វៀតណាមផ្តល់ថវិកា២៥លានដុល្លារអាមេរិក ដើម្បីសាងសង់អគាររដ្ឋបាលនៃរដ្ឋសភាជាតិកម្ពុជា
លោកនាយករដ្ឋមន្រ្តីហ៊ុន សែន នៅព្រឹកថ្ងៃអង្គារនេះ បានទទួលជួបជាមួយលោកង្វៀង ហ៊្វូជុង (Nguyen Phu Trong) អគ្គលេខាធិការនៃគណៈកម្មាធិការមជ្ឈឹមបក្សកុំម្មុយនីស្ត និងជាប្រធានរដ្ឋវៀតណាមដែលកំពុងបំពេញទស្សនកិច្ចនៅកម្ពុជា។ នៅក្នុងជំនួបនេះ រដ្ឋាភិបាលវៀតណាម បានផ្តល់ជំនួយចំនួន២៥លានដុល្លារអាមេរិក ដើម្បីសាងសង់អគាររដ្ឋបាលនៃរដ្ឋសភាជាតិកម្ពុជា។
ចុះផ្សាយនៅថ្ងៃ៖
ស្តាប់ - ០២:២៩
ការផ្តល់ជំនួយរបស់វៀតណាមនេះ ធ្វើឡើងតាមរយៈអនុស្សារណៈនៃការយោគយល់គ្នាស្តីពីការផ្តល់ហិរញ្ញប្បទានឥតសំណង២៥លានដុល្លាអាមេរិកសម្រាប់ការអនុវត្តគម្រោងសាងសង់អគាររដ្ឋបាលរបស់រដ្ឋសភាជាតិកម្ពុជាដែលចុះហត្ថលេខាដោយ លោក ឌីញ គៀនយ៉ុង រដ្ឋមន្ត្រីក្រសួងហិរញ្ញវត្ថុវៀតណាម និងលោក ឡេង ប៉េងឡុង អគ្គលេខាធិការរដ្ឋសភាជាតិកម្ពុជា។ ការចុះហត្ថលេខាទទួលយកជំនួយនេះ ធ្វើឡើងក្រោមវត្តមានលោកនាយករដ្ឋមន្រ្តីហ៊ុន សែន និងលោកង្វៀង ហ៊្វូជុង អគ្គលេខាធិការនៃគណៈកម្មាធិការមជ្ឈឹមបក្សកុំម្មុយនីស្ត និងជាប្រធានរដ្ឋវៀតណាម។
ក្រៅពីអនុស្សារណៈនៃការយោគយល់គ្នានេះ កម្ពុជា និងវៀតណាមក៏សម្រេចបាននូវកិច្ចព្រមព្រៀងចំនួន៤ទៀតផងដែរ។ គឺ ពិធីសារស្តីពីវិសោធនកម្មលើពិធីសារសម្រាប់អនុវត្តកិច្ចព្រមព្រៀងរវាងកម្ពុជា-វៀតណាម ស្តីពីការដឹកជញ្ជូនផ្លូវគោក សេចក្ដីបន្ថែមស្តីពីការកែប្រែមាត្រា៦ និងមាត្រា១៧ នៃកិច្ចព្រមព្រៀងរវាងកម្ពុជា-វៀតណាម ស្តីពីការដឹកជញ្ជូនផ្លូវទឹក។ កិច្ចសម្របសម្រួលជំរុញពាណិជ្ជកម្មទ្វេភាគីរវាងកម្ពុជា-វៀតណាម ស្តីពីការអនុគ្រោះពន្ធសម្រាប់ឆ្នាំ២០១៩-២០២០ និង អនុស្សារណៈនៃការយោគយល់គ្នាស្តីពីកិច្ចសហប្រតិបត្តិការទេសចរណ៍សម្រាប់ឆ្នាំ២០១៩-២០២១ រវាងក្រសួងទេសចរណ៍កម្ពុជា និងក្រុមហ៊ុនអាកាសចរណ៍វៀតណាម។
សូមជម្រាបជូនថា ប្រធានរដ្ឋវៀតណាមលោកង្វៀង ហ៊្វូជុង បានមកបំពេញទស្សនកិច្ចជាផ្លូវការនៅក្នុងប្រទេសកម្ពុជារយៈពេលពីរចាប់ពីថ្ងៃទី២៥ កុម្ភៈ និងបញ្ចប់នៅថ្ងៃទី២៦ កុម្ភៈនេះ។ នៅក្នុងជំនួបជាមួយលោកនាយករដ្ឋមន្រ្តីហ៊ុន សែន នៅព្រឹកថ្ងៃអង្គារនេះ លោកប្រធានរដ្ឋវៀតណាម បានអះអាងថា ដំណើរទស្សនកិច្ចរបស់លោកនេះ គឺដើម្បីពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរបន្ថែមទៀត។ ជាមួយគ្នាលោកក៏បានលើកសរសើរពីការរីកចម្រើន និងស្ថិរភាពនៅកម្ពុជាផងដែរ។
ជាការឆ្លើយតបវិញ លោកនាយករដ្ឋមន្រ្តីហ៊ុន សែន បានអះអាងថា កម្ពុជាទទួលបានការអភិវឌ្ឍមកដល់ពេលនេះគឺមិនអាចកាត់ផ្តាច់បានពីកងទ័ព ប្រជាជន បក្ស និងរដ្ឋាភិបាលវៀតណាមឡើយ។ លោកនាយករដ្ឋមន្រ្តីក៏បានប្រាប់ប្រធានរដ្ឋវៀតណាមផងដែរថា កម្ពុជានឹងជំរុញឱ្យទំនាក់ទំនងរវាងប្រទេសទាំងពីរកាន់តែមានភាពរីកចម្រើនបន្ថែមទៀត។ លោកហ៊ុន សែន ក៏បានអបអរសាទចំពោះប្រទេសវៀតណាមដែលបានទទួលរៀបចំជំនួបលើកទីពីររវាងលោកប្រធានាធិបតីអាមេរិកដូណាល់ ត្រាំ និង មេដឹកនាំកូរ៉េខាងជើង គីម ជុងអ៊ុនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ