សហជីពគាំទ្រការបង្កើតច្បាប់ប្រាក់ឈ្នួលអប្បបរមានៅកម្ពុជារបស់ក្រសួងការងារ
ក្រសួងការងារកំពុងពិភាក្សាជាមួយអ្នកជំនាញការផ្នែកប្រាក់ឈ្នួលរបស់អង្គការអន្តរជាតិខាងការងារ (ILO) ដើម្បីរៀបចំសេចក្តីព្រាងច្បាប់ស្តីពីប្រាក់ឈ្នួលអប្បបរមានៅកម្ពុជា។ បើតាមលោកអ៊ិត សំហេង រដ្ឋមន្ត្រីក្រសួងការងារ សេចក្តីព្រាងច្បាប់នេះ គឺដើម្បីធានាដំណើរការយន្តការកំណត់ប្រាក់ឈ្នួលអប្បបរមា និងធានាភាពសុខដុមរមនានៃទំនាក់ទំនងវិជ្ជាជីវៈ ក៏ដូចជាការលើកកម្ពស់កម្រិតជីវភាពរបស់កម្មករនិយោជិត ព្រមទាំងធានានូវស្ថិរភាព និរន្តរភាព នៃវិស័យពាណិជ្ជកម្មអន្តរជាតិ និងការទាក់ទាញការវិនិយោគនៅកម្ពុជាផងដែរ។ មេសហជីពសំខាន់ៗកម្ពុជា បានគាំទ្រចំពោះសេចក្តីព្រាងច្បាប់ថ្មីមួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
លោកអាត់ ធន់ ប្រធានសហភាពការងារកម្ពុជា បានលើកឡើងថា សេចក្តីព្រាងច្បាប់ថ្មីនេះ នឹងផ្តល់អត្ថប្រយោជន៍ច្រើនដល់កម្មករ និយោជិត ដូចជាកម្មករនៅក្នុងវិស័យខ្លះ ដែលមិនទាន់ត្រូវបានគេគិតគូរនោះ នឹងចាប់ផ្តើមមានការគិតគូរឡើងវិញ។ សម្រាប់លោកអាត់ ធន់ និយាយជាទូទៅ សេចក្តីព្រាងច្បាប់ស្តីពីប្រាក់ឈ្នួលអប្បបរមានៅកម្ពុជានេះ នឹងធ្វើឲ្យការកំណត់ប្រាក់ឈ្នួលសម្រាប់កម្មករនិយោជិតនឹងកើតមានជាទៀងទាត់ ហើយនឹងច្បាស់លាស់។
ចំណែកលោកមឿង តុលា នាយកប្រតិបត្តិនៃមជ្ឈមណ្ឌលសម្ព័ន្ធការងារ និងសិទ្ធិមនុស្សវិញ លោកយល់ថា បើកម្ពុជាមានច្បាប់ស្តីពីប្រាក់ឈ្នួលអប្បបរមានេះ នោះប្រាក់ឈ្នួលអប្បបរមាសម្រាប់កម្មករនឹងត្រូវបានកំណត់នៅក្នុងស្តង់ដារតែមួយ ឫនិយាយឲ្យស្រួលយល់ទៅ គឺមានប្រាក់ឈ្នួលជាគោលមួយច្បាស់លាស់។ បន្ថែមលើនេះ សម្រាប់លោកមឿន តុលា អ្វីដែលសំខាន់នៃច្បាប់ថ្មីនេះ គឺវានឹងជួយឲ្យនិយោជក ដែលមានបំណងមករកស៊ីនៅស្រុកខ្មែរមានត្រីវិស័យច្បាស់លាស់ក្នុងការផ្តល់ប្រាក់ឈ្នួលសមរម្យដល់កម្មករខ្មែរ។ ជាមួយគ្នានេះដែរ លោកមឿង តុលា ក៏បានចង្អុលបង្ហាញថា ការធ្វើសេចក្តីព្រាងច្បាប់នេះ គឺស្របទៅនឹងច្បាប់ស្តីពីការងារថែមទៀត។
ទន្ទឹមនឹងការគាំទ្រនេះ ក្រុមសហជីពក៏មានការព្រួយបារម្ភមួយចំនួនផងដែរលើសេចក្តីព្រាងច្បាប់ស្តីពីប្រាក់ឈ្នួលអប្បបរមានៅកម្ពុជា។ លោកមឿង តុលា បារម្ភខ្លាចថា ការកំណត់ប្រាក់ឈ្នួលតាមច្បាប់ថ្មីនេះ មិនឈរទៅតាមតម្រូវការចាំបាច់របស់កម្មករ។ ដូច្នេះលោកស្នើឲ្យមានការកំណត់ប្រាក់ឈ្នួលបំពេញទៅតាមតម្រូវការរបស់កម្មករ។ ម៉្យាងទៀត ការកំណត់ត្រូវធ្វើឡើងតាមលក្ខណៈវិទ្យាសាស្រ្ត ដោយជៀសវាងការកំណត់តាមលក្ខណៈកេងចំណេញនយោបាយ។ រីឯលោកប៉ាវ ស៊ីណា ប្រធានសម្ព័ន្ធសហជីពចលនាកម្មករវិញ បានទាមទារឲ្យកំណត់ប្រាក់ឈ្នួលតាមច្បាប់ថ្មីនេះ មានតម្លាភាពដោយភាគី ដែលត្រូវចរចាតំណាងឲ្យកម្មករត្រូវកំណត់ឲ្យបានច្បាស់។
ចំពោះលោកអាត់ ធន់ លោកខ្លាចច្បាប់ថ្មីនេះ កាត់បន្ថយសិទ្ធិជាមូលដ្ឋានរបស់កម្មករ ដូចជាមិនឲ្យមានការតវ៉ាពាក់ព័ន្ធនឹងបញ្ហាប្រាក់ឈ្នួលជាដើម។ ដូច្នេះលោកទាមទារចង់ពិនិត្យមើលសេចក្តីព្រាងច្បាប់នេះឲ្យបានលម្អិត និងស្នើឲ្យក្រសួងរៀបចំសិក្ខាសាលាពិគ្រោះយោបល់ជាមួយក្រុមសហជីពឲ្យបានច្រើនដងសិន មុនបញ្ជូនឲ្យរដ្ឋសភាពិនិត្យ និងសម្រេចអនុម័តនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ