កម្ពុជារំពឹងថាភ្ញៀវទេសចរនឹងកើនឡើង២ទៅ៣ដង ក្រោយដោះស្រាយចប់ជំងឺ Covid-19
កម្ពុជានៅតែបើកចំហជើងមេឃវិស័យទេសចរណ៍ទៅកាន់ពិភពលោក គឺមិនមានការបិទការធ្វើដំណើរណាមួយដូចបណ្តាប្រទេសមួយចំនួនដែលបារម្ភពីការរីករាលនៃជំងឺCovid-19នោះទេ។ នេះជាការលើកឡើងរបស់រដ្ឋលេខាធិការក្រសួងទេសចរណ៍ នៅក្នុងសន្និសិទកាសែតនាព្រឹកថ្ងៃចន្ទនេះ។ តាមរយៈវិធានការដែលបានដាក់ចេញដើម្បីស្រោចស្រង់ការធ្លាក់ចុះវិស័យទេសចរណ៍ថ្មីៗនេះ ក្រសួងទេសចរណ៍រំពឹងថាវិស័យនេះនៅតែរីកចម្រើន ខណៈចំនួនភ្ញៀវទេសចរនៅខេត្តសៀមរាប និងក្រុងព្រះសីហនុ ធ្លាក់ចុះយ៉ាងគំហុក។
ចុះផ្សាយនៅថ្ងៃ៖
ស្តាប់ - ០២:០៥
ក្រោយពីដោះស្រាយចប់បញ្ហារីករាលដាលនៃជំងឺ Covid-19 នៅរង្វង់៤ឬ៥ខែទៀត ចំនួនភ្ញៀវទេសចរណ៍មកកម្ពុជាអាចនឹងកើន២ទៅ៣ដង។ នេះការរំពឹងទុករបស់លោក ទិត្យ ចន្ថា រដ្ឋលេខាធិការក្រសួងទេសចរណ៍។ ប៉ុន្តែលោកទទួលស្គាល់ថា នៅពេលនេះចំនួនភ្ញៀវទេសចរចិនដែលបានមកកម្ពុជាកាលពីឆ្នាំ២០១៩ចំនួនជាង២,៥ លាននាក់នោះ នៅឆ្នាំនេះកំពុងធ្លាក់ចុះយ៉ាងគំហុក ខណៈភ្ញៀវពីអឺរ៉ុបថយចុះតិចតួចប៉ុណ្ណោះ។
បើតាម លោក ទិត្យ ចន្ថា ក្នុងរយៈពេល២ខែដើមឆ្នាំ២០២០នេះ ចំនួនភ្ញៀវទេសចរធ្លាក់ចុះជារួម១៥% ប៉ុន្តែការរំពឹងទុករយៈពេលពេញមួយឆ្នាំ ភ្ញៀវទេសចរបរទេសអាចថយចុះតែប្រមាណ១០%ប៉ុណ្ណោះ។
ជំនួសឲ្យការធ្លាក់ចុះចំនួនទេសចរណ៍បរទេសនេះ ប្រមុខរដ្ឋាភិបាលជាថ្មីម្តងទៀត នៅថ្ងៃចន្ទនេះ បានអំពាវនាវឲ្យមានកំណើនភ្ញៀវទេសចរណ៍ក្នុងស្រុក ដោយកាត់បន្ថយពលរដ្ឋខ្មែរ ធ្វើដំណើរចេញក្រៅប្រទេស ដែលក្នុងមួយឆ្នាំប្រមាណ១លាននាក់។
ក្រៅពីនោះ ក្រសួងទេសចរណ៍ បានបង្កើតបណ្ណដំណើរកម្សាន្តមានតម្លៃសមរម្យ សម្រាប់ពលរដ្ឋខ្មែរដែលចង់ធ្វើដំណើរកម្សាន្តទូទាំងប្រទេស ដែលអាចកាត់បន្ថយការចំណាយចាប់ពី ២០ទៅ៣០ភាគរយ ប្រើប្រៀបធៀបទៅនឹងការធ្វើដំណើរផ្ទាល់ខ្លួន។ បណ្ណដំណើរកម្សាន្តនេះ គឺផ្តល់នូវអត្ថប្រយោជន៍ជាច្រើន ដូចជា ធានាលើសុវត្ថិភាពការធ្វើដំណើរ ថវិកា និងផ្តល់ទំនុកចិត្តខ្ពស់ ការសម្រួលដល់ពេលវេលា និងផ្ដល់ភាពងាយស្រួលក្នុងការស្វែងរកតំបន់គោលដៅទេសចរណ៍។
ចំណែកម្ចាស់សណ្ឋាគារ និងផ្ទះសំណាក់វិញ ត្រូវបានលើកលែងការបង់ពន្ធចំនួន៤ខែ ហើយបុគ្គលិកផ្នែកនេះនឹងត្រូវទទួលបានការបណ្តុះបណ្តាលជំនាញបន្ថែម។ នេះជាការគូសបញ្ជាក់របស់លោក ទិត្យ ចន្ថា។
បើតាមរដ្ឋលេខាធិការរូបនេះ ចំនួនភ្ញៀវទេសចរបរទេសមកកម្ពុជា នៅឆ្នាំ២០១៩ មាន ៦,៦លាននាក់ ដែលគិតជាទឹកប្រាក់ចាក់ចូលសេដ្ឋកិច្ចកម្ពុជាប្រមាណ៥ពាន់លានដុល្លារ ខណៈភ្ញៀវក្នុងស្រុកមានចំនួន១១លាននាក់គិតជាទឹកប្រាក់ប្រមាណ៥រយលានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ