លាំង។ ក្រសួងដែនដី នគរូបនីយកម្ម និងសំណង់ក៏បានផ្ញើលិខិតមួយច្បាប់ទៅកាន់លោកស្រី ពង្ស ឈីវហ្គិច នាយិការអង្គការលីកាដូដើម្បីសុំផ្ទៀងផ្ទាត់តួលេខផងដែរ។
កាលពីថ្ងៃព្រហស្បតិ៍ទី ១៩ កុម្ភៈ អង្គការលីកាដូបានចេញផ្សាយរបាយការណ៍មួយដែលបង្ហាញថា យ៉ាងហោចណាស់ប្រជាពលរដ្ឋជាង មួយម៉ឺនគ្រួសារឬត្រូវជា ជិត៥ម៉ឺននាក់ បានទទួលរងផលប៉ះពាល់ដោយសារជម្លោះដីធ្លីនៅក្នុងឆ្នាំ២០១៤។ ករណីទាំងនោះ ភាគច្រើនកើតឡើងនៅក្នុងខេត្តចំនួន១៣នៅទូទាំងប្រទេស។ លីកាដូ បានបន្តថា ចំនួននេះកើនឡើងបីដងបើប្រៀបធៀបនឹងឆ្នាំ២០១៣ ។
ក្នុងរបាយការណ៍របស់ខ្លួនក្រោមចំណងជើងថា “ការកើនឡើងជាថ្មីនៃជម្លោះដីធ្លី គួរតែត្រូវបានដោះស្រាយជាបន្ទាន់” លីកាដូ បានសម្តែងការព្រួយបារម្ភជាខ្លាំងចំពោះទិន្នន័យនៃការកើនឡើងខ្លាំងបែបនេះ។ ប៉ុន្តែ របាយការណ៍នេះត្រូវបានមន្ត្រីរដ្ឋាភិបាលច្រានចោល។
លោក ផៃ ស៊ីផាន រដ្ឋលេខាធិការនិងជាអ្នកនាំពាក្យទីស្តីការគណៈរដ្ឋមន្ត្រីបានចាត់ទុករបាយការណ៍របស់អង្គការលីកាដូថាជារឿងប្រឌិតដើម្បីបំពេញចិត្តម្ចាស់ជំនួយតែប៉ុណ្ណោះ។ នេះមិនមែនជាលើកទី១ទេដែលរបាយការណ៍ស្តីពីបញ្ហាដីធ្លីមានភាពផ្ទុយគ្នាស្រឡះរវាងសង្គមស៊ីវិល និងក្រសួងរបស់រដ្ឋ។ យ៉ាងណាក៏ដោយ អង្គការលីកាដូអះអាងថា ខ្លួនមានមូលដ្ឋានទិន្នន័យច្បាស់លាស់ក្នុងការសរសេររបាយការណ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ