សេចក្តីព្រាងច្បាប់គជប និងច្បាប់បោះឆ្នោត បង្ហាញមុនសិក្ខាសាលា នៅថ្ងៃចន្ទ
សេចក្តីព្រាងសេចក្តីស្នើច្បាប់គជប និងសេចក្តីស្នើច្បាប់បោះឆ្នោតថ្មី ត្រូវបានលោកសមរង្ស៊ី ផ្សព្វផ្សាយតាមទំព័រហ្វេសប៊ុក នៅព្រឹកថ្ងៃសៅរ៍ ទី៧ ខែមីនានេះ។ សេចក្តីស្នើច្បាប់ទាំងពីរ នឹងត្រូវបង្ហាញក្នុងសិក្ខាសាលាពិគ្រោះយោបល់ នាព្រឹកថ្ងៃចន្ទ ទី៩ ខែមីនា នៅរដ្ឋសភា។ ប៉ុន្តែអង្គការសង្គមស៊ីវិល ស្នើឲ្យមានសិក្ខាសាលាពិគ្រោះយោបល់ ១ ទៀត ព្រោះថា សិក្ខាសាលារយៈពេល ១ ព្រឹក នៅថ្ងៃចន្ទ ទី៩មីនា មានរយៈពេលខ្លី ដែលសង្គមស៊ីវិល មិនមានពេលពិនិត្យលើសេចក្តីព្រាងច្បាប់ទាំងពីរ ដើម្បីផ្តល់មតិយោបល់ឲ្យបានពេញលេញឡើយ។
ចុះផ្សាយនៅថ្ងៃ៖
ស្តាប់ - ០២:៣៦
ពីរថ្ងៃ មុនថ្ងៃចន្ទ ទី៩ ខែមីនា ដែលជាថ្ងៃសិក្ខាសាលារៀបចំនៅរដ្ឋសភា ដើម្បីជជែកពិភាក្សាលើច្បាប់បោះឆ្នោត និងច្បាប់គជប គឺនៅព្រឹកថ្ងៃសៅរ៍នេះតែម្តង លោកសមរង្ស៊ី បានផ្សព្វផ្សាយនូវសេចក្តីព្រាងចុងក្រោយនៃច្បាប់ គ.ជ.ប. និងច្បាប់បោះឆ្នោត។
ច្បាប់ស្តីពីការបោះឆ្នោតជ្រើសតាំងតំណាងរាស្ត្រ មាន ១៧១ មាត្រា និង ១២ ជំពូក ជាសេចក្តីព្រាងចុងក្រោយ ដែលបានឯកភាពដោយក្រុមការងារនៃគណបក្សទាំងពីរ នៅថ្ងៃទី៦ ខែមីនា ឆ្នាំ២០១៥។ ចំណែកសេចក្តីព្រាងសេចក្តីស្នើច្បាប់គជប ដែលបានឯកភាពដោយក្រុមការងារនៃគណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី៨ ខែធ្នូ ឆ្នាំ២០១៤ មាន ៧ ជំពូក និង ៦៦ មាត្រា។
សេចក្តីព្រាងច្បាប់បោះឆ្នោត និងច្បាប់គជប ដែលទើបតែផ្សព្វផ្សាយនៅថ្ងៃសៅរ៍នេះ ហាក់ដូចជាប្រថុចញុច ដែលសង្គមស៊ីវិល មិនមានសិទ្ធិពេលពេញលេញ ដើម្បីពិនិត្យតាមវិជ្ជាជីវៈ និងតាមបច្ចេកទេស សម្រាប់ផ្តល់ជាមតិយោបល់ នៅថ្ងៃចន្ទ ទី៩មីនានោះទេ។ នេះបើតាមលោក ព្រាប កុល ប្រធានអង្គការតម្លាភាពកម្ពុជា។ ទោះបីជាស្វាគមន៍នូវការបញ្ចេញសេចក្តីព្រាងច្បាប់ទាំងពីរ នៅពេលនេះ តែលោកព្រាបកុល នឹងមិនចូលរួមក្នុងសិក្ខាសាលា នៅព្រឹកថ្ងៃចន្ទនោះទេ។
សិក្ខាសាលា នៅព្រឹកថ្ងៃចន្ទ ត្រូវបានលោក គល់ បញ្ញា នាយកប្រតិបត្តិអង្គការឃ្លាំមើលការបោះឆ្នោត ខុមហ្វ្រែល បានចាត់ទុកថាជាសន្និសីទកាសែត ដែលគណបក្សទាំងពីរ គ្រាន់តែបង្ហាញសេចក្តីព្រាងច្បាប់ ព្រោះតាមសេចក្តីព្រាងកម្មវិធី សិក្ខាសាលា នឹងធ្វើឡើងតែមួយព្រឹក រីឯកម្មវិធីសំណួរ-ចម្លើយ និងការផ្តល់មតិយោបល់ មានពេលតែ ១ ម៉ោង ១០ នាទីប៉ុណ្ណោះ។
តាមលោក គល់ បញ្ញា គណបក្សទាំងពីរ ត្រូវរៀបចំសិក្ខាសាលាពិគ្រោះយោបល់ពេញលេញមួយ នៅក្រោយថ្ងៃ៩មីនា ដោយមានអ្នកជំនាញការជាតិអន្តរជាតិ និងភាគីពាក់ព័ន្ធចូលរួម។ សិក្ខាសាលា ក្រោយថ្ងៃ៩មីនា ក៏ត្រូវធ្វើយ៉ាងហោចណាស់ ១ ថ្ងៃ ដើម្បីឲ្យសង្គមស៊ីវិល មានពេលគ្រប់គ្រាន់ក្នុងការពិនិត្យ និងផ្តល់មតិយោបល់លើសេចក្តីព្រាងច្បាប់ទាំងពីរនោះ។
យ៉ាងណាក៏ដោយ សម្រាប់លោក គួយ ប៊ុនរឿន តំណាងក្រុមការងារចរចាគណបក្សសង្គ្រោះជាតិ មិនទាន់ដឹងថា គណបក្សទាំងពីរ អាចនឹងរៀបចំសិក្ខាសាលាផ្សេងទៀត ក្រោយថ្ងៃ៩មីនា ឬមិនមាននោះទេ ដោយលោកអះអាងថា ចាំមើលមតិយោបល់អ្នកចូលរួមក្នុងសិក្ខាសាលា នាព្រឹកថ្ងៃចន្ទ។
ចំណែកការព្រួយបារម្ភ និងសំណើឲ្យលុបចោល កែសម្រួល ឬក៏បន្ថែមចំណុចណាមួយក្នុងពង្រាងច្បាប់បោះឆ្នោត និងច្បាប់គជប ត្រូវបានលោក គួយ ប៊ុនរឿន បញ្ជាក់ថា ក្រុមការងារគណបក្សទាំងពីរ នឹងពិនិត្យលើមតិយោបល់ទាំងនោះ មុននឹងបញ្ជូនច្បាប់ទាំងពីរ ទៅរដ្ឋសភា ប្រជុំអនុម័ត ឲ្យបានរួចរាល់នៅមុនពិធីបុណ្យចូលឆ្នាំថ្មី នាពាក់កណ្តាលខែមេសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ