ឧទ្ធរណ៍នឹងលើកយកករណីលោក មាជ សុវណ្ណារ៉ា និងសកម្មជនបក្សប្រឆាំង មកបើកសវនាការនៅពាក់កណ្តាលខែមិនា
តុលាការសាលាឧទ្ធរណ៏ នឹងលើកយកករណីរបស់លោក មាជ សុវណ្ណារ៉ា និងសកម្មជនគណបក្សប្រឆំាងចំនួន១១រូបផ្សេងទៀត មកបើកសវនាការជាថ្មី នៅពាក់កណ្តាលខែមិនាខាងមុខនេះ។ ជាសវនាការលើបណ្តឹងប្រឆាំងនឹងសេចក្តីសម្រេចរបស់តុលាការក្រុងភ្នំពេញ ពាក់ព័ន្ធនឹងសំណុំរឿងរំដោះទីលានប្រជាធិបតេយ្យកាលពីឆ្នាំ២០១៤។ ក្រុមមេធាវីការពារក្តីរំពឹងទុកថា សវនាការរបស់សាលាឧទ្ធរណ៍ នឹងផ្តល់យុត្តិធម៌ដល់ពួកគេ។
ចុះផ្សាយនៅថ្ងៃ៖
ស្តាប់ - ០២:០៥
បើគ្មានការប្រែប្រួលទេ សវនាការលើសំណុំរឿងរំដោះទីលានប្រជាធិបតេយ្យកាលពីឆ្នាំ២០១៤ នឹងត្រូវតុលាការសាលាឧទ្ធរណ៍ លើកយកមកបើកសវនការឡើងវិញ នៅថ្ងៃទី១៧ខែមិនាខាងមុខនេះ។ នេះបើតាមការឲ្យដឹងពី លោក សំ សុខគង់ មេធាវីការពារក្តីឲ្យលោក មាជ សុណ្ណារ៉ា នៅថ្ងៃទី២ កុម្ភៈ ឆ្នាំ២០១៦។
គួរជម្រាបជូនថា លោក មាជ សុវណ្ណារ៉ា មន្រ្តីជាន់ខ្ពស់គណបក្សសង្រ្គោះជាតិ រួមទាំងសកម្មជនគណបក្សប្រឆាំង១០នាក់ផ្សេងទៀត ត្រូវបានតុលាការក្រុងភ្នំពេញកាត់ទោសកាលពីខែកក្កដា ឆ្នាំ២០១៥ ឲ្យជាប់ពន្ធនាគារក្នុងម្នាក់ចាប់ពី៧ទៅ២០ឆ្នាំ ពីបទចូលរួម និងដឹកនាំកុប្បកម្មរំដោះទីលានប្រជាធិបតេយ្យ ដែលបានប្រព្រឹត្តិទៅនៅថ្ងៃទី ១៥ កក្កដា ឆ្នាំ២០១៤។ ជារយៈពេលអន្តរកាល នៃភាពតានតឹងខាងផ្នែកនយោបាយរយៈពេលជាង១ឆ្នាំ ក្រោយពីការបោះឆ្នោតជាតិ នៅឆ្នាំ២០១៣មក។
គិតត្រឹមថ្ងៃទី២ កុម្ភៈ ឆ្នាំ២០១៦ គឺមានរយៈពេល៧ខែមកហើយ ដែលសកម្មជនគណបក្សសង្រ្គោះជាតិទាំង១១រូប កំពុងជាប់ឃុំនៅក្នុងពន្ធនាគារព្រៃសរ ហើយនេះ ក៏ជាសវនាការសាលាឧទ្ធរណ៍លើកទី១ដែរ បន្ទាប់ពីតុលាការក្រុងភ្នំពេញបានកាត់ទោសឲ្យពួកគេជាប់ពន្ធនាគារកាលពីខែកក្កដាឆ្នាំ២០១៥នោះ។
គួរបញ្ជាក់ដែរថា លោក មាជ សុវណ្ណារ៉ា ដែលគេដឹងថា មានសញ្ជាតិអាមេរិកកាំងផងនោះ ត្រូវបានកូនស្រីច្បងរបស់ខ្លួន ផ្ញើលិខិតសុំអន្តរាគមន៍ដោះលែង ជាបន្តបន្ទាប់ទៅកាន់ប្រធានាធិបតីអាមេរិក លោក បារ៉ាក់ អូបាម៉ា និងប្រមុខការទូតអាមេរិក លោក ចន ឃែរី កាលពីអំឡុងខែមករាកន្លងទៅ។ ក៏ប៉ុន្តែ គេមិនឃើញមានការប្រែប្រួល ឬសញ្ញាវិជ្ជមានណាមួយនោះទេ ខណៈដែលប្រមុខការទូតអាមេរិកលោក ចន ឃែរី បានមកបំពេញទស្សនកិច្ចនៅកម្ពុជាកាលពីចុងខែមករាកន្លងទៅនេះ។
យ៉ាងណាក៏ដោយ លោក សំ សុខគង់ មេធាវីការពារក្តីឲ្យលោក មាជ សុវណ្ណារ៉ា បានសរសេរនៅលើបណ្តាញសង្គមហ្វេសបុករបស់លោកថា ការទន្ទឹងរង់ចំាទទួលបាននូវយុត្តិធម៌របស់ពួកអ្នកជាប់ចោទ ដែលលោកមេធាវីបានហៅថា ជាអ្នកទោសមនសិការនេះ និងកើតមាននៅពេលតុលាការសាលាឧទ្ធរណ៍បើកសវនាការនៅពាក់កណ្តាលខែមិនាខាងមុខនេះ។
លោកមេធាវីបានបញ្ជាក់ថា នៅក្នុងអំឡុងពេលនៃសវនាការសាលាឧទ្ធរណ៍ខាងមុខ លោកនឹងដាក់ភស្តុតាងបន្ថែមទៅកាន់អង្គសវនាការ ដើម្បីប្រឆាំងនឹងសាលក្រមរបស់តុលាការក្រុងភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ