សមាជិកសភាអាស៊ាន អំពាវនាវឲ្យមានការបោះឆ្នោតដោយសន្តិវិធីនិងបើកចំហនៅកម្ពុជា
សមាជិកសភាអាស៊ានដើម្បីសិទ្ធិមនុស្ស APHR អំពាវនាវឲ្យបញ្ចប់ការគំរាមកំហែង អំពើហិង្សា និងបំភិតបំភ័យប្រជាពលរដ្ឋនៅមុនការបោះឆ្នោត។ នេះបើតាមសេចក្ដីថ្លែងការណ៍ចុះថ្ងៃទី៣១ឧសភានេះ។ តាមរយៈសេចក្ដីថ្លែងការណ៍ដដែល APHR ក៏បានសុំឲ្យអាជ្ញាធរធានាការពារសិទ្ធិបោះឆ្នោតរបស់ប្រជាពលរដ្ឋផងដែរ។
ចុះផ្សាយនៅថ្ងៃ៖
ស្តាប់ - ០១:៥៥
លោក Charles Santiago ប្រធាន APHR និងជាសមាជិកសភាម៉ាឡេស៊ី បានថ្លែងនៅក្នុងសេចក្ដីថ្លែងការណ៍ថា បានទទួលរបាយការណ៍ជាច្រើនពីការគំរាមកំហែង ដែលបង្កឲ្យមានការព្រួយបារម្ភពីការបោះឆ្នោត។ ការគំរាមកំហែងទាំងនោះរួមមាន ការព្រមានរបស់លោកនាយករដ្ឋមន្ដ្រីហ៊ុន សែន ពីលទ្ធភាពនៃសង្គ្រាម និងការព្រមានរបស់លោករដ្ឋមន្ដ្រីការពារជាតិ ទៀ បាញ់ អំពីការត្រៀមបង្ក្រាបការតវ៉ាដែលអាចកើតមានក្រោយពេលបោះឆ្នោត។
វោហាសាសន៍ដូច្នេះ ត្រូវបានលោក Santiago គូសបញ្ជាក់ថា មិនត្រឹមតែបានគំរាមកំហែងដល់គណបក្សប្រឆាំងនោះទេ តែវាក៏ជាការបំភិតបំភ័យប្រជាពលរដ្ឋកម្ពុជារាល់ថ្ងៃ ដើម្បីឲ្យបោះឆ្នោតឲ្យគណបក្សកាន់អំណាច។ នេះបើតាមប្រធាន APHR ដដែល។ សម្រាប់ប្រធានស្ថាប័ននីតិបញ្ញត្តិអន្ដរជាតិនេះ លទ្ធិប្រជាធិបតេយ្យ គឺនិយាយអំពីការអនុញ្ញាតឲ្យពលរដ្ឋជ្រើសរើសដោយខ្លួនឯងផ្ទាល់នៅក្នុងប្រអប់ឆ្នោត មិនមែនគំរាមកំហែងពួកគេដោយអំពើហិង្សា បើមិនធ្វើតាមការណែនាំឡើយ។
ជាការកត់សម្គាល់ ក្រៅពីការគំរាមកំហែងរបស់មន្ដ្រីរដ្ឋាភិបាល សមាជិកសភាអាស៊ានដើម្បីសិទ្ធិមនុស្សក៏បានសម្ដែងការព្រួយបារម្ភអំពីទឹកខ្មៅជ្រលក់ដៃដែលសង្គមស៊ីវិលអះអាងថាអាចលុបជ្រះ ការបោះពុម្ពសន្លឹកឆ្នោតលើស២០ភាគរយច្រើនជាងការចាំបាច់ និងការរំខានយុទ្ធនាការឃោសនាបោះឆ្នោតរបស់បក្សប្រឆាំងផងដែរ។
ក្រុមសមាជិកសភាលើកឡើងថា ការវិវត្តន៍ទាំងនេះត្រូវតែយកទៅពិភាក្សាដោះស្រាយជាបន្ទាន់ ដើម្បីធានាបាននូវការបោះឆ្នោតដោយសេរីនិងត្រឹមត្រូវ។ ចំពោះលោក Charles Santiago ប្រធាន APHR ការបោះឆ្នោតនៅថ្ងៃអាទិត្យចុងសប្ដាហ៍នេះ គឺជាការធ្វើតេស្តលម្អិតមួយអំពីបរិយាកាសនយោបាយមុនការបោះឆ្នោតថ្នាក់ជាតិ ដែលនឹងត្រូវរៀបចំធ្វើនៅឆ្នាំ២០១៨ខាងមុខ។ ហើយវាក៏មានសារៈសំខាន់ណាស់ដែរ សម្រាប់ប្រជាធិបតេយ្យថ្នាក់មូលដ្ឋាន។ នេះបើតាមលោក Santiago៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ