ឧទ្ធរណ៍រកឃើញសកម្មជនដីធ្លីទាំង៤នាក់ មានទោសដូចនឹងការសម្រេចរបស់សាលាដំបូង
នៅព្រឹកថ្ងៃទី២៧ ខែកុម្ភៈ នេះសាលាឧទ្ធរណ៍បានសម្រេចតម្កល់សេចក្តីសម្រេចរបស់តុលាការសាលាដំបូងរាជធានីភ្នំពេញ ទុកជាបានការដដែល។ ដូច្នេះសកម្មជនដីធ្លីទាំង៤នាក់ ត្រូវជាប់ទោសដដែល នៅក្នុងបទប្រមាថអ្នករាជការសាធារណៈ និងបទប្រឆាំងនឹងអ្នករាជការសាធារណៈមានស្ថានទម្ងន់ទោស។
ចុះផ្សាយនៅថ្ងៃ៖
ស្តាប់ - ០១:៥០
អ្នកស្រី ទេព វន្នី និងស្ត្រីសកម្មជនបឹងកក់ ៣នាក់ ទៀត រួមមាន៖ អ្នកស្រី គង់ ចន្ថា អ្នកស្រី បូ ឆវី និងអ្នកស្រី ហេង មុំ ត្រូវជាប់ទោសដដែល ក្នុងបទ ជេរប្រមាថមន្ត្រីសាធារណៈ និងបទប្រឆាំងនឹងអ្នករាជការសាធារណៈមានស្ថានទម្ងន់ទោស។ នេះបើតាមការសម្រេចរបស់សាលាឧទ្ធរណ៍នៅព្រឹកថ្ងៃទី២៧ ខែកុម្ភៈនេះ។
ការសម្រេចរបស់តុលាការសាលាឧទ្ធរណ៍ នៅព្រឹកនេះ ធ្វើឡើងក្រោមសម្រែកតវ៉ាពីសកម្មជនបឹងកក់ដូចគ្នានៅខាងក្រៅតុលាការសាលាឧទ្ធរណ៍។ តំណាងក្រុមសកម្មជនដីធ្លីបានចាត់ទុកការសម្រេចនេះ ថាតុលាការស្រុកខ្មែរមិនអាចផ្តល់យុត្តិធម៌ និងតម្លាភាពដល់ក្រុមរបស់ពួកគាត់ទេ ហើយទីបំផុតពួកគាត់មានតែការសោកស្តាយប៉ុណ្ណោះ។
សកម្មជនដីធ្លីទាំង៤នាក់ត្រូវបានសាលាដំបូងរាជធានីភ្នំពេញ កាលពីថ្ងៃទី១៩ ខែកញ្ញា ឆ្នាំ២០១៦ បានសម្រេចផ្តន្ទាទោសឲ្យជាប់ពន្ធនាគារម្នាក់ៗ រយៈពេល៦ខែ ពីបទ «ប្រមាថអ្នករាជការសាធារណៈ និងបទប្រឆាំងនឹងអ្នករាជការសាធារណៈ មានស្ថានទម្ងន់ទោស» តាមមាត្រា ៥០២ និងមាត្រា ៥០៤ នៃក្រមព្រហ្មទណ្ឌ ប្រព្រឹត្តនៅមុខសាលារាជធានីភ្នំពេញ កាលពីថ្ងៃទី ២៨ ខែវិច្ឆិកា ឆ្នាំ២០១១។
ក្រោយមកសំណុំរឿងនេះបានបញ្ជូនដល់ឧទ្ធរណ៍ ហើយត្រូវបានតុលាការសាលាឧទ្ធរណ៍ បានបើកសវនាការ ជំនុំជម្រះ កាលពីថ្ងៃទី១៥ ខែកុម្ភៈ ឆ្នាំ២០១៧។
ដោយឡែក កាលពីថ្ងៃទី២៣ ខែកុម្ភៈកន្លងទៅ លោកស្រី ទេព វន្នី ត្រូវបានសាលាដំបូងរាជធានីភ្នំពេញ ប្រកាសសាលក្រមផ្តន្ទាទោស ដាក់ពន្ធនាគាររយៈពេល ២ឆ្នាំ ៦ខែ ពាក់ព័ន្ធការប្រើអំពើហិង្សាលើសន្តិសុខសាលាខណ្ឌដូនពេញពីរនាក់ ។
តុលាការ ក៏បានពិន័យជាប្រាក់លើលោកស្រី ទេព វន្នី ចំនួន ៥លានរៀល និង បង្គាប់ឲ្យសងសំណងជំងឺចិត្តដល់ជនរងគ្រោះពីរនាក់ចំនួន ៩លានរៀល។ លោកស្រី ទេព វន្នី ជាប់ចោទពីបទហិង្សាដោយចេតនាមានស្ថានទម្ងន់ទោស ប្រព្រឹត្តនៅក្បែរវិមានឯករាជ្យ សង្កាត់ ទន្លេបាសាក់ ខណ្ឌ ដូនពេញ រាជធានីភ្នំពេញ កាលពីថ្ងៃទី ១៣ ខែមិនា ឆ្នាំ ២០១៣ តាមមាត្រា ២១៨ នៃក្រមព្រហ្មទណ្ឌ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ