អាជ្ញាធរអប្សរានឹងពង្រឹងកម្លាំងយាមល្បាតបន្ថែម ខណៈទេសចរបរទេសលួតថតរូបអាក្រាតកាយជាបន្តបន្ទាប់!
អាជ្ញាធរជាតិអប្សរាទើបតែបានឃាត់ខ្លួនស្ត្រីជនជាតិអាមេរិកពីរនាក់ថ្មីទៀត ដែលបានលួតថតរូបអាក្រាតកាយរបស់ខ្លួននៅក្នុងបរិវេណប្រាសាទព្រះខ័ន កាលពីវេលាម៉ោង១០ ព្រឹកថ្ងៃសុក្រទី ៦កុម្ភៈម្សិលមិញនេះ។ ទន្ទឹមនឹងកើតមានហេតុការណ៍ថតរូបអាសអាភាសនេះជាបន្តបន្ទាប់មក អាជ្ញាធរជាតិអប្សរាបានបញ្ជាក់ខ្លួននឹងពង្រឹងការយាមល្បាត និងបន្ថែមស្លាកសញ្ញាស្តីពីការហាមមិនឲ្យស្លៀកសំលៀកបំពាក់មិនសមរម្យ ឲ្យបានច្រើននៅតាមតំបន់ប្រាសាទនានា។
ចុះផ្សាយនៅថ្ងៃ៖
ស្តាប់ - ០១:៣៩
ស្ត្រីជនជាតិអាមេរិកពីរនាក់ បាននាំគ្នាលួចថតរូបអាក្រាតកាយរបស់ខ្លួននៅក្នុងបរិវេណប្រាសាទព្រះខ័ន កាលពីថ្ងៃសុក្រ ហើយត្រូវបានអាជ្ញាធរជាតិអប្សរា ឃាត់ខ្លួន ហើយបញ្ជូនទៅឲ្យនគបាលទេសចរណ៍ប្រចាំខេត្តសៀមរាបជាអ្នកដោះស្រាយ។ ស្ត្រីទាំងពីរនាក់នេះមានឈ្មោះថា Lindsey Kate ADAMS អាយុ២២ឆ្នាំ និងម្នាក់ទៀតមានឈ្មោះថា Leslie Jan ADAMS អាយុ២០ឆ្នាំ។
ករណីនេះបានកើតមានឡើងតែមួយសប្តាហ៍បន្ទាប់ពីបុរសភ្ញៀវទេសចរ សញ្ជាតិបារាំងបីនាក់ បានលួតថតរូបអាក្រាតកាយនៅក្នុងតំបន់បរិវេណប្រាសាទបន្ទាយក្តីកាលពីថ្ងៃទី ២៩មករាកន្លងទៅនេះ។ យុវជនបារាំងទាំងបីនាក់ដែលមានអាយុចាប់ពី២០ ដល់ ២២ឆ្នាំ ត្រូវបានតុលាការខេត្តសៀមរាមបានសម្រេចកាត់ក្តី ដោយពិន័យជាប្រាក់ក្នុងម្នាក់ៗ ចំនួន ១លានរៀល, ឲ្យជាប់ពន្ធនាគារ៦ខែ និងមិនឲ្យចូលទឹកដីខ្មែរ រយៈពេល៤ឆ្នាំ កាលពីថ្ងៃទី ៣១មករា។ ប៉ុន្តែទោសជាប់ពន្ធនាគារនោះ មិនត្រូវបានអនុវត្តនោះទេ។
អគ្គនាយកអាជ្ញាធរជាតិអប្សរា លោកប៊ុន ណារិទ្ធបានបញ្ជាក់ប្រាប់វិទ្យុបារំាងនៅព្រឹកថ្ងៃសៅរ៍នេះថា អាជ្ញាធរអប្សរានឹងបង្កើនកម្លាំងយាមល្បាតរបស់ខ្លួនឲ្យកាន់តែតឹងរឹងបន្ថែមទៀត ហើយក៏នឹងដាក់ពង្រាយស្លាកសញ្ញាស្តីពីការហាមមិនឲ្យស្លៀកសំលៀកបំពាក់វៀលខ្លី មិនសមរម្យចូលក្នុងតំបន់ប្រាសាទអង្គរផងដែរ។
គួរជម្រាបជូនផងដែរថា វិធានការ ចាប់ខ្លួនភ្ញៀវទេសចរបរទេស ដែលថតរូបអាក្រាតមិនសមរម្យ នៅលើប្រាសាទខ្មែរនេះ បានចាប់ផ្តើមឡើង បន្ទាប់ពីមានការបង្ហោះរូបភាពស្រី្តអាក្រាតកាយ នៅប្រាសាទខ្មែរជាច្រើន ទៅលើទំព័របណ្តាញសង្គម ដែលបង្កឲ្យមានការរិះគន់ដល់អាជ្ញាធរជាតិអប្សរាជាខ្លាំង។ អជ្ញាធរជាតិអប្សរា ដែលនៅពេលនេះ បានបញ្ជាក់ថា កំពុងតែបន្តស៊ើបអង្គេត និងចាត់វិធានការ លើគ្រប់ករណីការថតរូបអាក្រាត្រ ឬការថតរូបមិនសមរម្យ នៅក្នុងប្រាសាទខ្មែរនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ